ইয়োব 38 - Chakma Bible

লগেপ্রভুর কধা

¹ সেক্কে লগেপ্রভু ঝড়র্ মাধ্যমে ইয়োবরে জোব্ দিলো। তে কলঅ,

² ইবে কন্না, যে জ্ঞাননেইয়্যে কধালোই মর্ সল্লাগানরে সন্দেহ গরে?

³ তুই বীরো ধোক্ক্যেন কমর্ বান্; মুই তরে প্রশ্ন পুযোর্ গুরিম আর তুই মরে জোব্ দিবে।

⁴ মুই পিত্‌থিমীর গড়াগান থিদেবর্ গুরিবার অক্তত্ তুই কুদু এলে? যুনি তর্ বুদ্ধি থায় সালে কঅ।

⁵ তুই কি হবর্ পাচ্ কন্না তার পরিমাণান্ ঠিগ্ গোজ্যে? কন্না তা উগুরে মাবেদে দুড়িগান্ ধোজ্যে?

⁶ কিয়্য উগুরে পিত্‌থিমীর খুদোগুন থিদেবর্ গরা ওইয়্যে? আর তা কুণো পাত্তর্‌‌বো বা কন্না থিদেবর্ গোজ্যে?

⁷ সেক্কে দঅ পোত্য আমল্যে তারাগুনে এক সমারে গান গেইয়োন আর স্বর্গদূত্‌তুনে বেক্কুনে হুজিয়ে রঅ ছাড়ি উঠ্যন্।

⁸ যেক্কেনে পিত্‌থিমীর পেদত্তুন বড় গাঙান্ নিগিলি এচ্চ্যে সেক্কেনে কন্না তারে দোরান্দোই বন্ধ গোজ্যে?

⁹ সেক্কেনে মুই মেঘ্‌কানরে তা পজাক্ বানেয়োং, আর তারে ঘুর্‌গুজ্যে আন্ধারত্ মিলেই দুয়োং।

¹⁰ মুই তা দুযিগান ঠিগ্ গুরি দুয়োং; তার দোরান্ আর আগলান মুই থিদেবর্ গোজ্যন।

¹¹ মুই কোইয়োংগে; ইদ্দুর্ সং, আর নয়; ইয়েনত্ তর্ তুবোলুনোরে থামা পুরিবো।

¹² তুই কি কনদিন্‌অ বেন্যেমানান্নোরে উগুম্ দুয়োচ্ বা বেন্যেপোত্যেগানরে তা পথ্‌তান্ দেগেই দুয়োচ্,

¹³ যেনে সিয়েনে পিত্‌থিমীগানর দুযিগান ধরে শদানুনোরে সিয়েনত্তুন ঝাড়ি ফেলেই পারে?

¹⁴ মাদিত্ সীলমহর্ মারিলে যেধোক্ক্যেন সিয়েন গমেডালে দেগা যায়, সেধোক্ক্যেন দিনো পহ্‌রানে মুড়ো-মুড়িগুনোরে পোজাগর্ ভাজ্ ধোক্ক্যেন গমেডালে দেগা যায়।

¹⁵ শদানুনোর পহ্‌রানি মারে ফেলেই দিয়্যে অয়, আর তারার্ তুল্যে আঢ্‌তানি ভাঙি দিয়্যে অয়।

¹⁶ বড়গাঙর্ জর্মেয়্যে জাগানত্ কি তুই যেইয়োচ্ বা সাগর তলাত্ আট্যচ্?

¹⁷ মরণর জাগান গেট্টো কি তরে দেগা ওইয়্যে? সে আন্ধার্ জাগানর দোরান্ কি তুই দেখ্যচ্?

¹⁸ পিত্‌থিমীগান কত্তমান দাঙর্ সিয়েন কি তুই আন্দাজ্ গুরি পাজ্যস্? যুনি তুই ইয়েনি হবর্ পাচ্ সালে কঅ।

¹⁹ পহর্ থাইদে জাগানত্ যেবার পথ্‌তান্ কুদু? আর আন্ধারানে বা কুদু থায়?

²⁰ তুই কি তারার থেবার জাগানত্ তারারে নেযেই পারচ্? তারার ঘরত্ যেবার পথ্‌তান্ কি তুই হবর্ পাচ্?

²¹ হামাক্কাই হবর্ পাচ্, সেক্কেনে দঅ তর্ জর্ম ওইয়্যে। তর্ দঅ বোউত্ বয়স ওইয়্যে।

²² তুই কি তুষার ভান্ডালত্ চোমেয়োচ্ বা শিলোর কুড়্ দেখ্যচ্?

²³ সিয়েনি মুই দুঘো দিনুনোত্তে থুবেই রাগেয়োং, থুবেই রাগেয়োং যুদ্ধো আর লাড়ে বাজেবার দিনুনোত্তে।

²⁴ যে জাগানত্তুন্ পহরান্ ছিদি পড়ে, বা যিয়েনত্তুন পিত্‌থিমীত্ পূগো বোইয়্যের্ ছিদি পড়ে সে জাগায়ান কুদু?

²⁵ অমকদ ঝড় এবাত্তে আর দেবা পেরাগ্ আহ্ ঝড়ত্তে কন্না পথ গোজ্যে,

²⁶ যেনে মানুচ্ নেইয়্যে জাগানিয়ে পানি পায়, পানি পায় ধূল্যেচর চাগালাগানে যিয়েনত্ কনজনে বজত্তি ন-গরন;

²⁷ যেনে মানুচ্‌জন নেইয়্যে পুজ্যে জাগানি শুগুনো অয়, আর সিয়েনত্ ঘাস উদি পারে?

²⁸ ঝড়র্ কি বাপ্ আঘে? কন্না শিরোপানি ফুদোগুনোর জর্ম দিয়্যে?

²⁹ কা পেদত্তুন্ বরফ্ এজে? আগাজত্তুন যে হিম পড়ে সিয়েনির জর্ম বা কন্না দিয়্যে?

³⁰ পানি জোমেইনে পাত্তর ধোক্ক্যেন ওই যায়, আর সাগর উগুরেন্দিগান জুমি যায়।

³¹ তুই কি কৃত্তিকা নাঙে তারাগুনোরে বানি পারচ্? কালপুরুষ নাঙে তারাগুনোর বানানি খুলি দি পারচ্?

³² তুই কি তারাগুনোরে তারার্ ঋতু অনুসারে নিগিলেই আনি পারচ্, বা সপ্তর্ষি আর তার ঝি-পুয়োগুনোরে পথ দেগেই পারচ্?

³³ আগাজর রীদি-সুদোম কি তুই হবর্ পাজ্? পিত্‌থিমীত্ কি সেই রীদি-সুদোমানি থিদেবর্ গুরি পারচ্?

³⁴ তুই কি মেঘ সং তঅ রঅবোরে তুলি পারচ্ যেনে বোউত্ পানিয়ে তরে ঢাগি দি পারে?

³⁵ তুই কি ঝিমিলেনিগানরে তা পথ্‌তানদি পাধেই পারচ্? তে কি তরে কবঅ, এইয়্যে দঅ মুই?

³⁶ কন্না মনানরে জ্ঞান দিইনে সাজেয়্যে, বা মনানরে বুঝেবার বলান্ দিয়্যে?

³⁷ মেঘ্‌কানিরে গুণিনে চেবার্ বলান্ কার্ আঘে? আগাজর্ পানিগান কুম্মো কন্না উল্লেই পারে,

³⁸ যেনে ধূল্যেকণাগুন গুলিনে একসমারে মিজেই যান্ আর মাদিগানি ফুদ্ ওই যায়?

^39-40 যেক্কেনে সিংহগুনে গাদঅ ভিদিরে পড়ি থান্ বা ঘুর্‌গুজ্যে ঝুবো আন্দলে উৎ পাদি থান্, সেক্কেনে সিংহিবোত্তে কি তুই শিগের্ তগাজ্ আর পেত্পড়া অক্তত্ সিংহবোরে হানা দুয়োচ্?

⁴¹ সারাল্যে কবাগুনোর্ ছঅগুনে যেক্কে গোজেন ইদু কানন্ আর হানার্ অভাবে ইন্দি-উন্দি ঘুরোন্, সেক্কেনে কন্না তারারে হানা যোগেব?