ইয়োব 24 - Chakma Bible

¹ বেগত্তুন খেমতাবলা গোজেনে বিচেরত্তে কিত্যে সময়ান্ ঠিগ্ ন গরে? যিগুনে তারে হবর্ পান তারা কিত্তে সেদিন্যে ন-দেগন?

² মানুচ্চুনে দুযির্ পাত্তরান্ সোরেই দুয়োন; তারা ভেড়া পালুন চুর্ গরন আর সিগুনোরে চরান্।

³ তারা বাপ-মা নেইয়্যেগুনোর গাধাগুন নেযান্ আর রানিমিলেগুনোর গোরুগুন বন্ধক্ রাগান।

⁴ তারা পথ্‌তানিত্তুন্ নাঢা মানুচ্চুনোরে ধাবেই দুয়োন; তারাত্তে দেজর বেগ্ নাঢা মানুচ্চুনে পোল্যেই থান্।

⁵ নাঢা মানুচ্চুনে ধূল্যেচরর্ ঝার্‌বো গাধা ধোক্ক্যেন্ হানা হেবাত্তে তগান্; ধূল্যেচর-চাগালাগানে তারা ঝি-পুঅগুনোর হানা যুগেই দে।

⁶ তারা মাধত্ যেইনে য়েমানুনোর হানাগানি নিজোত্তে কুড়োন্ আর শদানুনোর আংগুর খেদত্তুন্ পোজ্যে আংগুরুন কুড়োন্।

⁷ কাবড়র অভাবে তারা লাংটা-বাংটা ওইনে রেত্ কাদান্; যার্‌কাল্যে কিয়্যেত্ দিবাত্তে তারার্ কিচ্চু ন-থায়।

⁸ তারা মুড়োমুড়ি ঝরত্ ভিজোন্ আর আশ্রয়র অভাবে শিলুনোর্ ইদু এগত্তর্ অন।

⁹ বাপনেইয়্যে চিজিবোরে সেই শদানুনে মা বুগোত্তুন্ কাড়ি নেযান্ আর কজ্জত্যে নাঢা মানুচ্চুনোর পুঅগুনোরে বন্ধক্ রাগান।

¹⁰ কাবড়র্ অভাবে নাঢা মানুচ্চুনে লাংটা-বাংটা ওইনে ঘুরি বেড়ান্; তারা পেত্ পরায় ধান শিজে বুয়ো ধরন্।

¹¹ তারা বাগানত্ মিশিন্দোই জলপাইয়োর তেলান নিগিলেন; তারা পানি তিরেস্ পেই পেই আংগুর মারন্।

¹² শঅরর্ ভিদিরে মানজ্যর্ আবিলেচ্ হানাগান্ শুনো যার্, আঘাত পেইয়্যে মানুচ্চুনে সাহায্যত্তে রঅ ছাড়দন্; মাত্তর গোজেনে তারা কানানিলোই মনান্ ন-দে।

¹³ কয়েকজনে পহ্‌রান‌ বিপক্কে উল্লোমি গরন; তারা পহ্‌রান পৌইদ্যেনে ন-জানন্ বা সিয়েনর পধেদিয়ো ন-থান্।

¹⁴ খুন্‌গুরিয়্যেগুনে বেন্যেপোত্যে উদিনে নাঢা আর অভাবীগুনোরে মারে ফেলান্, আর রেদোত্ তে চুর্ ওইনে চুর্ গরে।

¹⁵ সিনেলীগুনোর চোখ্‌কুন্ সাজোন্যে ওক্ ওক্ গুরিনে বাজ্জেই থান; তে তার মুয়োন ঢাগিনে ভাবেদে কারঅ চোখ্ যেনে তা উগুরে ন-পড়ন্।

¹⁶ আন্ধার্ অলে মান্‌‌জে ঘর ভাঙা ধরন্, মাত্তর্ দিনোত্ তারা পোল্যেই থান; পহ্‌‌র সমারে তারার কনঅ মিলেমিলি ন-থায়।

¹⁷ তারাত্তে বেন্যে সময়ান ঘুর্‌ঘুজ্যে আন্ধার ধোক্ক্যেন্; দর্‌‌গরেপারা আন্ধার সমারে তারার পরাণে পরাণ আগন্।

¹⁸ “তারা পানি উগুরে ফেনা ধোক্ক্যেন; তারার ভাগ্‌অ ভূইয়ানি অভিশাব্ হেইয়্যে, সেনত্তে তারা কনজনে আংগুর খেদত্ ন-যান।

¹⁹ গরম আরে খরান্যে মাদিগানে যেধোক্ক্যেন বরফ-গোল্য পানিগানরে গিলে, মরা জাগায়ানেয়ো সেধোক্ক্যেন গুরিনে পাপিগুনোরে গজক্ গরে।

²⁰ মাবো তারারে ভুলি যায়, পুগ্‌‌কুনে তারার কিয়্যেগান হেই ফেলান্; বজং মানুচ্চুনোরে কনজনে মনত্ ন-রাগান, তারা গাজ ধোক্ক্যেন ভাঙি পড়ন্।

²¹ তারা ভাজ্ মিলেগুনোরে গজক্ গরন আরে রানীমিলেগুনোরে দোয়্যে ন-গরন।

²² মাত্তর্ গোজেনে তা খেমতালোই সেই বোলিগুনোরে টানিনে লামায়; তারা থিদেবর্ অলেয়ো তারার জিংকানির গেরান্টি নেই।

²³ তে শদানুনোরে গমেডালে জিরেবাত্তে দি পারে, মাত্তর্ তা চোগ্‌‌কুন তান্দে তারার পথ্‌তান ইন্দি।

²⁴ কিজু সময়োত্তে তারার ভালেদি অয়, সে পরেদি তারা আর ন-থান। তারারে তলে ফেলা অয়, ঘাস ধোক্ক্যেন তারা শুগেই যান, আর ধান শীজে ধোক্ক্যেন তারা শুগেই যান।

²⁵ যুনি সিয়েনই অয় সালে কন্না মঅ কধানি মিজে গুরিনে পরমান গুরি পারিবো? মঅ কধাগান যে মিজে সিয়েন কন্না কোই পারিবো?”