ইয়োব 8 - Chakma Bibleবিল্দদর পত্তম্ কধা 1 সেক্কে শূহীয় বিল্দদে জোবত্ কলঅ, 2 তুই আর কদক্কণ এ কধানি কোই কোই থেবে? তঅ কধানি ঝড় বোইয়্যের ধোক্ক্যেন্। 3 গোজেনে কি ন্যায়র বিরুদ্ধে কাম্ গরে? বেগত্তুন্ খেমতাবলা গোজেনে কি ঠিগ্কানরে বেঠিগ্ গরে? 4 তঅ ঝি-পূঅগুনে হামাক্কাই তা বিরুদ্ধে পাপ গোজ্যন্, সেনত্তে তে পাপঅ সাজার্ আঢত্ তারারে তুলি দিয়্যে। 5 মাত্তর্ তুই যুনি আওজ্ গুরিনে গোজেন ইদু তবনা গরচ্ আর বেগত্তুন্ খেমতাবলা গোজেন ইদু কোজোলি গর্, 6 যুনি তুই খাটি আর গম্ ওই থাচ্, সালে ইক্কিনেয়ো তে তঅ পক্ষেদি কাম্ গত্তে রাজি অবঅ আর তর্ গম্ জাগানত্ আরঅ তরে বোজেব। 7 তর্ আগামিদি সময়ান্ অবঅ এদক্ ভালেদিলোই ভর্পূনোং, মনে গুরিবেদে তঅ পত্তম্ অবস্থাগান ইত্তুন্ বেশ্ ভান্ন্যেই এলঅ। 8 পূরোণি দিনো মানুচ্চুনোরে পুযোর্ গরঅ; তারার্ পূরোণি মানুচ্চুনোরে যিয়েন্ শিগেয়োন্ সিয়েনি তোগেই চঅ। 9 আমি দঅ গেল্যেকেল্যে জর্মেয়্যেই, কিচ্ছু হবর্ ন-পেই; পিত্থিমীর্ উগুরে আমা দিনুন্ ছাবা ধোক্ক্যেন্ যাদন্। 10 তারাত্তুন্ তুই শিক্ষ্যে আর সল্লা পেবে; তারা যিয়েন্ হবর্ পান্ সিয়েন্ তরে কবাক্। 11 পানি জাগা ন-অলে নলুন্ দাঙর্ ওই ন-পারন্; পানি ন-পেলে খাগ্ড়া দুবোগুন্ দাঙর্ ওই ন-পারন্। 12 দাঙর্ অবার্ অক্তত্ যেক্কেনে সিগুনোরে কাবা ন-অয়, সেক্কেনে পানি ন-পেলে সিয়েনি ঘাসত্তুন্ বেশ্ যাদিমাদি শুগেই যায়। 13 যিগুনে গোজেনরে ভুলি যান্ তারার্ দজাগান সেধোক্ক্যেন্ অয়; গোজেন উগুরে ভক্তিনেইয়্যেগুনোর্ আজাগান্ সেধোক্ক্যেন্ গুরিনে ভস্ত অয়। 14 যিবে উগুরে তে বিশ্বেজ্ গরে সিবে দরমর নয়, সিয়েন্ বানা মাগরগর্ জাল্। 15 তে যুনি তা উগুরে ভর্ দে সালে সিয়েন্ ভাঙি পুরিবো, যুনি তে সিয়েন্ আজাবোদে ধরে সালে সিয়েনে তারে ধুরি রাগেই ন-পারিবো। 16 তে যেন বেল পহ্রর্ ফোত্ফোত্যে এক্কো চারা, বাগান চেরোকিত্যে তা ডেলাগুন্ ছিদি যেইয়্যে। 17 কুড়েয়্যে পাত্তরর্ চেরোকিত্তে তা শিঙোরানি বেড়া যেইয়্যে; পাত্তর ভিদিরে তে এক্কো গম্ জাগা পেইয়্যে। 18 মাত্তর্ তা জাগানত্তুন্ যেক্কেনে তারে তুলি ফেলা অবঅ সেক্কেনে সে জাগায়ানে তারে অস্বীগের্ গুরিনে কবঅ, মুই তরে কনদিন্অ ন-দেগং। 19 চাহ্, সিয়েন্ বাদে তার্ আর কনঅ হুজি নেই; সে মাদিগানত্ অন্য চারা উদিবাক্। 20 “নিদ্দুযি মান্জ্যরে গোজেনে কনদিন্অ ছাড়ি ন-যায় বা যিগুনে বজঙ্ কাম্ গরন্ তারার্ আঢ্তানি নরম্ গরে। 21 ইক্কিনিয়ো তঅ মুয়োন্ তে আজিলোই ভরেই দিবো আর তরে হুজিলোই ভর্পুনোং গুরিবো। 22 যিগুনে তরে ঘিনান্ তারা লাজেবাক্; শদানুনোর্ থেবার্ ঘর্ আর ন-থেবঅ।” |
Copyright © 2021 Bangladesh Bible Society
Bangladesh Bible Society