ইয়োব 29 - Chakma Bible1 সে পরেদি ইয়োবে আরঅ কলঅ, 2 আহা, গোজেনে যেক্কে মরে দেগাশুনো গুরিদো সেই সময়োর্ মাস আর দিনুন্ যুনি মুই ফিরি পেদুং! 3 মঅ মাধাবো উগুরে সেক্কেনে তা বাত্তিবো জুলিদো, আর তা পহ্রে মুই আন্ধারত্ আদাউদো গুরিদুঙ্। 4 মর্ সেই ফলেদে দিনুনোত্ গোজেনে তার ঘনিষ্ঠ সমাজ্যে মনভাব্পোই মঅ তাম্বুলানরে বর্ দিয়্যে। 5 বেগত্তুন্ খেমতাবলা গোজেনে মঅ সমারে এলঅ আর মর্ চেরোকিত্তে মর্ ঝি-পূয়োগুনে এলাক্; 6 মর্ জিংকানি-পথ্তান্ সুগেই এলঅ, আর মত্তেই সিলোত্তুন্ জলপাই-তেলর গঙার্ বদহ্। 7 যেক্কেনে মুই শঅর গেদোত্ যেইনে সিদুগোর্ চক্কর্বোত্ মঅ আসনান্ গুজি লোদুং, 8 সেক্কে গাবুজ্যেগুনে মরে দেগিলে সুরিনে থিয়্যেদাক্; আর বুড়ো মানুচ্চুনে উদিনে থিয়্যেদাক্; 9 মুরুব্বিগুনে কধা কনা বন্ধ গুরিদাক্ আর আঢ্তোই মুয়োন্ ঢাগিদাক্; 10 নেতাগুনোর রঅগুন্ থামেদ, আর তারার জিলানি তাগারাত্ আক্সো যেদঅ। 11 যিগুনে মঅ কধানি শুনিদাক্ তারা মরে ভালেদি কদাক্, আর যিগুনে মরে দেগিদাক্ তারা মরে নাঙ্ গিনিদাক্, 12 কিত্যে বল্ পেবাত্তে যে নাদা মানুচ্চুনে কানন্ আর যে বাপ-মা নেইয়্যেগুনোরে বলদিয়্যে কনজন ন-এলাক্, তারারে মুই রোক্ষ্যে গুরিদুং। 13 মুরি যাদন্ এবাবোত্যে মান্জেয়ো মরে বর্ দেদন্; রানিমিলেগুনোর মনত্ মুই হুজ-ফুত্তির্ গান যোগেদুং। 14 সততাগানরে মুই কাবড় ধোক্ক্যেন উরিদুং, আর সততাগানে মরে তা মোক্ক্যেন্দি রাগেদ; 15 মুই এলুঙ্ কান্ মানুচ্চুনোর চোগ্ আর আদুরুনোর টেং। 16 মুই নাদামানুচ্চুনোর্ বাবঅ ধোক্ক্যেন এলুং, আর অচেনাগুনোর পক্ষে মুই তারার বিচের ভারান্ নিদুং। 17 মুই বজং মানুচ্চুনোর মাড়িগানি ভাঙি দিদুং আর তারা মুয়োত্তুন শিগের্ কারি নেযেদুং। 18 মুই মনে গুরিদুং মর্ নিজো মানুচ্চুনো ভিদিরে মুই মুরি যেম্, ধূল্যেচর ধোক্ক্যেন্ মঅ দিনুন্ গুণি ন-পুরেইয়্যে অবঅ; 19 মনে গুরিদুং মঅ শিঙোরান্ পানিত্ যেইনে লুমিবো, মঅ ডেলাগুনো উগুরে সারা রেত্তো শিরো পানি পুরিবো; 20 মনে গুরিদুং মানুচ্চুনো ইদু মঅ সর্মানান্ শুগেই ন-যেবঅ, মর্ গাবুজ্যে বলান্ আমিঝে নূয়ো থেবঅ, 21 মান্জ্যে মঅ কধানি শুনিবাত্তে বাজ্জেই থেদাক্, মঅ সল্লাগানিলোই জুরোগুরি থেদাক্। 22 মঅ কধানর্ পরেদি তারা আর কধা ন-কদাক্; মুই তারা ইদু গমেডালে কধা কদুং। 23 ঝড়ত্তেই যেধোক্ক্যেন গুরি মান্জ্যে বাজ্জ্যেই থান্ সেধোক্ক্যেন গুরিনে তারা মঅ কধাত্তে বাজ্জ্যেই থেদাক্; জার্কাল্যে ঝড় ধোক্ক্যেন তারা মঅ কধানি মানিদাক্। 24 মুই সাধারন মানুচ্চুনো ইন্দি চেইনে আজিলে তারা আমক্ অদাক্; মঅ আজিগান্ তারা মনত্ রাগেইনে আজা নিইনে থেদাক্। 25 মুই তারা পথ্তানি ঠিগ্ গুরি দিদুং আর তারা নেতা ধোক্ক্যেন বুজিদুং; সৈন্যদলুনো ভিদিরে রাজা যেধোক্ক্যেন, মুই সেধোক্ক্যেন এলুং; যিগুনে আবিলেচ্ খেদাক্ তারারে মুই বুঝেদুং। |
Copyright © 2021 Bangladesh Bible Society
Bangladesh Bible Society