ইয়োব 34 - Chakma Bible

¹ সে পরেদি ইলীহূ কলঅ,

² ও জ্ঞানী মানুচ্চুন, মঅ কধাগান শুনো; ও বুদ্ধিবলাগুন, মঅ কধানি কান দুয়ো।

³ জিলানে যেধোক্ক্যেন গুরি খাইদ্যে জিনিস্‌‌চানি সুয়োত্ পায় সেধোক্ক্যেন গুরি কানানে মান্‌জ্যর কধানি জগা চায়।

⁴ কুবোন্ ঠিগ্, এজঅ, আমি সিয়েন বিচের্ গুরি চেই; কুবোন্ গম্ আমি সিয়েন তোগেই চেই।

⁵ ইয়োবে কত্তে, মুই নিদ্দুযি, মাত্তর্ গোজেনে গমেডালে আমা বিচের ন-গরে।

⁶ মুই ঠিগ্ কধা কলেয়ো মরে মিজেকধা কোইয়্যে মনে গরা ওইয়্যে; দুষ্ নেইয়্যে গুরি মুই এন্ আঘাত্ পেইয়োং যিয়েন্ গম্ নয়।

⁷ ইয়োব ধোক্ক্যেন কনজন আগন যিবে পানি ধোক্ক্যেন গুরিনে ঠাট্টা-তামাজা হেইয়্যে?

⁸ যিগুনে বজং কাম গরন্ তে তারা লগে যায়; তে শদানুনোর্ সমাজ্যে অয়।

⁹ তে কলঅ, গোজেনরে হুজি গুরিনে মান্‌জ্যর্ কনঅ লাভ ন-অয়।

¹⁰ সেনত্তে ও বুদ্ধিবলা মানুচ্চুন, মঅ কধাগান শুনো। গোজেনে যে ভান্ন্যেই কাম গরে, বেগত্তুন খেমতাবলা গোজেনে যে অন্যেয় গরে সিয়েন্ দূরোত্ থোক্।

¹¹ তে মান্‌জ্যরে তা কামর্ ফল দে; তা আচার-বেবহার অনুসারে তে তার পাওনা দে।

¹² গোজেনে কনদিনঅ বজং কাম্ ন-গরে, বেগত্তুন খেমতাবলা গোজেনে কনদিন্‌অ উগুদো বিচের্ ন-গরে।

¹³ পিত্‌থিমীর ভারান্ কি কনজনে তারে দিয়্যে? পুরো দুনিয়্যেগানর দেগাশুনোর কামত্ কনজনে কি তারে লাগেয়্যে?

¹⁴ যুনি তে তা নিজোর কধা মনে গুরিদো আর তা আত্মাগান আহ্ নিজেস্‌চো নিজো ইদু ফিরেই নেযেদ,

¹⁵ সালে বেক্ মানুচ্চুনে একসমারে ভস্ত ওই যেদাক্, তারা আরঅ ধূল্যে ওই যেদাক্।

¹⁶ যুনি তমার বুদ্ধি থায় সালে এ কধাগান শুনো; মঅ কধানি কান দুয়ো।

¹⁷ যিবে ন্যায়বিচের ঘিনেই তে কি শাজন্ গুরি পারে? তুমি কি ন্যায়বলা আর খেমতাবলা গুনোরে দুষ্ দিবে?

¹⁸ তে দঅ রাজাগুনোরে কয়, তুমি অপদাত্ত, আর আজল মানুচ্চুনোরে কয়, তুমি পাজি।

¹⁹ তে শাজন্‌গুরিয়্যেগুনোর তপ্পে ন-লয়, নাঢা মানুচ্চুনোরে ফেলেইনে তাগোয়্যেগুনোরে দাঙর্ মনে ন-গরে, কিত্যে তারা বেক্কুনে তার্ আঢ্‌‌তোই বানেয়্যে।

²⁰ তারা অদাদত্ মুরি যান, মুরি যান রেদসম্বাগত্; তারারে লাড়েলে তারা ভস্ত অন্; কনজনে কিজু ন-গুরিলেয়ো বোলীগুনে মুরি যান।

²¹ মানুচ্চুনোর আদা-উদো গরানা উগুরে গোজেনর চোগ্ আঘে; তারার পত্তি পোইদ্যা তে দেগে।

²² এমন্ কনঅ আন্ধার জাগা বা ঘন ছাবা নেই যিয়েনত্ বজং কাম গোজ্যে মানুচ্চুনে পোইল্যে থেই পারন।

²³ মান্‌জ্যর বিচেরত্তে গোজেনর কনঅ উদো লবার্ দরকার নেই;

²⁴ পুযোর্ ন-গোজ্যে গুরিনে তে বোলীগুনোরে শেজ্ গরে আর তারার জাগানত্ অন্যগুনোরে বোজেই দে।

²⁵ তে তারার কামর্ ইজেব রাগায় বিলিনে রেদোত্ তে তারারে ভস্ত গুরি ফেলায় আর তারা শেজ্ ওই যান।

²⁶ তারার ভান্ন্যেই কামানিত্তে তে বেক্কুনো মুজুঙোত্ তারারে শাজা দে,

²⁷ কিত্যে তারা তা পধেদি আঢানা বাদ দুয়োন; তার কনঅ উগুমো উগুরে তারার খিয়েল্ নেই।

²⁸ তারার অত্যাচারত্তে নাঢা মানুচ্চুনোর কানানিগানি তা মুজুঙোত্ পড়ে; তে নাঢা মানুচ্চুনোর কানানিগানি শুনে।

²⁹ হামাক্কাই তে জুরো গুরি থেলেয়ো কনজনে তারে দুষি গুরি ন-পারন; তে মুয়োন লুগেলে কনজনে তারে ন-দেগে। তো তে মানুচ্ আর জাদ উগুরে আঘে,

³⁰ যেনে গোজেন উগুরে ভোক্তি নেইয়্যেগুনে রাজাগিরি গুরি ন-পারন আর মানুচ্চুনোরে ধুরিবাত্তে কাবুক্ ফাদি ন-পারন।

³¹ কনঅ মান্‌জ্যে দঅ গোজেনরে ন-কন্, মুই সাজা পেইয়োং, আর অন্যেয় ন-গুরিম;

³² মুই যিয়েন্ ন-দেগং সিয়েন মরে শিগা; যুনি মুই অন্যেয় গুরি থাং, সালে আর্ সিয়েন ন-গুরিম।

³³ তুই যেক্কে গোজেনরে এলাফেলা গোজ্যস্ সেক্কে গোজেনে কেধোক্ক্যেন গুরিনে তর্ আওজ্ মজিম বক্‌শিজ্ দিবো? মনান্ ঠিগ্ গরানা তর্ কাম, মর্ নয়; সেনত্তে তঅ মতামত্তান্ তুই ফগদাঙ্ গর্।

³⁴ “বুদ্ধিমান মানুচ্চুনে মরে কন্, জ্ঞানী মানুচ্চুনে মঅ কধাগান শুনিনে মরে কন্,

³⁵ ‘ইয়োবে জ্ঞাননেইয়্যে গুরি কধা কত্তে, তা কধানিত্ কনঅ বুদ্ধির পরিচয় নেই।’

³⁶ ইয়োবর পোরোক্ষ্যেগান পুরোপুরি অলে গম্, কিয়া তে পাজি মানুচ্চুনো ধোক্ক্যেন কধা কর্।

³⁷ তা পাপ্পান সমারে তে উল্লোমীগান মিজেয়্যে; তে আমা মুজুঙোত্ গোজেনরে অগমান গোজ্যে আর গোজেন বিরুদ্ধে বোউত্ কধা কোইয়্যে।”