ইয়োব 7 - Chakma Bible1 এ পিত্থিমীত মানজ্যত্তুন্ দরমর কাম্ গরা পরে, তে মজুরো ধোক্ক্যেন্ দিন কাদায়। 2 চাগর্বো যেধোক্ক্যেন্ সাজোন্যে মাদানত্তে বাজ্জেই থায়, চাগর্বো যেধোক্ক্যেন্ তা বেতনত্তে আজা গুরি থায়, 3 সেধোক্ক্যেন্ গুরিনে মাসর্ পর্ মাস কুসাৎ মঅ ভাগত্ পোজ্যে; মুই রেত্কে রেত্ বানা দুঘ্ পেইয়োং। 4 ঘুমোত্ পুরিবার্ অক্তত্ চিদে গরং, মুই কক্কে উদিম্? মাত্তর্ রেত্ দাঙর্ অয়, আর মুই বেন্যেমাদান্ সং ইন্দি-উন্দি গরং। 5 পুগে আর মাদিলোই মঅ কিয়্যেগান্ ঢাগা যেইয়্যে; মঅ চামান্ ফাদি যেইয়্যে আর পুজ্ পোজ্যে। 6 মঅ দিনুন্ তাত্ বুনিয়্যের্ আঢত্তুন্ বেশ্ যাদিমাদি চলের্; কনঅ আজা নেইয়্যে গুরিনে সিগুন্ থুম্ ওই যাদন্। 7 ও গোজেন, ইদোত্ রাগা, মঅ জিংকানিগান্ এক্কো নিজেস্ বাদে আর কিচ্ছু নয়; মুই দঅ আর সুগোর্ মু ন-দেগিম্। 8 তঅ চোখ্কুনে আর মরে ন-দেগিবাক্; তুই মরে তোগেবে, মাত্তর্ মুই আর ন-থেম্। 9 মেঘ যেধোক্ক্যেন্ ন-দেখ্যে গুরিনে যায়ই, সেধোক্ক্যেন্ যে মরাজাগানত্ যায় তে আর ফিরি ন-এজে। 10 তে তার ঘরত্ আর ফিরি ন-এবঅ; তা জাগায়ানেয়ো তারে আর ইদোত্ ন-রাগেব। 11 সেনত্তে মুই আর্ জুরো গুরি ন-থেম্। মঅ মনত্ দুঘ্খো গুরিনে মুই কধা কোম্; মঅ তিদে পরাণে মুই তইদু দুঘ্খানি ফগদাঙ্ গুরিম্। 12 মুই কি সাগর্ নাহি সাগরর্ পান্যে-দেবেদা, তুই মরে চুগি দিইনে রাগেয়োচ্? 13 যেক্কেনে চিদে গরং মঅ বিচ্ছোনানে মরে বুঝেব আর মঅ ঘুমানে মঅ দুঘ্কান কাদেব, 14 সেক্কে তুই নানান্ বাবোত্যে স্ববন্ দেগেইনে মরে দর্বুক্ লাগেবে, নানান্ বাবোত্যে জ্ঞান্ দিইনে মরে অককদ দর্বুক্ লাগেই দে। 15 সেক্কেনে এ কংকাল কিয়্যেলোই বাঁজি থানাত্তুন্ যে কনজনে মরে নিজেস্ বন্ধ গুরিনে মরে মারে ফেলোক্ সিয়েনই মুই চাং। 16 মঅ পরাণানরে মুই ঘিনাং; মুই দঅ উমরত্যে বাঁজি থেবাত্তে ন-চাং। মরে ইরি দুয়ো; মঅ আয়ুগান দঅ বেশ্ নয়। 17 “মানুচ্ কিবাবোত্যে, তারে তুই এদক্ দাম্ দুয়োচ্, আর তা উগুরে তুই এদক্ মনযোগ্ দুয়োচ্, 18 পত্তিদিন বেন্যেমাদান্ তুই তারে তগাজ্, আর আমিঝে তারে তুই জগা চাজ্? 19 মইন্দিত্তুন্ কি তঅ চোখ্কুন ন-ফিরেবে, বা ঢুব্ গিলিবার্অ কি মরে সময় ন-দিবে? 20 ও মান্জ্যর চুগিদার, মুই যুনি পাপ গুরিই থাং সালে সেক্কে তর্ কি? তুই কিত্তে মরে তঅ সেল্লোলোই তাক্কোচ্? মুই কি তর্ চোগোচাল্ ওইয়োং? 21 কিত্তে তুই মঅ দুজ্ছান আর মঅ পাপ্পানি খেমা ন-গরচ্? মত্তুন্ দঅ যাদিমাদি মাদিত্ ঘুম্ যাহ্ পুরিবো; তুই মরে তোগেবে, মাত্তর্ মুই ন-থেম্।” |
Copyright © 2021 Bangladesh Bible Society
Bangladesh Bible Society