ইয়োব 26 - Chakma Bible

ইয়োবর জোব্ দেনা

¹ সেক্কেনে জোবত্ ইয়োবে কলঅ,

² তুই বল্‌‌নেইয়্যেবোরে ইয়েন কি বাবোত্যে সাহায্য গুরিলে আর বল্‌‌পোজ্যেবোরে ইয়েন কি বাবোত্যে রোক্ষ্যে গুরিলে?

³ জ্ঞান নেইয়্যেগুনোরে ইয়েন কি বাবোত্যে সল্লা দিলে আর দাঙর জ্ঞান ফগদাং গুরিলে?

⁴ তুই কাহ্ বল্লোই এ কধানি কোইয়োজ্? কাহ্ কধানি তঅ মুয়োত্তুন্ নিগিলি এচ্চ্যে?

⁵ মরা মানুচ্চুনে দরে অমকদ গির্‌গিরাদন্; তারা গির্‌গিরাদন পানিত্ তলে আর পানিত্ বজত্তি গুরিয়্যেগুনোর তলে।

⁶ গোজেন মুজুঙোত্ মরণনর্ জাগায়ান নাঢা যেইয়্যে নেই; ভস্ত অবার জাগায়ান খুলো রোইয়্যে।

⁷ তে দেবাবো উত্তরেদি আগাজ্‌ছান ছিদি দিয়্যে; দেবাবো উগুরে পিত্‌থিমীগানরে টাঙেই রাগেয়্যে।

⁸ তা মেঘছাগ ভিদিরে তে পানি আক্‌‌সোই রাগাই, মাত্তর্ সিয়েনর ভরে মেঘছাগ্‌‌কানি ফাদি ন-যায়।

⁹ তে পূন্‌‌ণিমা চান মুয়োন ঢাগি দে, ‍ সিয়েন উগুরে তা মেঘ্‌কান ছিদি দে।

¹⁰ পহর্ আর আন্ধারানে যিয়েনত্ যেইনে মিজেই সিয়েনত্ তে আগাজ আর সাগর সংমোধ্যে দুযি টান্যে।

¹¹ আগাজ খুদোগুন গির্‌‌গিরে উদোন্, তে গেইল্ দিলে সিগুনে উগুরি উদোন্।

¹² তে নিজো খেমতালোই বড়গাঙানরে উলোত্ পালোত্ গরে; তা কাবিদেংগোই তে রহবরে কট্টা কট্টা গরে।

¹³ তা নিজেস্‌‌ছোই আগাজ্‌‌ছান ফোক্‌‌পোক্যা অয়; তা আঢ্‌তা‌নে ধেই যেইয়্যে সাপ্পোরে সেল্ মারে।

¹⁴ ইয়েনি তা কামর কিজু ফগদাং, আমি তা পৌইদ্যেনে বানা কিজু কধা শুনিই; তা খেমতার রবো কন্না বুঝি পারে?"