ইয়োব 28 - Chakma Bible1 রূবোর্ খনি আঘে আর সনা কাজেবার জাগায়ো আঘে। 2 মাদিত্তুন্ লুয়ো তুলো অয়, আর ধাতু-পাত্তর্ গোলেইনে নিগিলে অয় তামা। 3 পিত্থিমীর গভীনোত্ ঘুর্গুজ্যে আন্ধারত্ যিয়েনি আঘে মান্জ্যে আন্ধারান্ কাদেই উদিনে সেই মংগা পাত্তরুন তোগান্। 4 মান্জ্যর থেবার্ জাগানত্তুন্ দূরোত্ যিয়েনত্ মানুচ্ ন-যান সিয়েনত্ তে গাঢ্ খুড়ে, আর সেই গাত্তো ভিদিরে তে টাঙেয়্যেগুরি দুলি থায়। 5 যে পিত্থিমীগান উগুরে খেত্খেত্তি ফলায়, মান্জ্যে সেই পিত্থিমীর গভিনোত্ আগুন্দোই ভাঙিনে ভস্ত গরন্। 6 পিত্থিমীর পাত্তর ভিদিরে নীলকান্তমণি থায়, আর মাদি ভিদিরে সনা থায়। 7 খনিবোর্ চোরা পথ্তান্ শকুনে হবর্ ন-পান, কনঅ বাজ্ পেগোর চোগে সিবে ন-দেগে; 8 কনঅ চিৎনপুজ্যে য়েমানে সিয়েনত্ টেঙ ন-রাগান, কনঅ সিংহয়ো সিয়েনত্ ন-যায়। 9 সেই দরমর পাত্তর্বোত্ মান্জ্যে আত্ দুয়োন আর মুড়োবো গোড়াত্ গভীন গুরিনে খুড়োন্। 10 তে মুড়ো ভিদিরেদি পাদাজ্যে গুরি গাঢ্ কুরে; সিদুগোর্ বেক মংগা জিনিসছানি তা চোগোত্ পড়ে। 11 তে থান্জাঙর্ পানি পড়ানা বন্ধ গরে আর লুগেয়্যে জিনিসছানি পহরত্ আনে। 12 মাত্তর জ্ঞান কুদু পাহ্ যেবঅ? আর বুদ্ধিগানে কুদু থায়? 13 মান্জ্যে তার মূল্যগান্ হবর্ ন-পান; জেদাগুনোর দেজত্ সিয়েন পাহ্ ন-যায়। 14 গভীন পানিগানে কত্তে, সিয়েন মঅ ভিদিরে নেই, বড়্গাঙানে কত্তে, সিয়েন মইদু নেই। 15 গম্ সনালোইয়ো সিয়েন কিনে ন-যায়, ভালোক্কানি রূবোলোইয়ো সিয়েনর দামান দিয়্যে ন-যায়। 16 ওফীরোর সনালোই সিয়েন কিনে ন-যায়, বৈদুর্যমণি বা নীলকান্তমণি দিলেয়ো সিয়েন কিনে ন-যায়। 17 সনা বা মংগা আনা সমারেয়ো সিয়েনর তুলনা ন-অয়, সনার্ পিলের্ বদলেয়ো সিয়েন পাহ্ ন-যায়। 18 তাইদু প্রবাল আহ্ স্ফটিকোর্অ দাম নেই; পদ্মরাগমণিত্তুন্অ জ্ঞানর মূল্য বেশ্। 19 তা সমারে কূশ দেজর পোখরাজমণির্অ তুলনা ন-অয়; খাটি সনালোইয়ো সিয়েন কিনে ন-যায়। 20 সালে জ্ঞানান্ কুত্তুন এজে? আর বুদ্ধিগানে কুদু থায়? 21 বেক্ পরাণবলাগুনোর চোগোত্তুন্ সিয়েন্ লুগেয়্যে আঘে, এন কি, আগাজ পেখ্কুনো ইত্তুন্অ সিয়েন গুমোরত্ আঘে। 22 নরক্ আর মরণ বিলি, সিয়েনর কিজু শুন্যে হবর্ আমা কানত্ লুম্মেগি। 23 “গোজেনে তা পথ্তান বুঝি পারে; তেয়ই বানা হবর্ পাইদ্যে সিয়েনে কুদু থায়, 24 কিত্যে তে পিত্থিমীর শেজ্ দুযিগান্অ দেগে; আগাজ তলে বেক্কানি তা চোগোত্ পড়ে। 25 তে যেক্কেনে বোইয়্যের্লোই খেমতা যোগেল আর পানি কত্তমান ঠিগ্ গুরিলো, 26 যেক্কেনে তে ঝড়ত্তে সুদোমর বেবস্থা গুরিলো আর দেবা পেরাগ্ পড়ানা আহ্ ঝিমিলেবার পথ্তান ঠিগ্ গুরিলো, 27 সেক্কেনে তে জ্ঞানানরে দেগিলো আর সিয়েনরে মাবিলো; তে সিয়েনরে গমেডালে চেলঅ আর সিয়েনর হবর্ নেযেল। 28 সে পরেদি তে মানুচ্চুনোরে কলঅ, ‘প্রভু উগুরে ভোক্তিবলা দরান্ অলঅ জ্ঞান, আর ভান্ন্যেয়ত্তুন্ সুরে যানাগানই অল বুদ্ধি।’ ” |
Copyright © 2021 Bangladesh Bible Society
Bangladesh Bible Society