ইয়োব 30 - Chakma Bible

¹ মাত্তর ইক্কিনে যিগুনে মত্তুন্ বয়জে চিগোন্ তারা মরে ঈচ্ গরন্; তারা বাপ্পুনোরে মুই ভেড়া পাল্ চুগিদিয়্যে কুগুরুনো সমারে রাগাদেয়ো ঘিনেম্।

² তারার্ বলানি মর্ কি কামত্ লাগিদো? তারার্ কনঅ বল্ ন-এলঅ।

³ ভাদরাদে আর পেত্‌পরায় তারার্ চেঙেরাগানি শুগুনো এলঅ; তারা রেদোত্ মানুচ্‌জন নেইয়্যে শুগুনো জাগাত্ যিয়েনি পেদাক্ সিয়েনি চাবেদাক্।

⁴ তারা ঝুবো ভিদিরেত্তুন্ চুয়োত্ নেইয়্যে শাক্ তুলিদাক্; রেতম গাজ শিঙোর্ তারার হানা এলঅ।

⁵ সমাজত্তুন্ তারারে ধাবেই দিয়্যে ওইয়্যে; তারা যেন চুর সেধোক্ক্যেন গুরিনে মানুচ্চুনে তারা পিজেদি রঅ ছাড়িদাক্।

⁶ শুগুনো গাঙ বুগোত্ তারাত্তুন বজত্তি গরা পুরিদো; তারা মাদি গাদত্ আর মুড়োমুড়ির ফাদা জাগাত্ থেদাক্।

⁷ ঝুবো ভিদিরেত্তুন তারা গাধা ধোক্ক্যেন ডাগিদাক্, কাঙেলেত্যে ভিদিরে ঠেলাতিলি গুরিনে বজত্তি গুরিদাক্।

⁸ তারা এলাক্কে অপদাত্ত আর দুন্নাম হেইয়্যে; দেজত্তুন্ তারারে ধাবেই দিয়্যে ওইয়্যে।

⁹ আর তারার্ পুয়োগুনে গান গেই গেই মরে ঈচ্ গরন; তারা ইদু মুই এক্কো ঈচ্ গরা হেইয়্যে ওইয়োং।

¹⁰ তারা মরে ঘিনেইনে মত্তুন্ দূরোত্ থান্; মঅ মুয়োত্ শেফ্ ফেলাদেয়ো তারা ন-দরান্।

¹¹ গোজেনে মরে বলনেইয়্যে গোজ্য আর মরে দুগোত্ ফেলেয়্যে; সেনত্তে তারা কনঅ মানা ন-মানিনে মঅ বিরুদ্ধে উঠ্যন্।

¹² রাগি গাবুজ্যেগুনে যেনে ডেনেদিত্তুন্ মরে আক্রমণ গরন্ আর মরে ধেই যেবাত্তে বাধ্য গরন্; মরে আক্রমণ গুরিবাত্তে তারা দেবাল্ পার অবাত্তে মাদি কুর্ বানেবাগ।

¹³ তারা মঅ পথ্‌তান্ আক্‌সোই ‌ দুয়োন্; কারঅ সাহায্য নেইয়্যে গুরি তারা মরে খেতি গরন্।

¹⁴ তারা যেনে দেবালর দাঙর্ ফাগঅ ভিদিরেদি উজেই এজন্; ভস্ত ওইয়্যে কুরো ভিদিরেন্দিয়ো তারা যাদিমাদি এই যান্।

¹⁵ নানাবাবোত্যে দর্‌বুগ্ লাগিনে মরে ঢাগি ফেলায়; সেই দরানে মর্ সর্মানানরে বোইয়্যের ধোক্ক্যেন্ উড়েই দে; মর্ সফলতাগান মেঘ ধোক্ক্যেন মিলেই যায়।

¹⁶ ইক্কিনে মঅ জিংকানিত্ ভাতা পোজ্য; দুঘো দিনুনে মরে আক্রমণ গত্তন্।

¹⁷ রেদোত্ মঅ আড়ুনো ভিদিরে অমকদ পীড়ে গরে; সেই চুলেয়্যে পীড়েগান্ কনদিন্‌অ ন-থামেব।

¹⁸ গোজেনে কুসিগীরো ধোক্ক্যেন তার দাঙর বল্লোই মঅ কাবড়ান ধরে, মঅ সিলুমোর্ গত্তনাবো ধোক্ক্যেন গুরি তে মরে জাবুদো উরেইনে ধরে;

¹⁹ সে পরেদি তে মরে পুদোত্ ফেলেই দিলো। মুই দঅ ধূল্যে আর ছেইয়ো ধোক্ক্যেন্ ওই যেইয়োং।

²⁰ ও গোজেন, মুই তইদু কানিম্, মাত্তর্ তুই জোব্ ন-দুয়োজ্; মুই থিয়্যেই থাং; মাত্তর্ তুই বানা মন্দি চাহ্।

²¹ তুই মঅ উগুরে চিৎনপুজ্যে বেবহার গোজ্যস্; তর্ খেমতাবলা আঢ্‌তোই তুই মরে আক্রমণ গোজ্যস্।

²² তুই মরে তুলি নেযেইনে বোইয়্যেরত্ ইরি দুয়োজ্; ঝড় ইদু ফেলেইনে তুই মরে নাজত্তে।

²³ মুই হবর্ পাং তুই মরে মরণ ইন্দি নেযর্, পুরো জেদা মানুচ্চুনোত্তে ঠিগ্ গোজ্যে জাগানত্ নেযর্।

²⁴ যে পড়ি যেইয়্যে আর দুঘোত্ সাহায্যত্তে কানাকুদি গরের্ তারে কি কনজনে আঘাত্ গরন্?

²⁵ যিগুনে দুঘোত্ পোজ্যন্ তারাত্তে কি মুই ন-কানং? নাঢা মানুচ্চুনোত্তে কি মুই মনত্ দুগ্ ন-পাং?

²⁶ মাত্তর্ যেক্কেনে মুই ভালেদি আজা গুরিলুং সেক্কেনে অমংগল গুদিলো; যেক্কেনে পহ্‌রত্তে বাজ্জ্যেই থেলুং সেক্কেনে আন্ধার্ অলঅ।

²⁷ মর্ ভিদিরেদিগান উলোত্ পালোত্ গরের, ন-থামার্; দুঘোর্ দিনুন্ মঅ মুজুঙোত্ লুম্মেগি।

²⁸ মুই রোদ নেইয়্যে দিনো ধোক্ক্যেন মু কালা গুরি ঘুরোঙর্; মুই তেম্মাঙত্ থিয়্যেইনে সাহায্য চেইয়োং।

²⁹ মুই শিয়েল ভেই আর উটপেগোর্ সমাজ্যে ওইয়োং।

³⁰ মঅ চামানি কালা ওইনে উদি যার্; জ্বরে মঅ কিয়্যেগান পুড়ি যার্।

³¹ মর্ বীণাবোত্তুন্ ইক্কিনে দুঘোর্ সুর্ এজের্, আর বাশীবোত্তুন এজের্ আবিলেজর্ সুর্।