ইয়োব 41 - Chakma Bible

¹ তুই কি বুজ্জিলোই গাধেনে লিবিয়াথনরে টানি আনি পারচ্, বা দুড়িলোই তা জিলান্ বানি পারচ্?

² তুই কি তার্ নাগ ভিদিরেদি নল দুড়গানি দি পারচ্, বা বুজ্জিলোই তা মাড়িগান ফুড়ি দি পারচ্?

³ তে কি তর্ দোয়্যে-মেয়্যে চেবঅ? তে কি তঅ লগে নরম্ নরম্ কধা কবঅ?

⁴ জিংকানিবর্ তারে তর্ চাগর্ ইজেবে রাগেবাত্তে তে কি তঅ লগে কনঅ চুক্তি গুরিবো?

⁵ পেগো সমারে যেধোক্ক্যেন খেলা গরে সেধোক্ক্যেন কি তুই তা সমারে খেলা গুরিবে বা তঅ ঝিগুনোরে খেলিবাত্তে তারে বানি রাগেই পারিবে?

⁶ জাল্যেগুনে কি তাত্তেই দর্ মুলোমুলি গুরিবাক্? বেবসায়িগুনো ভিদিরে কি তারে ভাগ্ গরা অবঅ?

⁷ তুই কি তা চামাড়াগান যাদিলোই বা তা মাঢাবো মাছ যাদিলোই ফুদে দি পারচ্?

⁸ তুই যুনি তারে ধুরিবাত্তে যাচ্ সালে যে যুদ্ধোগান অবঅ সিয়েন তুই কনদিন্‌অ ভুলি ন-যেবে; তুই আর্ কনদিন্‌অ সিয়েন গুরিবাত্তে ন-যেবে।

⁹ তারে দোঙেবার বেক্ আজাগানি মিথ্যে; তারে দেগানার লগে লগে মানুচ্চুনে সাহস আরান্।

¹⁰ তারে জাগেই পারন্ এবাবোত্যে সাহসী কনজন নেই; সালে মঅ মুজুঙোত্ কন্না থিয়্যেই পারে?

¹¹ মঅ বিরুদ্ধে কার্ দাবি আঘে, তা দাবিগান মত্তুন্ মানা পুরিবো? আগাজর্ তলেন্দি যিয়েনি আঘে বেক্কানি দঅ মর্।

¹² “লিবিয়াথনর কিয়্যের্ গঠনর্ কধানি মুই কোম্, তা বলান্ আর তা কিয়্যের্ গঠনর্ কধানি কোম্।

¹³ তা কিয়্যের্ চামানি কন্না খুলি দি পারে? কন্না তার্ দাদঅ সিলুম্মো ফাদি দি পারে?

¹⁴ তার্ দর্‌গরেপারা দাদে ঘিজ্যে মুয়ো দোরানে কন্না খুলিবাত্তে সাহস গুরিবো?

¹⁵ তার্ পিদ্‌তান আশ্‌ছানি ঢাল সুরো ধোক্ক্যেন; সিয়েনি দরমর গুরি একসমারে আকসোয়ে

¹⁶ আর এমন্ গুরিনে কুরোকুজ্যে আঘে, সিয়েনির ভিদিরেদি বোইয়্যেরঅ যেই ন-পারে।

¹⁷ সিয়েনি এক্কান সমারে আর এক্কান যদাযোজ্যে ওই আঘে; সিয়েনি একসমারে বাচ্চ্যে আঘে, ফারগ্ গরা ন-যায়।

¹⁸ তা আজিলোই পহ্‌রানে নিগিলি এজে; তা চোগ্ দ্বিবে বেন্যেমাদান্ জোল্‌জোল্যে পহর্ ধোক্ক্যেন।

¹⁹ তা মুয়োত্তুন্ আগুনো জিল্ নিগিলি এজে; সিয়েনত্তুন আগুনো ফুল্‌কি নিগিলে।

²⁰ নল-খাগাড়ার আগুনে গরম পিলেত্তুন যেধোক্ক্যেন ধূমো নিগিলে সেধোক্ক্যেন ধূমো নিগিলে তা নাগত্তুন।

²¹ তা নিজেসে আঙারা জুলি উদোন্ আর মুয়োত্তুন আগুনো জিল্ নিগিলে।

²² তা গত্তনাত্ বল্ থায়; অমকদ দর্‌বুক্কান তা আগে আগে যায়।

²³ তার্ কিয়্যের্ য়েরানি দরমর গুরি জোড়া লাগেয়্যে; সিয়েনি দরমরগুরি থায়, ন-লড়ে।

²⁴ তা বুক্কো পাত্তর ধোক্ক্যেন দর, সিবে আংগুর মারেদে মিশিনো পাত্তর তলেদি গিরেবো ধোক্ক্যেন দর।

²⁵ তে উদিলে বোলীবন্ধগুনে দরান্; তারা দরে পিচ্ছোদি যান।

²⁶ লাম্বা ছুড়িলোই তারে আঘাত গুরিলেয়ো তার কিচ্ছু ন-অয়; যাদি, বল্লম বা চিগোন সেল্ মারিলেয়ো কিচ্ছু ন-অয়।

²⁷ তে লুয়োরে তুস্ মনে গরে আর পিদোলরে মনে গরে পচা তক্তা ধোক্ক্যেন।

²⁸ কনঅ সেলে তারে ধাবেই দি ন-পারে; ফিংগার পাত্তরুন তাইদু যেন তুজো ধোক্ক্যেন।

²⁹ গদা তাইদু এক কট্টা তক্তা ধোক্ক্যেন; যাদি রবোলোই তে আজে।

³⁰ সিবের্ তলেদিগান ভাঙা মাত্যে পিলে ধারেয়্যে কট্টা ধোক্ক্যেন; সেনত্তে শোজ্য মাড়েদে মেশিনো ধোক্ক্যেন সিয়েনে মাদি উগুরে দাগ টানি যায়।

³¹ পিলেত্ ফুদেয়্যে পানি ধোক্ক্যেন তে সাগরানরে উলোত্ পালত্ গরে আর বড়গাঙানরে মলম ধোক্ক্যেন গরে।

³² এক্কান জোল্‌জোল্যে দাগ্ তে তা পিজেদি ফেলে যায়; সিয়েন চাদে পাগানা চুলো ধোক্ক্যেন মনে অয়।

³³ পিত্‌থিমীর কনঅ কিজু তার সং সং নয়; তারে ন-দোরেয়্যে গুরিনে বানা ওইয়্যে।

³⁴ বার্‌বো গোজ্যে গুরি বেক্কুনোরে তে বেঙা চোগেদি চায়; তে বেক্ বার্‌বো গোজ্যেগুনোর রাজা।”