ইয়োব 21 - Chakma Bibleইয়োবর্ জোব্ দেনা 1 সেক্কেনে ইয়োবে জোবত্ কলঅ, 2 তুমি মঅ কধাগান মন দিইনে শুনো; সিয়েনই অবদে মরে দিয়্যে তমার সান্তনা। 3 মঅ কধাগান কবার সময়োত্ তুমি মরে সোজ্য গোজ্য; কনা থুম্ অলে সে পরেদি ঈচ্ গোজ্য। 4 মঅ নালিশ্ছান কি মানুচ্চুনো ইদু? কিত্তেই মুই অধৈজ্জ্য ন-ওম্? 5 মইন্দি চেইনে তুমি আমক্ অ; তমার্ মুয়োন্দি আঢ্তান চাহ্বি দুয়ো। 6 এ কধানি মনত্ তুলিলে মুই দরাং; মঅ কিয়্যেত্ গির্গিরেনি উদে। 7 শদানুনে কিত্তেই বাঁজি থান্ আর কিত্তেই বা বুড়ো অন্? কিত্তেই তারার্ বলান্ বাড়ে? 8 তারার্ চেরোকিত্তে থান্ তারার্ পূঅ-ছাগুনে, আর তারার্ চোগো মুজুঙোত্ থান্ তারার্ নাদিন্-পুদিনুনে। 9 তারার্ ঘরানি নিরাপদ আর দর্নেইয়্যে থায়; গোজেনর সাজা তারা উগুরে ন-থায়। 10 তারার্ বলদ গোরুগুন এগত্তর্ অলে সিয়েন্ কনদিন বিফল ন-অয়; তারার্ পাড়ী গোরুগুনে ছঅ ফুদোন্, তারার্ পেত্তুন্ বর্বাত্ ন-যায়। 11 ভেড়া পালঅ ধোক্ক্যেন্ তারার্ ঝি-পূঅগুনোরে তারা বারেদি পাদান্; তারা ভেড়া ছঅ ধোক্ক্যেন্ নাজি নাজি বেড়ান্। 12 তারা খঞ্জনি আর সুরবাহার বাজেইনে গান গরন্; বাশীর সুর্ শুনিনে রঙ্গ-ফুত্তি গরন্। 13 তারা গমেডালে তারার্ দিনুন্ কাদান্ আর সুগে-শান্দিয়্যে গোরত্ লামি যান। 14 তো তারা গোজেনরে কন্, আমা কায়-কুরেত্তুন্ তুই দূর্ অ; তর্ পথ্তান্ জানিবার আওজ্ আমাত্তুন্ নেই। 15 সেই বেগত্তুন্ খেমতাবলা গোজেনে কন্না, আমি তারে সেবা গুরিবোং? তাইদু তবনা গুরিলে আমার কি লাভ অবঅ? 16 মাত্তর্ তারার্ ফলেদেগান দঅ তারার্ নিজো আদত্ নয়, সেনত্তে মুই শদানুনোর্ সল্লাত্তুন্ দূরোত্ থাং। 17 আজলে কি শদানুনোর্ পহ্রান্ মুরি যেবগোই? কদকবার্ বা তারা উগুরে দযা এবঅ? কদকবার গোজেনে রাগে তারারে সাজা দিবো? 18 কদক্বার্ তারা বোইয়্যের মুয়োত্ ঘাস ধোক্ক্যেন্ অন্ আর ঝড়র মুয়োত্ উড়ি যেইয়্যে তুজো ধোক্ক্যেন্ অন্? 19 মান্জ্যে কন্, এক্কো মান্জ্যর সাজা গোজেনে তা পূঅগুনোত্তে জমা গুরি রাগায়। মাত্তর্ গোজেনে যেনে সেই মানুচ্চুনোরে সাজা দে যেনে তে তার্ দুজ্ছান বুঝি পারে। 20 তে নিজো চোগেদি নিজোর ভস্ত অনাগান্ দেগোক্; তে বেগত্তুন্ খেমতাবলা গোজেনর রাগ্কান্ হেই চোগ্। 21 তা আয়ুগান যেক্কেনে থুম্ ওই যেবঅ সেক্কেনে কি তে তার্ ফেলে যেইয়্যে গিরিত্তে চিদে গুরিবো? 22 কনজনে কি গোজেনরে জ্ঞান দি পারিবো? তে দঅ স্বর্গদূত্তুনোর্অ বিচের্ গরে। 23 কনজনে ভর্পুনং বল্লোই, সুগে-শান্দিয়্যে আরামে থেইনে মুরি যান; 24 তার্ কিয়্যেগান পুষ্ট অয় আর হাড়ুনোত্ যদেষ্ট মগজ্ থায়। 25 আরঅ কনজনে কনদিন্অ গমানি ভোগ্ ন-গরন্ তিদে পরাণদোই মুরি যান। 26 তারা একই মাধিত্ পড়ি থান্; পুগে তারার্ দ্বিজনরে ঢাগি ফেলেয়োন। 27 “তুমি যিয়েন্ মনে গরর্ সিয়েন্ মুই গমেডালে হবর্ পাং; মঅ বিরুদ্ধে তমার্ বেক্ কধানি মর্ জানা আঘে। 28 তুমি কত্তে, ‘ইক্কিনে কুদু গেলঅ সেই দাঙর্ মানুচ্চোর ঘরান্? কুদু গেল সে পাজি মানুচ্চোর তাম্বুলান্?’ 29 তুমি কি কনদিন্অ পোথ্য মানুচ্চুনোরে এ পৌইদ্যেনে পুযোর্ গোজ্য? তুমি কি তারার্ এ কধানির কনঅ দাম ন-দিবা যে, 30 শদান্ মান্জ্যে দযাত্ পড়িলে রেহাই পান আর রাগ্ উদিলে রোক্ষ্যে পান্? 31 তা খাচ্চ্যদর্ কধানি কন্না তা মুয়ো উগুরে কবঅ? তে যিয়েনি গোজ্যে তার্ ফলুন্ কন্না তারে দিবো? 32-33 যেক্কেনে তারে গোরত্ বুয়োই নেযা অবঅ সেক্কেনে বেক্ মানুচ্চুনে তা পিজেদি আঢিবাক্, আর গুণি ন-পুড়েইয়্যে মান্জ্য ভিড়োত্ তা আগে আগে যেবাক্। তা গোরান্ চুগি দিয়্যে অবঅ; কিঝিঙোর্ মাদিগান্অ তারে কনঅ দুঘ্ ন-দিবো। 34 সেনত্তে তমার্ এ দাম্নেইয়্যে কধালোই কেধোক্ক্যেন্ গুরিনে তুমি মরে সান্তনা দি পারিবা? তমা উগুরে মিজে বাদে দঅ আর কিচ্ছু নেই।” |
Copyright © 2021 Bangladesh Bible Society
Bangladesh Bible Society