ইয়োব 23 - Chakma Bible

ইয়োবর জোব্ দেনা

¹ সেক্কেনে ইয়োবে জোবত্ কলঅ,

² এবঅ মঅ কানানিগান দুঘে ভরা; মুই ছত্‌ফদাঙর্, তো গোজেনর গুওর্ আঢ্‌‌তান মঅ উগুরে রোইয়্যে।

³ যুনি বানা হবর্ পেদুঙ্ কুদু তারে পাহ্ যায়, যুনি তে থাইদে জাগানত্ মুই যেই পাত্তুং,

⁴ সালে মুই তাইদু মঅ আবিত্তিগান জানেদুং আর মর্ নিজোর পক্কেদি ভালোক্কানি কধা কদুং।

⁵ সেক্কেনে তে মরে কি জোব্ দিদো সিয়েন হবর্ পেদুং, আর যিয়েনি কদঅ সিয়েনি বুজি পাত্তুং,

⁶ তে কি খেমতালোই মঅ সমারে সোল্ গুরিদো? নাদে, তে মন্দি মনান্ দিদো।

⁷ সেক্কে এক্কো গম্ মান্‌জ্যে‌‍‌ ‌তাইদু আবিত্তি জানেই পারিদো; মঅ বিচেরগ আঢত্তুন সারা উমরত্তে মুই উদ্বোর্ পেদুং।

⁸ মাত্তর মুই যুনি পূগেদি যাং সিয়েনত্ তে নেই; যুনি পোজিমেদি যাং সিয়েনত্অ তারে তোগেইনে পাহ্ ন-যায়।

⁹ উত্তোরেদি তে যেক্কেনে কাম গরে সেক্কেনে তারে দেগা ন-যায়; তে দোগিনেদি ফিরিলে মুই তারে ন-দেগং।

¹⁰ মাত্তর্ মুই কন্ পধেদি আঢঙর্ সিয়েন তে হবর্ পায়; তে মরে জগা চেলে মুই আজল্ সনা ধোক্ক্যেন্ ওম্।

¹¹ মুই বিশ্বেজ্ গুরিনে তা পিজেদি আঢঙর্; ভান্ন্যেই পধেদি ন-যেইনে মুই তা পধেদি যেইয়োং।

¹² তা উগুমানিত্তুন্ মুই সুরি ন-এজং; মর্ নিত্য খাইদে জিনিজোত্তুন্অ বেশ্ তা মুয়ো কধানি মুই বোউত্ দাম দুয়োং।

¹³ মাত্তর্ তে বেক্কানিত্ থির্ থায়, কনজনে তারে মানা গুরি ন-পারন্; তার্ যিয়েন হুজি তে সিয়েনই গুরিদো।

¹⁴ তে মত্তেই যিয়েন ঠিগ্ গুরি রাগেয়্যে সিয়েনই গরে; এবাবোত্যে বোউত্ সল্লা তার্ এজঅ জমা রোইয়্যে।

¹⁵ সেনত্তে মুই তা মুজুঙোত্ অমকদ দরাং; ইয়েনি ভাবিলে তারে মর্ দর্ লাগে।

¹⁶ গোজেনে মঅ মনান্ ভাঙি দিয়্যে; বেগত্তুন খেমতাবলা গোজেনে মরে অমকদ দর্‌বুগ লাগেয়্যে।

¹⁷ যুনিও আন্ধারানে মঅ মুয়োন ঢাক্যে এলঅ তো সিয়েনে মরে জুরো গুরি রাগেই ন-পারে, ঘুর্‌ঘুজ্যে আন্ধারানেয়ো সিয়েন ন-পারে।