ইয়োব 35 - Chakma Bible

¹ সে পরেদি ইলীহূ কলঅ,

² কধাগান কি তুই ঠিগ্ বিলিনে মনে গরচ্?

³ তুই তারে কোইয়োচ্, ইয়োত্ মর্ কি লাভ? পাপ ন-গুরিলে মুই কি পেম্?

⁴ “মুই তরে আর তঅ সমাজ্যেগুনোরে ইয়েনর জোব্‌পান দিবাত্তে চাং।

⁵ আগাজ ইন্দি একপল্লা রিনি চাহ্; চাহ্, মেঘকান কদক্ উগুরে আঘে।

⁶ তুই যুনি পাপ গরচ্ সালে গোজেনর কি অয়? তর্ অন্যেয়ানি যুনি ভুরি ভুরি জমা অয় সেক্কেনে বা তার কি মাধা গামানা?

⁷ তুই যুনি নিদ্দুযি অজ্ সালে তার কি উপকার অবঅ? তঅ আঢত্তুন্ তে কিচ্চু ন-চায়।

⁸ তর্ পাজিগানে বানা মান্‌জ্যর্ খেতি গরে, আর তর্ গম কামানিয়ে বানা তারারে সাহায্য গরে।

⁹ অত্যেচারর ভরে মান্‌জ্যে রঅ ছাড়ন্; তারা বোলীগুনোর আঢত্তুন্ রেহাই পেবাত্তে কোজোলী গরন।

¹⁰ মাত্তর্ কনজনে ন-কন্, ‘মরে বানেয়্যে গোজেনে কুদু, যিবে রেদোত্ হুজির্ গান দান গরে?

¹¹ তে দঅ পিত্‌থিমীর এ্যমানুনোত্তুন্ বেশ্ আমারে শিক্ষ্যে দে আর আগাজ পেক্কুনোত্তুন্ বেশ্ জ্ঞান দান গরে।’

¹² মানুচ্চুনে যেক্কে কানন্ সেক্কে তে জোব্ ন-দে, কিত্যে তারা বাড়্‌‌বো আর পাজি।

¹³ তারার তবনালোই কনঅ লাভ ন-অয়, কিত্যে গোজেনে সিয়েন ন-শুনে; বেগত্তুন খেমতাবলা গোজেনে সিয়েন কনঅ মনযোগ্ ন-দে।

¹⁴ তুই কোইয়োচ্চে, তুই তারে ন-দেগচ্, তর্ মগদ্দমাগান তা মুজুঙোত্ আঘে, আর তুই তা বিচেরত্তে বাজ্জেই আগচ্।

¹⁵ তুই আরঅ কত্তে, তে রাগে সাজা ন-দে আর বজঙন্দি গমেডালে খিয়েল্ ন-গরে।

¹⁶ সেনত্তে ইয়োবে বাজে কধা কোইয়্যে, তে হবর্ ন-পেইনে বোউত্ কধা কোইয়্যে।”