ইয়োব 27 - Chakma Bible1 ইয়োবে তা কধানি কুও ধুরিলো। তে কলঅ, 2 যিবে মঅ বিচের্ গুরিবাত্তে অস্বীগের্ গোজ্যে সেই জেদা গোজেনর নাঙে কঙর্, যিবে মঅ পরাণানরে তিদে গুরি দিয়্যে সেই বেগ খেমতাবলাবো নাঙে কঙর্, 3 যেদকদিন মইদু পরাণান আঘে, যেদকদিন গোজেনর নিজেস্সো মঅ নাগ ভিদিরে আঘে, 4 সেদকদিন মঅ মুয়োনে ভান্ন্যেই কধা ন-কবঅ, মঅ জিলানে ছলনা কধা ন-কবঅ। 5 তমা কধানি যে ঠিগ্ সিয়েনে কনদিন্অ মুই মানি ন-নেযেম; মর্ মরণ দিন্নো সং মুই কোম্বে, মুই সত্য কধা কোইয়োং। 6 মুই যে নিদ্দুযি সেই দাবিগান মুই গুরিম, কোই কোই থেম্। মুই যেদক্দিন বাঁজিম্ সেদকদিন সং মঅ বিবেগ্কানে মরে দুষি ন-গুরিবো। 7 মঅ শত্রুগুনে শদানুনো ধোক্ক্যেন ওক্; মঅ বিপক্কগুনে অন্ন্যেই গুরিয়্যেগুনো ধোক্ক্যেন ওক্। 8 গোজেনে যেক্কে তা উগুরে ভোক্তিনেইয়্যেগুনোরে শেজ্ গুরি দে, সেক্কে তারার আর কনঅ আজা ন-থায়। 9 তারা উগুরে দুঘ্ এলে গোজেনে কি তারার কানা-কুদিগানি শুনে? 10 তারা কি বেগত্তুন্ খেমতাবলা গোজেনরে নিইনে হুজি অন্? তারা কি নিত্য গোজেনরে ডাগন্? 11 গোজেনর্ খেমতা পৌইদ্যেনে মুই তমারে শিগেম্; বেগত্তুন্ খেমতাবলা গোজেন পৌইদ্যেনে মুই ফগদাং গুরিম। 12 তুমি দঅ বেক্কুনে ইয়েনি দেখ্য, সালে এ বাজে কধানি কিত্তে কর্? 13 গোজেনে শদানুনোর ভাগ্যত্ যিয়েন রাগেয়্যে, বেগত্তুন্ খেমতাবলা গোজেন ইত্তুন্ চিৎনেইয়্যে মানুচ্চুনে যে অধিকারান্ পান্ সিয়েন অলঅ: 14 তারার ঝি-পুয়োগুন ভালোক্কুন অলেয়ো তারাত্তে ঠিগ্ ওই আঘে দর্গরেপারা মরণ; তারার পুয়ো-ছাগুনে কনদিন্অ যোগাজ্য গুরি হানা ন-পেবাগ্। 15 তারা পরেদি যিগুনে বাঁজি থেবাক্ তারার মরণান অবঅ ভানা পিড়েলোই; তারার রাণি মিলেগুনে তারাত্তে ন-কানিবাক্। 16 ধূল্যে ধোক্ক্যেন তারা রূবো থুবেলেয়ো আর মাদি কুরো ধোক্ক্যেন কাবড়-চুগোড় থুবেলেয়ো 17 তারার কাবড়-চুগোড়ানি গম্ মানুচ্চুনে উরিবাক্, আর নিদ্দুযি মানুচ্চুনে সে রূবোগানি ভাগ গুরি নেযেবাক্। 18 তারার বানেয়্যে ঘরানি পুগো চারা ধোক্ক্যেন, সিগুন যেন চুগিদারুনোর আলগ্-ঘর। 19 তারা শেজ্ বার ধোক্ক্যেন তাগোয়্যে অবস্থায় ঘুমেবাত্তে যান্, মাত্তর্ চোখ্কুন খুলিলে তারা দেগিলাক্ বেক্কানি শেজ্ ওই যেইয়্যে। 20 বান পানি ধোক্ক্যেন দর্বুগে তারারে ধুরি ফেলেব, রেদো ঝড়ে তারারে উরেই নেযেব। 21 পূগে বোইয়্যেরে তারারে তুলি নেযেব, তারা উরি যেবাক্; তারা জাগানত্তুন্ সেই বোইয়্যেরানে তারারে উরেই নেযেব। 22 সেই দাঙর্ বোইয়্যেরানত্তুন্ যেক্কেনে তারা যাদিমাদি ধেই যেবাত্তে চেবাক্ সেক্কেনে চিৎনপুজ্যেগুরি সিয়েনে তারা উগুরে ঝাবেই পুরিবো। 23 সেই বোইয়্যেরানে যেন ঠাট্টা গুরিনে আঢতালি দে আর তারা জাগানত্তুন্ হিস্হিস্ রঅ গুরিনে তারারে নিগিলেই দে। |
Copyright © 2021 Bangladesh Bible Society
Bangladesh Bible Society