ইয়োব 39 - Chakma Bible

¹ ঝার্‌বো ছাগলে কক্কে ছঅ ফুদোয় সিয়েন কি তুই হবর্ পাচ্? উরিঙে ছঅ ফুদোদে কি তুই কনদিন্‌অ দেখ্যচ্?

² তারার ছঅগুন পেদ ভিদিরে কয়দিন থান্ সিয়েন কি তুই গুণ্যচ্? তারার ফুদেবার সময়ান কি তুই হবর্ পাজ্?

³ তারা তলেদি মু গুরিনে ছঅ ফুদোন্ আর তারার পুয়ো ফুদোনার পীড়েগান কুমি যায়।

⁴ তারার ছঅগুনে দাঙর্ অন্ আর মাদত্ বোলী ওই উদোন্; তারা মাবোরে ছাড়ি যান্, আর ফিরি ন-এজন্।

⁵ ঝার্‌বো গাধাবোরে কন্না ফ্রি গুরিনে আদাউদো গুরিবাত্তে দিয়্যে? কন্না তার্ দুড়ি বান্যেগানি খুলি দিয়্যে?

⁶ তা ঘরানত্তে মুই ধূল্যেচরর্ চাগালাগানি দুয়োং, তা থেবার জাগানত্তে দুয়োং নুনো জাগায়ান্।

⁷ তে শঅরর্ কাঙেলেত্যেনি ঘিনেই, গাড়ি চালেয়্যেগুনোর রঅগুন্ তা কানত্ ন-এজে।

⁸ তার্ চড়িবার জাগায়ান অলদে মুড়োমুড়ি চাগালা; তে সিদু নানান্ বাবোত্যে এ্যাল্ এ্যাল্ ঘাস্‌ছানি তগায়।

⁹ ঝার্‌বো বলদ গোরুবো কি তর্ কামানি গত্তে রাজি অবঅ? রেদোত্ তে কি তর্ গোরুগুরোগান পিয়োঙ কুরে থেবঅ?

¹⁰ চাষ্ গরেদে ভূইয়োত্ কি তুই তারে জুঙলর্ দুড়িলোই বানি পারিবে? তে কি তত্তেই কিজিঙোত্ চাষ্ গুরিবো?

¹¹ তার্ অমকদ বলানত্তে কি তা উগুরে তুই বিশ্বেজ্ গুরিবে? তর্ গুয়োর্ কামানি কি তুই তারে গুরিবাত্তে দিবে?

¹² তে যে তর্ ফসলানি ঘরত্ আনিনে খামারত্ থুবেব সেই বিশ্বেজ্‌চান কি তুই তা উগুরে গুরি পারিবে?

¹³ উটপেক্কো জোরে জোরে ডুয়োনি লাড়াই, মাত্তর্ সারস পেগোর্ ডুয়োনি আর পোরানি সমারে সিয়েনর তুলনা ন-অয়।

¹⁴ উটপেক্কো মাদিত্ বদা পাড়ে আর ধূল্যেত্ সিগুনোরে উমুম্ অবাত্তে দে;

¹⁵ তার মনত্অ ন-থায় যে, সিগুন্ টেঙোই ভাঙি যেই পারন্ বা কনঅ ঝাড়্‌বো য়েমানে সিগুন টেঙোই ভাঙি দি পারন্।

¹⁶ তা ছঅগুনো সমারে তে চিৎনপুজ্যে বেবহার গরে, যেনে সিগুন তার্ নইদে ধোক্ক্যেন; তে চিদেয়ো ন-গরে, তার বেক্ কামানি পানিত্ ভাজি যেই পারে,

¹⁷ কিত্যে গোজেনে তারে জ্ঞান ন-দে বা বুঝিবার জ্ঞানান্অ ন-দে।

¹⁸ তো তে যেক্কেনে ডুয়োগান লাড়াই সেক্কেনে ঘোড়া আর তার্ মাউত্তোরে তে আজি আজি উড়েই দে।

¹⁹ ঘোড়াবোরে কি তুই বল্ দুয়োচ্? তা গত্তনাবোত্ কি দোল্ কেশ্ দুয়োচ্?

²⁰ ফিরিঙো ধোক্ক্যেন গুরি তুই কি তারে লাফ্ দেনা বাজে দি পাজ্যচ্? তা নাগ রঅবোলোই অমকদ দর্ বুগ্ লাগায়।

²¹ তে জোরে জোরে টেঙানি ঘুজিনে নিজো বল্লোই রঙ্গ ফুত্তি গরে আর যুদ্ধোত্ আক্রমণ গুরিবাত্তে যায়।

²² তে দরানরে দেগিনে আজে, কিচ্ছু ন-দরায়; তলোয়ার মুজুঙোত্তুন তে সুরি ন-যায়।

²³ তা কিয়্যের্ কায়-কুরে সেল্ রাগেবার জাগাবো দুগুরি উদে, আর ঝিক্ ঝিক্ ওই উদোন্ ঝাদি আর বল্লমুন।

²⁴ তে উত্তেজনায় গির্‌গিরাদে গির্‌গিরাদে ধাবা যায়; তূরী বাজেইলে তে আর্ থির্ গুরি থেই ন-পারে।

²⁵ তূরীর রঅবোর্ সমারে সমারে তে নাগেদি রঅ গরে; তে দূরোত্তুন্ যুদ্ধোর বাজ্ পায় আর সেনাপতিগুনোর রঅ ছাড়ানা আহ্ যুদ্ধোর রঅ শুনে।

²⁶ “তঅ বুদ্ধিলোই কি বাজ্ পেক্কো উড়ে আর দোগিণোদি যেবাত্তে ডুয়োনি মিলি দিয়্যে?

²⁷ তর্ উগুমে কি ঈগল পেক্কুনে উগুরেদি উড়োন্ আর অজল জাগাত্ নিজোর্ বাসা বানন্?

²⁸ তে অজল মুড়ো উগুরে বজত্তি গরে, আর রেদোত্ বেগ উগুরে থায়; সেই বেগ উগুরে তার ঘরান্।

²⁹ সিয়েনত্ থেইনে তে হানা তগায়; তা চোগ্‌কুনে দূরোত্তুন তার্ শিগেরুন দেগন্।

³⁰ তা ছঅগুনে পেটভরে সং লো খান্; যিয়েনত্ মরা থান্ সিয়েনত্ তারে দেগা যায়।”