ইয়োব 37 - Chakma Bible

¹ ইয়েন্দোই মুই দরে গির্‌গিরাঙর্ আর মঅ মনান্ ধুক্ ধুক্ গরের্।

² শুনো, শুনো তার গুজুরোনির রবো; তা মুয়োত্তুন্ যে রবো এজের্ সিবে শুনো।

³ গোদা পিত্‌থিমীগান তলে আর পিত্‌থিমীর শেষ দুযিত্ তা ঝিমিলেনিগানরে তে পাধেই দে।

⁴ সে পরেদি তা গুজুরোনির রবো এজে; তা দাঙর্ রবোলোই তে গুজুরে। যেক্কেনে তা রবো শুনো যায় সেক্কেনে ঝিমিলেনিগানরে তে থামেই ন-রাগাই।

⁵ গোজেনে আমক্ অইদে ধোক্ক্যেন্ গুরিনে গুজুরে; তে এন্ মহৎ মহৎ কাম গরে যিয়েনি আমি বুঝি ন-পারিই।

⁶ তে তুষারানরে কইদ্যে, পিত্‌থিমীত্ পড়, আর ঝড়ানরে কইদ্যে, মাদিত্ পড়।

⁷ পত্তি মান্‌জ্যরে তা কামত্তুন্ তে থামেই দে, যেনে বেক্ মানুচ্চুনে তা কাম পৌইদ্যেনে হবর্ পান।

⁸ সেক্কেনে য়েমানুনে আশ্রয় নেযান; তারা তারার গাদ্‌তুনোত্ চমান্।

⁹ ঝড়ানে তা ঘরত্তুন্ নিগিলে এজে, বোইয়্যেরানে ঠান্ডা বুয়োই আনে।

¹⁰ গোজেনর নিজেশ্বত্তুন্ বরফ্ জর্মায় আর পানি জমা অয়।

¹¹ তে ঘন মেঘচাগত্ পানি ভরায়; তা ঝিমিলেনিগানরে তে মেঘ ভিদিরেদি ছিদি দে।

¹² তা উগুমে মেঘছাগকুন্ ঘুরি বেড়ান, তা উগুমানি পালেবাত্তে তারা গোদা দুনিয়াগানত্ ঘুরোন্।

¹³ মান্‌জ্যরে সাজা দিবাত্তে, বা তার্ পিত্‌থিমীগানরে পানি দিবাত্তে, বা তার্ কোচ্‌পানা দেগেবাত্তে তে ঝড় আনি দে।

¹⁴ ইয়োব, তুই এ কধাগান শুন; থির্ ওইনে গোজেনর আমক্ অইদে কাম কধানি চিদে গর্।

¹⁵ তুই কি হবর্ পাচ্ কেধোক্ক্যেন গুরিনে গোজেনে মেঘ্‌কানরে দোঙে রাগাই আর তার্ ঝিমিলেনিগানরে জুলিবাত্তে দে?

¹⁶ তুই কি হবর্ পাচ্ কেধোক্ক্যেন গুরিনে মেঘ্‌কানিয়ে দুলো দুলো গুরি থায়? যিবে জ্ঞানে ভরপুর্ তার আমক্ অইদে কামানি কি তুই হবর্ পাচ্?

¹⁷ দোগিণো বোইয়্যেরে যেক্কে দেজ্‌ছান জুরো ওই যায় সেক্কে তুই দঅ তর্ কাবড়-চুগোরানিলোই উমুম্ মনে গরচ্।

¹⁸ ছাজিনে ঢাল্যে আনা ধোক্ক্যেন দরমর যে আগাজ্‌ছান সিয়েন কি তুই গোজেনর সমারে বিজেয়োজ্?

¹⁹ “তারে কি কুয়া পুরিবো সিয়েন তুই আমারে কঅ; আমি জ্ঞানবলা নয় বিলিনে তারে আমা কধানি জানেই ন-পারিই।

²⁰ তারে কি কুয়া পুরিবো, মুই কধা কবাত্তে চাং? কনঅ মানুচ্ কি চেবঅ, তারে গিলে ওক্?

²¹ বোইয়্যেরে আগাজ্‌ছান সাব্ ওইনে যেক্কে বেলান্ দোক্‌দোক্যে অয় সেক্কেনে তান্দি কনজনে চেই ন-পারন্।

²² উত্তোরেন্দিত্তুন সোনা রঙর্ দোক্‌দোক্যে গুরি এজে; তার চেরোকিত্তে দর্ বুক্ লাগেদে ধোক্ক্যেন মহিমাগান্ দেগা যায়।

²³ বেগত্তুন্ খেমতাবলা গোজেনে আমা নাগালর বারেদি আর খেমতান্দি বোউত্ দাঙর্; তার ন্যায়বিচের্ আর সততার কারনে তে অত্যেচার ন-গরে।

²⁴ ইয়েনত্তে মান্‌জ্যে তারে ভোক্তি গুরিনে দরান্; যিগুনে নিজোরে জ্ঞানি মনে গরন তারান্দি তে কনঅ নজর্ ন-দে।”