ইয়োব 20 - Chakma Bibleসোফরর দ্বিলম্বর কধা 1 সেক্কেনে নামাথীয় সোফরে জোবত্ কলঅ, 2 মর্ চিদেগানে মরে জোব্ দিবাত্তে বাধ্য গোজ্যে, কিয়া মুই অমকদ উত্তেজিত ওইয়োং। 3 মুই এন্ গেইল্ শুন্যং যিয়েনে মরে অসর্মান গোজ্যে; মঅ বুদ্ধিগানে জোব্ দিবাত্তে মরে জোর্ গোজ্যে। 4 তুই হামাক্কাই হবর্ পাজ্ সেই পুরোণা দিনোত্তুন্ ধুরিনে, পিত্থিমী উগুরে মান্জ্যরে থিদেবর্ গরানার্ পরেত্তুন্ ধুরি, 5 শদানুনোর্ রঙ্গ-ফুত্তি কানক্কণ্। গোজেন উগুরে ভোক্তি নেইয়্যেগুনোর হুজিগান্ বানা কানক্কণত্তে থায়; 6 তা সর্মানান্ যুনিয়ো আগাজ্ সং লুমেগোই আর মাধাবো আগাজত্ বাজে, 7 তো তে নিজো ঘু ধোক্ক্যেন্ উমরত্তে ভস্ত ওই যেবঅ। যিগুনে তারে দেখ্যন্ তারা কবাক্কে, কুদু গেলঅ তে? 8 স্ববন ধোক্ক্যেন্ তে মিলেই যেবঅ, তারে আর পাহ্ ন-যেবঅ; রেদোত্ দেগেদে ধোক্ক্যেন্ তে আদিক্ক্যেনগুরিনে আজি যেবগোই। 9 যিগুনে তারে দেগিদাক্ তারা আর তারে ন-দেগিবাক্; তার্ থেবার জাগায়ানেয়ো আর তারে ন-দেগিবো। 10 নাদামানুচ্চুনোর ক্ষতিপূরণ তার ঝি-পূঅগুনোত্তুন্ গরা পুরিবো; তাত্তুন্ নিজোর আদে তার্ ধন-সোম্বোত্তিগানি ফিরেই দিয়্যে পুরিবো। 11 গাবুজ্যে বল্লোই ভর্পুনং তার্ আড়ুন তা লগে ধূল্যেলোই পড়ি থেবাক্। 12 বজঙানি যুনিয়ো তা মুয়োদি মিদে লাগে আর তে জিলান তলে সিয়েন্ লুগেই রাগায়, 13 যুনিয়ো তে সিয়েনি ছাড়িবাত্তে ন-চেইনে মো ভিদিরে থোয় দে, 14 তো সেই হানাগান্ তা পেদত্ যেইনে হর ওই যেবঅ; তা ভিদিরে সিয়েন্ সাপ বিষো ধোক্ক্যেন্ অবঅ। 15 যে ধন-সোম্বোত্তিগানি তে গিল্যে সিয়েনি তে উগুলি দিবো; গোজেনে তা পেদত্তুন্ সিয়েনি নিগিলেই ফেলেব। 16 তে সাপ বিষ চুজিবো; সাপ্পো তার্ বিষ দাত্তোই তারে মারে ফেলেব। 17 দই আর মধুর্ গঙারান্ তে আর্ ন-দেগিবো। 18 যাত্যে তে কাম্ গোজ্যে সিয়েনি ভোগ্ ন-গুরিনে ফিরেই দিয়্যে পুরিবো; বেবসার্ লাভ্অ তে আর ভোগ্ ন-গুরিবো; 19 কিয়া তে নাঢা মানুচ্চুনোরে অত্যেচার আর য়েলাফেলা গোজ্যে, আর যে ঘরান্ তে নিজে ন-বানায় সিয়েন্ গজক্ গুরি নেযেয়্যে। 20 “তে আমিঝে লুভ্ গরে, সেনত্তে তে কিচ্ছু রোক্ষ্যে গুরি ন-পারিবো। 21 গজক্ গরেদে ধোক্ক্যেন্ তার্ আর কিচ্ছু বাগি ন-থেবঅ; তার সুভাগ্যগান্ থিদেবর্ ন-অবঅ। 22 তার বোউত্ কিজু থানার্ সময়ত্অ তে দুঘোত্ পুরিবো। দুঘ্কানে তার্ পুরো খেমতালোই লোইনে তা উগুরে এবঅ। 23 তার্ পেট ভুরিবার সময়ত্ গোজেনে তার্ জোল্জোল্যে রাগ্কান তা উগুরে ঢালি দিবো, সিয়েন্ ঢালি দিবো ঝড় ধোক্ক্যেন্ গুরিনে। 24 যুনি তে লুয়োর্ আত্যার্ আধত্তুন্ ধেই যায়, সালে পিদল ধনুত্তুন্ সেল্লো তারে ফেলেব। 25 সেই জোল্জোল্যে সেলঅ আল্লুয়ো তা পিত্তবোত্তুন্ নিগিলিবো, তে তার্ কিয়্যেগানত্তুন্ সিবে টানিনে নিগিলেব। নানান্ বাবোত্যে দর্ তা উগুরে এবঅ। 26 তার ধনানিত্তে ঘুর্গুজ্যে আন্ধারানে বাজ্জেই আঘে। যে আগুনান্ মান্জ্যে ন-লাগান সে আগুনানে তারে পুড়ি ফেলেব আর তা তাম্বুলোর বাদবাগি বেক্কুনোরে গজক্ গুরিবো। 27 আগাজ্ছানে তা অন্যেয়ানরে ফগদাঙ্ গুরি দিবো; পিত্থিমীগানে তা বিরুদ্ধে থিয়্যেব। 28 বান পানিয়্যে তা ঘরানর বেক্কানি নেযেব, গোজেনর রাগর্ দিনোত্ সিয়েনি পুরোপুরি ধোয় নেযেব। 29 গোজেনে শদানুনোত্তে এবাবোত্তে গুরিনে ঠিগ্ গুরি রাগায়; সিয়েন অলদে তারাত্তে গোজেনর দিয়্যে অধিকার।” |
Copyright © 2021 Bangladesh Bible Society
Bangladesh Bible Society