ইয়োব 32 - Chakma Bibleইলীহূর কধা 1 ইয়োবে নিজো চোগেদি নিজে ন্যায়বলা মনে গোজ্যে বিলিনে সেই তিনজনে ইয়োবর কধাগানর জোব্ দেনা বন্ধ গুরি দিলো। 2 ইয়েনত্ রাম বংশর বূষীয় বারখেলর পুয়ো ইলীহূ ইয়োব উগুরে অমকদ রাগ গুরিলো, কিয়া ইয়োবে গোজেনত্তুন্ নিজোরে ন্যায়বলা মনে গুরিদো। 3 তে সেই তিনজন সমাজ্যে উগুরেয়ো অমকদ রাগ তুলিলো, কিত্যে তারা ইয়োব কধানির জোব্ দি ন-পারিলেয়ো তারে দুষি গোজ্যন্। 4 তারার্ বেক্কুনোত্তুন ইলীহূ বয়জে চিগোন এলঅ বিলিনে ইয়োবরে জোব্ দিবাত্তে তে বাজ্জেই থেইয়্যে। 5 পরেদি সেই তিনজন মানজ্যর্ জোব্ দিবার আর কিচ্ছু নেই দেগিনে তে রাগে জুলি উদিলো। 6 সেনত্তে বারখেলর পুয়ো ইলীহূ কলঅ, মঅ বয়জ্ছান কম, মাত্তর্ তুমি বুড়ো ওইয়ো, সেনত্তে মঅ কধাগান ফগদাং গুরিবাত্তে মুই কনঅ সাহস ন-গরং, দোরেয়োং। 7 মুই মনে গোজ্যংগে, যিগুনোর্ বয়জ বেশ্ তারা কধা কবাক্, তারা জ্ঞান শিক্ষ্যে দেদোক্ যিগুনোর ভালোক্ বজর্ পার্ ওই যেইয়্যে। 8 সত্যি মান্জ্য ভিদিরে আত্মা আঘে, আর বেগত্তুন্ খেমতাবলা গোজেনর নিজেসে তারে বুঝিবার বল্ দিয়্যে। 9 বানা বুড়ো মানুচ্চুনে যে জ্ঞানবলা সিয়েন নয়, যিগুনোর বয়জ বেশ্ বানা তারা যে গমেডালে বুঝে সিয়েন নয়। 10 সেনত্তে মুই কঙত্তে, মঅ কধাগান শুন; মুইয়ো মঅ মন কধাগান ফগদাঙ্ গুরিম। 11 তুমি কধা কবার্ সময়োত্ মুই বাজ্জেই রোইয়োং। যেক্কেনে তুমি কি কবা বিলিনে চিদে গরর্ সেক্কেনে মুই তমা যুক্তিগানি শুন্যং। 12 মুই তমা কধানি বেক্কানি মন্ দি শুন্যং, মাত্তর্ তমাত্তুন্ একজনেয়ো ইয়োবর কধানি ভুল প্রমাণ ন-গরঅ; তা কধানির জোব্অ তুমি ন-দুয়ো। 13 এ কধাগান ন-কোইয়ো, আমি বুঝি পাজ্জেই, মান্জ্যে নয় মাত্তর্ গোজেনেয়ই তারে ওদেই দি পারে। 14 ইয়োবে মঅ বিরুদ্ধে কনঅ কধা ন-কয়; তমা যুক্তিলোই মুই তারে জোব্ ন-দিম্। 15 ইয়োব, ইগুনে আমক্ ওইয়োন, ইগুনোর্ আর কিচ্চু কবার্ নেই; ইগুনো কধানি আজি যেয়েগোই। 16 ইগুনে দঅ ইক্কিনে জুরো গুরি আগন্, জোব্ ন-দিইনে ইগুনে অলর্ ওইয়োন, আর কি মর্ বাজ্জেই থানা উজিত? 17 ইক্কিনে মুইয়ো মঅ কধাগান কোম্, মঅ মন কধাগান মুই ফগদাং গুরিম; 18 কিত্যে মর্ কবার্ ভালোক্কানি কধা আঘে, মঅ আত্মাগানে মরে কধা কবাত্তে বাধ্য গোজ্যে। 19 মর্ ভিদিরেদিগান খৈল্যেলোই ভোজ্যে আংগুর-রসে ফাদি যাইদে ধোক্ক্যেন ওইয়্যে, নুয়ো চাম্অ খৈল্যে ধোক্ক্যেন ফাদি যাইদে ধোক্ক্যেন ওইয়্যে। 20 শান্ত অবাত্তে মত্তুন্ কধা কুয়ো পুরিবো; মুয়োন খুলিনে মত্তুন্ জোব্ দিয়্যে পুরিবো। 21 মুই কারঅ উগুরে একঢাল্যে ন-গুরিম, বা কনঅ মান্জ্যরে বিগিদি ন-গুরিম; 22 মুই বিগিদি গুরিবাত্তে ন-জানং; যুনি সিয়েন গরং সালে মঅ গোজেনে মরে যাদিমাদি তুলি নেযেব। |
Copyright © 2021 Bangladesh Bible Society
Bangladesh Bible Society