ইয়োব 2 - Chakma Bibleইয়োবর দ্বিলম্বর পোরোক্ষ্যে 1 আর একদিন্যে স্বর্গদূত্তুনে লগেপ্রভুর মুজুঙোত্ যেইনে লুমিলাক্, আর শদান্নোয়ো তা মুজুঙোত্ আঝিল্ অবাত্তে স্বর্গদূত্তুনোর্ সমারে এলঅ। 2 লগেপ্রভু শদান্নোরে কলঅ, “তুই কুত্তুন্ এচ্ছোস্?” জোবত্ শদান্নো লগেপ্রভুরে কলঅ, “পিত্থিমীর ভিদিরে ইন্দি-উন্দি ঘুরিনে এলুঙ্।” 3 সেক্কে লগেপ্রভু শদান্নোরে কলঅ, “মঅ চাগর্ ইয়োব ইন্দি কি তুই রিনি চেইয়োচ্? পিত্থিমীত তা ধোক্ক্যেন্ আর কনজন নেই। তে নিদ্দুজি আর গম্। তে মরে ভোক্তি গুরিনে দরায় আর ভান্ন্যেইয়ত্তুন্ দূরোত্ থায়। যুনিয়ো তে এনেবাদে তারে নাশ গুরিবাত্তে মরে উচ্ছোমি তুলি দিয়্যে তো তে এজঅ কনঅ দুজ্ ন-গরে।” 4 শদান্নো কলঅ, “তা জীংকানিগান তাইদু পরাণর পরান; মানুচ্ নিজো পরাণান বাঁজেবাত্তে তার্ যিয়েনি আঘে বেক্কানি দিবো। 5 তুই আঢ্ বাবেইনে তা কিয়্যেত্ আঘাত্ গর্, তে হামাক্কাই তঅ মুজুঙোত্ তঅ বিরুদ্ধে অগমান কধা কবঅ।” 6 সেক্কে লগেপ্রভু শদান্নোরে কলঅ, “ঠিগ্ আঘে; তারে তঅ আঢত্ দিলুঙ্, মাত্তর্ তুই তারে পরাণে ন-মারিবে।” 7 ইয়েন পরেদি শদান্নো লগেপ্রভুর মুজুঙোত্তুন্ নিগিলি গেলঅ আর ইয়োবর মাধাবো তাল্লোত্তুন্ ধুরিনে টেঙঅ পাদা সং চুলোনি-পড়ানি ঘালোই তারে দুঘ্ দিয়্যে ধুরিলো। 8 সেক্কে ইয়োবে ছেইয়োর সংমোধ্যে বজিনে সার্ভাঙালোই নিজো কিয়্যেগান্ ঘজা ধুরিলো। 9 সেক্কে তা মোক্কো তারে কলঅ, “তুই এজঅ দাবি গরত্তে, তুই নিদ্দুযি? গোজেনরে দুজ্ দিইনে মুরি যাহ্।” 10 মাত্তর্ ইয়োবে তারে কলঅ, “তুই এক্কো বেদমা মিলে ধোক্ক্যেন্ কধা কোইয়োচ্। আমি গোজেন ইত্তুন্ কি বানা ভালেদি চেবং, অমংগল ন-চেবং?” ইয়েনি ঘুদি গেলেয়ো ইয়োবে তা কধালোই পাপ ন-গুরিলো। ইয়োবর তিন্নো সমাজ্যে 11 তৈমনীয় ইলীফস, শূহীয় বিল্দদ আর নামাথীয় সোফর নাঙে ইয়োবর তিন্নো সমাজ্যে যেক্কেনে ইয়োবর বেক্ দযার্ কধানি শুনিলাক্ সেক্কে তারা ঘরত্তুন্ যাহ্ ধুরিলাক্। তারা এগত্তর্ ওইনে সল্লা গুরিলাক্, তারা যেইনে তা সমারে আবিলেচ্ হেবাক্ আর তারে বুঝেবাক্। 12 তারা দূরোত্তুন্ তারে দেগিনে চিনি ন-পারিলাক্। তারা দাঙর্ দাঙর্ গুরি কানা ধুরিলাক্ আর নিজো কাবড়ানি ফাদিনে মাধা উগুরে আগাজ ইন্দি ধূল্যে ছিদিলাক্। 13 সে পরেন্দি তারা সাত দিন আর সাত রেত্ সং তা সমারে মাদিত্ বজিনে থেলাক্। তারা ভিদিরেত্তুন্ কনজনে তারে কিচ্ছু ন-কলাক্, কিত্তেই তা দুঘ্কান যে জদবদে সিয়েন তারা দেগদন। |
Copyright © 2021 Bangladesh Bible Society
Bangladesh Bible Society