ইয়োব 33 - Chakma Bible

¹ যাওক্, ইয়োব, এবেরা মঅ কধাগান শুন; মুই যিয়েন কোম্ সিয়েন্দোই মনান্ দে।

² মুই মুয়োন্ খুলিবাত্তে যাঙর্; মঅ কধাগান মর্ জিলান মাধাত্ এচ্চ্যে।

³ মঅ কধাগান খাটি মনানত্তুন্ এচ্চ্যে; মুই যিয়েন হবর্ পাং সিয়েন মঅ মুয়োনে গমেডালে কবঅ।

⁴ গোজেনর আত্মাগানে মরে বানেয়্যে; বেগত্তুন্ খেমতাবলা গোজেনর্ নিজেজে মুই জিংকানি পাঙর্।

⁵ তুই যুনি পারচ্ সালে মরে জোব্ দে; নিজো কধানি গুচ্চেইনে মল্লোই মুয়োমি অ।

⁶ গোজেনর মুজুঙোত্ তুই মুই সংসং; মরেয়ো মাদিলোই বানা ওইয়্যে।

⁷ মরে যেনে তুই ন-দরাচ্, বা মঅ কধানির ঠেলা যেনে তঅ উগুরে গুয়োর্ ন-অয়।

⁸ মাত্তর্ তুই মঅ মুজুঙোত্ কধা কোইয়োচ্; তুই যিয়েন কোইয়োচ্ ঠিগ্ সিয়েনই মুই শুন্যং;

⁹ তুই কোইয়োচ্ছে, মুই সিজি, মর্ কনঅ পাপ নেই; মুই খাটি, মর্ কনঅ দুষ্ নেই।

¹⁰ তো গোজেনে মঅ দুষ্‌চান তগা ধোজ্যে; তে মরে তা শত্রু মনে গোজ্যে।

¹¹ তে শিগোল্‌লোই মঅ টেঙান বান্যে; মঅ পুরো পথ্‌তান উগুরে তে কড়া নজর্ রাগেয়্যে।

¹² মাত্তর্ মুই তরে কঙ্, এ পৌইদ্যেনে তঅ কধাগান ঠিগ্ নয়, কিত্যে মান্‌জ্যত্তুন বেশ্ গোজেনে দাঙর্।

¹³ কিত্তেই তুই তারে এ আবিত্তিগান জানর্, মান্‌জ্যর্ কনঅ কধার্ জোব্ তে ন-দে?

¹⁴ আসলে গোজেনে নানান্ বাবোত্যে গুরিনে কধা কয় যুনিয়ো মান্‌জ্যে সিয়েনি বুঝি ন-পারন।

¹⁵ স্ববনত্, রেদোত্ দর্শনর মাধ্যমে, বিচ্ছোনত্ পুরিনে যেক্কেনে মান্‌জ্যর অমকদ ঘুমে ধরে,

¹⁶ সেক্কেনে তে তারার্ কানে কানে কধা কয় আহ্ উজিয়ার গুরিনে তারারে দর্ দেগায়,

¹⁷ যেনে মান্‌জ্যে তার অন্যেয় কামত্তুন্ ফিরোন আহ্ অহংকারত্তুন্ দূরোত্ থান।

¹⁸ তে এধোক্ক্যান গুরিনে ভস্ত জাগানত্তুন্ তা পরাণান, মরণর আঘাদত্তুন্ তা জিংকানিগান রোক্ষ্যে গরে।

¹⁹ মানুচ্ পীড়ের কারনে যন্ত্রণালোই শাজা পান; তা আরুনো ভিদিরে আমিঝা পীড়ে অয়।

²⁰ ইয়োত্ হানা-দানাত্ তার কাঙেলেত্যে লাগে, তে বেগত্তুন গম্ হানাগানঅ ঘিনেই।

²¹ তা কিয়্যেগানর য়েরানিয়ো এক্কুবারে ক্ষয় ওই যায়; সেক্কে য়েরা ভিদিরে আড়ুন নিগিলিবাক্।

²² তা পরাণান ভস্ত অইদ্যে জাগান ইদু লুম্মেগোই, তা জিংকানিগান মরণর দূততুনোর কায় অয়।

²³ যুনি এক্কো স্বর্গদূত তা পক্ষেন্দি থায়, আজার দূতো ভিদিরে এক্কো গমদূত্ থায় যিবে মান্‌জ্যরে কয় কুবোন্ তাত্তেই ঠিগ্,

²⁴ সালে তে তা উগুরে দয়্যেলু ওইনে হোক্, মরণর জাগাত লামে নেযানাত্তুন তারে বাদ দুয়ো; মুই তাত্তেই উদ্ধোর দাম পেইয়োং।

²⁵ সালে তা কিয়েগান আরঅ গাবুজ্য ধোক্ক্যেন্ অবঅ; তে আরঅ যৌবন ফিরি পেবঅ।

²⁶ তে গোজেন ইদু তবনা গুরিবো আহ্ তে তারে দোয়ে গুরিবো; তে গোজেন মুয়োন দেগিনে হুজিয়ে রঅ ছারি উদিবো; গোজেনে তারে তার নিদ্দুযি অবস্থাত্ ফিরি আনিবো।

²⁷ তে সেক্কেনে মান্‌জ্য ইদু এইনে কবঅ, মুই পাপ গোজ্যং আর যিয়েন ঠিগ্ সিয়েনর্ উগুদো গোজ্যং, মাত্তর্ মর্ পাইদে সাজাগান্ মুই ন-পাং।

²⁸ মরণর জাগাত্ লামানার আধত্তুন তে মঅ পরাণান মুক্তো গোজ্যে; মুই পহর্ দেগঙর্।

²⁹ গোজেনে মান্‌জ্যত্তে বার বার ইয়েনি গরে,

³⁰ যেনে তা পরাণান মরণর জাগাত্তুন ফিরে আর তা উগুরে জিংকানির পহ্‌রান পড়ে।

³¹ “ইয়োব, তুই মন দিইনে মঅ কধাগান শুন; তুই জুরো গুরি থাগ্, মুই কধা কং।

³² যুনি তর্ কিজু কবার থায় সালে মরে কঅ; তুই কঅ, কিয়া মুই তরে নিদ্দুযি দেগেবাত্তে চাং।

³³ যুনি কিজু কবার্ ন-থায়, সালে মঅ কধাগান শুন; তুই জুরো গুরি থাগ্, মুই তরে জ্ঞান শিক্ষ্যে দিম্।”