ইয়োব 31 - Chakma Bible

¹ কামনা চোগেদি কনঅ গাবুজ্যে মিলে ইন্দি ন চেম্ বিলিনে মঅ চোগ্‌কুনো লগে মুই এক্কো চুক্তি গোজ্যং।

² স্বর্গত্‌ থেইয়্যে গোজেন ইত্তুন্ মান্‌জ্যে কি পান? স্বর্গর্ বেগত্তুন খেমতাবলা গোজেন ইদু তার পাওনাগান বাহ্ কি?

³ সিয়েন কি শদানুনোত্তে ভস্ত নয়? যিগুনে ভান্ন্যেই কাম্ গরন তারাত্তে দযা নয়?

⁴ তে কি মর্ আদাউদো গরানা ন-দেগের্? মর্ পত্তি পোইদ্যাগুন্ তে ন-গণের্?

⁵ মুই জদবদে কঙত্তে, মুই মিজে কধালোই আদাউদো ন-গরং, মঅ টেঙানিয়ে ছলনার পিজেন্দি ন-যায়।

⁶ গম্ পাল্লালোই গোজেনে যেন মরে মাবে, সালে তে হবর্ পেবদে, মুই নিদ্দুযি।

⁷ যুনি মুই ভান্ন্যেই পধেদি টঙ্ দি থাং, মঅ চোগ্‌কুনে যুনি মঅ মনানরে পাপ্ গোরেই থান, বা মঅ আদত্ যুনি কনঅ পাপ চিহ্ন বাঁজি থায়,

⁸ সালে মুই যিয়েনি লাগেয়োং সিয়েনি যেন অন্যগুনে খান্, মঅ সোজ্যগানি যেন উগুরে দিয়্যে অয়।

⁹ মঅ মনান্ যুনি কনঅ মিলে ইন্দি যেই থায়, বা যুনি পাড়াল্যের্ দোরো কুরে মুই হাপ্ দি থাং,

¹⁰ মাত্তর্ মঅ মোক্কো যেনে অন্য মানজ্যর্ মিশিন্ ঘুরোই, আর অন্য মানুচ্চো যেনে তা সমারে ঘুমোত্ পড়ে।

¹¹ মর্ পক্ষে সিয়েন অবদে এক্কান জঘন্য কাম, বিচের্ গুরিয়্যেগুনোর মাধ্যমে সাজা পাইদ্যে ধোক্ক্যেন পাপ।

¹² সে পাপ্পান্ এমন্ আগুনো ধোক্ক্যেন যিয়েনে মরণর জাগায়ান সং জুলিবো, সিয়েনে মর্ বেক্কানি পুড়ি ফেলেই দি পারে।

¹³ মর্ চাগর-চাগরানীগুনে মঅ বিরুদ্ধে কনঅ আবিত্তি জানেলে যুনি মুই সিয়েনর বিচের্ গুরিবাত্তে রাজী ন-ওই থাং,

¹⁴ মাত্তর্ গোজেনে যেক্কে মল্লোই মুয়োমি অবঅ সেক্কেনে মুই কি গুরিম্? মুই তারে কি জোব্ দিম্?

¹⁵ যিবে মরে পেদঅ ভিদিরে বানেয়্যে, তে কি তারারেয়ো ন-বানায়? পত্তিজনে কি মা পেদত্ আমারে ন-ধরন্?

¹⁶ মুই যুনি নাঢা মানুচ্চুনোর অভাব্‌পানি মিটেই ন-দুয়োং, বা রাণিমিলেগুনোরে নিরাশ্ গুরি থাং,

¹⁷ যুনি মঅ হানাগান মুই বাপ-মা নেইয়্যেগুনোরে ন-দিইনে গায় গায় হেই থাং-

¹⁸ ঘেচ্চ্যেকগুরি মুই চিগোনত্তুন্ ধুরি তারারে মুই বাবঅ ধোক্ক্যেন পালেয়োং আর মর্ জর্মানার পরেত্তুন্ ধুরি রানিমিলেগুনোরে চেইয়োং-

¹⁹ যুনি মুই কাররে কাবড়-চুগোর অভাবে মুরিবোদে ধোক্ক্যেন দেগিই থাং বা অভাবী মান্‌জ্যরে লাংটা-বাংটা দেগিই থাং,

²⁰ ভেড়া কেশ কাবড়লোই তারে উমুম্ গুরি রাগেয়োং বিলিনে যুনি তা মনানে মরে বর্ দি ন-থায়,

²¹ বিচেরত্ মর্ খেমতা আঘে বিলিনে মুই যুনি বাপ-মা নেইয়্যেগুনোর কিয়্যেত্ আত্ তুলি থাং,

²² সালে কানাত্তুন্ মঅ আঢ্‌তান যেনে উজুরি পড়ে, আড় জড়াত্তুন্ যেনে সিয়েন ভাঙি পড়ে,

²³ কিত্যে মুই গোজেনর দিয়্যে সাজা দরাং; তা মহিমাগান এদক্ বেশ্ যে, তা দরে মুই সিয়েনি গুরি ন-পারং।

²⁴ সোনা উগুরে যুনি মুই নির্ভর গুরি থাং, বা খাটি সোনাগানরে কোই থাং, তঅ উগুরে মর্ বিশ্বেজ্,

²⁵ মঅ নিজো আঢ্‌তোই যে সোম্বোত্তিগানি মুই পেইয়োং সে সোম্বোত্তি গানিলোই যুনি মুই রঙ্গ ফুত্তি গুরি থাং,

²⁶ যুনি ধোক্‌ধোক্ক্যা বেল আর জুনি-ভরা চানান ইন্দি চেই থাং,

²⁷ আর সেক্কে যুনি মঅ মনান্ ভিদিরে ভিদিরে তারা ইন্দি যেই থায়, তারারে চুমিবার আজায় যুনি মঅ আঢ্‌তান‌ চুমি থাং,

²⁸ সালে ইয়েনিয়ো অলঅ সাজা পাইদ্যে ধোক্ক্যেন পাপ, কিত্যে সিয়েন্দোই মুই স্বর্গর্ গোজেনরে অস্বীগের্ গোজ্যং।

²⁹ মঅ শত্রুগুনোর্ দুঘোত্ রঙ্গ ফুত্তি ন-গরং বা তার দুঘো অক্তত্ হুজি ন-অং।

³⁰ তা পরাণ বিরুদ্ধে অভিশাবর কধা কোইনে মঅ মুয়োনরে মুই পাপ গুরিবাত্তে ন-দুয়োং।

³¹ মঅ ঘরর্ মানুচ্চুনে দঅ এ কধানি কদাক্, ইয়োবর্ দিয়্যে য়েরানিলোই কন্না পেট ভোরেই ন-পারে?

³² কনঅ বিদেশীয়ে পধত্ রেত্ ন-কাদান্, কিত্যে পথ্যগুনোত্তে মঅ দোরান্ নিত্য খুলো এলঅ।

³³ অন্য মান্‌জ্য ধোক্ক্যেন মুই পাপপানি গুমোর্ গুরি ন-রাগাং আর মঅ মনত্ দুষ্‌ছানি লুগেই ন-রাগাং;

³⁴ সেনত্তে মুই মানুচ্চুনোরে ন-দোরেদুং, আর মঅ বংশর মানুচ্চুনোর ঘিনেনার দরে মুই ঘরত্ জুরো গুরি বুয়োই ন-থেদুং।

³⁵ হায়, মঅ কধানি যুনি কনজনে শুনিদো! মুই সোই দিইনে সাক্ষি দোঙত্তে, মঅ কধাগান সত্য; বেগত্তুন্ খেমতাবলা গোজেনে যেনে মরে জোব্ দে, মঅ বিবাদীবো যেনে মর্ দুষ্‌ছান লিগিনে দেগায়।

³⁶ মুই হামাক্কায় সিয়েন মঅ কানাত্ বাজেই রাগেম আর মুকুটো ধোক্ক্যেন গুরি মাধাত্ পিনিম্।

³⁷ মর্ পত্তি পোইদ্যের্ ইজেব মুই তারে দিম্; রাজার পুয়ো ধোক্ক্যেন মুই তাইদু উজেই যেম্।

³⁸ মর্ ভূইয়ানে যুনি মঅ বিরুদ্ধে রঅ ছাড়ি উদে আর চাষ গোজ্যে ভূইয়ানে যুনি চোগো পানিয়ে ভিজি উদে,

³⁹ যুনি মুই দাম্ ন-দিইনে সিয়েনর ফসলান হেই থাং বা সিদুগোর গিরোজ্‌ছুনোরে চিৎনপুজ্যেগুরি যন্ত্রণা দি থাং,

⁴⁰ সালে যেনে সিয়েনত্ গম বদলে কাদাগাজ্ উদে আর মোক্ক্যের্ বদলে হের্।” ইয়োত্ ইয়োবর কধানি থুম্ ওইয়্যে।