ইয়োব 36 - Chakma Bible

¹ ইলীহূ আরঅ কোইয়্যেদে,

² গোজেনর তপ্পে মর্ আরঅ কিজু কবার্ আঘে; মঅ উগুরে আর এক্কানা ধৈয্য ধর্, মুই তরে বুঝেই দুয়োঙর্।

³ মুই বোউত্ দূরোত্তুন জ্ঞান লাভ গোজ্যং; মঅ সৃট্টিগুরিয়্যেবো যে ন্যায়বলা সিয়েন মুই ফগদাং গুরিম।

⁴ মুই সত্য গুরি কঙত্তে, মঅ কধাগান মিজে নয়; জ্ঞানে ভর্‌পুণোং একজনে তঅ সমারে আঘে।

⁵ গোজেনে খেমতাবলা, মাত্তর্ মান্‌জ্যরে তুচ্ছো ন-গরে; তে খেমতাবলা আর তা উদ্দেশ্যগান মাবর্।

⁶ তে শদানুনোরে বাঁজেই ন-রাগায় মাত্তর্ যিগুনে অত্যেচার ভোগ্ গত্তন্ তারারে গমেডালে বিচের্ গরে।

⁷ তে নিদ্দুযি মানুচ্চুনোত্তুন্ তা চোগ্‌কুন ফিরেই ন-নেযায়; তে রাজাগুনো সমারে তারারে বোজেই দে আর উমরত্তে তারারে সর্মান গরে।

⁸ মাত্তর্ মানুচ্চুনে যুনি পাপত্তে শিগোল্লোই বান্যে থান্, বান্যে থান্ যন্ত্রণার দুড়িলোই,

⁹ মাত্তর্ তারা যিয়েন গোজ্যন সিয়েনি তে তারারে দেগেই দে, দেগেই দুয়োন্দে, তারা বার্‌বো গুরিনে পাপ গোজ্যন।

¹⁰ তে তারার বুদুলিবাত্তে সল্লা দে আর ভান্ন্যেয়ত্তুন মনান ফিরেবাত্তে উগুম দে।

¹¹ যুনি তারা তার বাধ্য ওইনে তারে সেবা গরন্, সালে তারার বাদবাগি জিংকানিগান তারা গমেডালে কাদান্ আর বজরুন সুগেই কাদান্।

¹² মাত্তর্ যুনি তারা ন-শুনোন্, মাত্তর্ মরণর আঘাতে তারা ভস্ত অবাক্ আর বুদ্ধিনেইয়্যে অবস্থায় মুরি যেবাক্।

¹³ গোজেন উগুরে ভোক্তিনেইয়্যে মানুচ্চুনে রাগ জমা রাগান; তে বানিলেও তারা সাহায্যত্তে ন-ডাগন্।

¹⁴ গাবুরো অক্তত্ তারা মুরি যান, মুরি যান মন্দিরোর মরদ বেশ্যাগুনো ধোক্ক্যেন।

¹⁵ মাত্তর্ যিগুনে দুগ্ পান তারারে উদ্ধোর গুরিবাত্তে তে সেই দুঘকান্ বেবহার গরে, আর অত্যেচারর্ মাধ্যমে তারারে শিগায়।

¹⁶ দুগোর্ আধত্তুন তে তরে নিগিলেনেই আনিবাত্তে চায়; তে তরে এমন্ দাঙর্ জাগাত্ নেযেবাত্তে চায় যিয়েনত্ কনঅ মানা নেই। সিয়েনত্ তর্ টেবিলান দোল্ দোল্ হানালোই ভরা থেবঅ।

¹⁷ মাত্তর্ ইক্কিনে তুই শদানুনোর পাওনা সাজাগানি পত্তে, তুই সাজা আর ন্যায়বিচের ভোগ গরর্।

¹⁸ উজিয়ার থেবা যেনে তঅ রাগর্ কারনে তর্ ধন-সোম্বোত্তিগানিয়ে তরে ভান্ন্যেই পধেদি ন-নেযায়; যে দাঙর্ মাসুল তুই দুয়োচ্ সিয়েনে যেন তরে ভান্ন্যেই পধেদি ন-নেযায়।

¹⁹ তর্ ধন-সোম্বোত্তিগানি বা তর্ বেক্ খেমতাগানিয়ে কি তরে দুগোত্তুন রোক্ষ্যে গুরি পারে?

²⁰ তুই সে রেত্তোর্ আজা ন-গুরিবে যে অক্তত্ মান্‌জ্যে মুরি যান।

²¹ উজিয়ার অ, ভান্ন্যেয়দি ন-ফিরিবে, কিত্যে দুঘ্ পানাত্তুন ভান্ন্যেয়ান তইদু প্রিয়।

²² গোজেনে খেমতা গানদি দাঙর্। তা ধোক্ক্যেন্ মাষ্টর আর কন্না আঘে?

²³ কন্না তারে বুদুলি দি পারে বা তারে কোই পারন, তুই অন্যেই গোজ্যচ্?

²⁴ তা কামানি নাঙ্ গিনিবাত্যে ভুলি ন-যেবা; গানর মাধ্যমে দঅ মান্‌জ্যে তা কামর্ বাঈনী গোজ্যন্।

²⁵ বেক্ মানুচ্চুনে তা কামানি দেখ্যন, মাত্তর্ তারা সিয়েনি দূরোত্তুন দেখ্যন।

²⁶ গোজেনে যে কত্তমান্ দাঙর্ সিয়েন আমি বুঝিও ন-পারিই। তা বয়সছান কদক্ সিয়েন জানানা সম্ভব নয়।

²⁷ তে পানি ফুদোবো টানি নেযায়, সিয়েন বাষ্প অয় আর ঝড় ওইনে পড়ে।

²⁸ মেঘ্‌কানে সিয়েন ঢালি দে, আর মান্‌জ্য উগুরে বোউত্ ঝড় পড়ে।

²⁹ কন্না বুঝি পারে তে কেধোক্ক্যেন গুরিনে মেঘকান ছিদি দে? বা তার থেবার ঘরত্তুন্ মেঘঅ ধোক্ক্যেন রঅ গরে ?

³⁰ তে তার্ চেরোকিত্তে ঝিমিলেনি ছিদি দে আর বড় গাঙর্ তলাগান ঢাগি দে।

³¹ ইয়েনিলোই তে পুরো জাত্‌তুনোরে শাজন্ গরে আর বোউত্ হানা যোগেই দে।

³² তে তার আঢ্‌তোই কারেন্ট্ ধরে আর তার ঠিগ্ গোজ্যে জিনিসছানরে আঘাত গুরিবাত্তে উগুম দে।

³³ তা দেবাবোর গুজুরোনিগানে ঝড় এবার্ হবরান দে; য়েমানর পালুনেয়ো ঝড় পড়িবার হবরান জানান্।