ইয়োব 19 - Chakma Bibleইয়োবর জোব্ দেনা 1 সেক্কেনে জোবত্ ইয়োবে কলঅ, 2 তুমি আর কদক্কণ মঅ মনানত্ দুঘ্ দিবা আর কধালোই মরে কট্টা কট্টা গুরিবা? 3 তুমি ভালোক্ বার মরে অগমান গোজ্য; লাজ্নেইয়্যেগুরিনে তুমি মঅ লগে চিৎগিলে নেইয়্যে ধোক্ক্যেন্ বেবহার গোজ্য। 4 যুনি হামাক্কাই মুই ভান্ন্যেই পধেদি যেই থাং, সালে সিয়েনর্ ফল দঅ মর্ গায় গায় পাওনা। 5 যুনি হামাক্কাই তুমি আমা উগুরে নিজোরে অজল্ গুরিবাত্তে চঅ, মর্ এ তলেদি অবস্থাগান্দোই মঅ দুজ্ছান ফগদাঙ্ গুরিবাত্তে চাজ্, 6 সালে জানি লঅ, গোজেনে মঅ উগুরে অন্ন্যেই গোজ্যে; নিজো জাল্লোই তে মরে ঘিজ্যে। 7 মঅ উগুরে অন্ন্যেয় গরা ওইয়্যে বিলিনে রঅ ছাড়িলেয়ো মুই কনঅ জোব্ ন-পাং; কানাকুদি গুরিলেয়ো কনঅ বিচের্ ন-পাং। 8 তে মঅ পথ্তানত্ টেঙেরা দিয়্যে বিলিনে মুই পার্ ওই ন-পারঙর্; মর্ বেক্ পথ্তানত্ তে আন্ধারলোই ঢাগি দিয়্যে। 9 তে মঅ সর্মানান তুলি নেযেয়্যে, মাধা উগুরেত্তুন্ মুকুট্তো সোরেই নেযেয়্যে। 10 তে বেক্কানিত্তুন্ মরে আঘাত্ গোজ্যে যেদক্কণ সং মুই শেজ্ ওই ন-যাং; গাজ ধোক্ক্যেন্ গুরিনে তে মঅ আজাগান উগুরে ফেলেয়্যে। 11 মঅ বিরুদ্ধে তার্ রাগ্কান্ জ্বলের্; তা শত্রুগুনোর এক্কো বিলিনে তে মরে মনে গরের্। 12 তা সৈন্যগুনে দল বুধিনে উজেই যাদন্; আক্রমণ গুরিবাত্তে তারা মঅ বিরুদ্ধে দেবাল পার্ অবাত্তে পথ্তান্ যুক্কোল গোজ্যন্, মঅ তাম্বুলো চেরোকিত্তে ঘিরি ফেল্যন্। 13 তে মত্তুন্ মঅ ভেইয়ুনোরে ফারগ্ গুরি দিয়্যে; মরে চিন্যে মানুচ্চুনে ন-চিনেদে ধোক্ক্যেন্ বেবহার গরন্। 14 মঅ কুদুম্মোগুনে যেয়োন্দোই; মঅ সমাজ্যেগুনে মরে পুড়ি ফেল্যন্দোই। 15 মর্ গর্বাগুনে আর চাগরানীগুনে মরে যেনে ন-চিনো্ন্; তারা মরে বিদেশী ইজেবে দেগন্। 16 মঅ চাগর্বোরে ডাগিলে তে সাড়া ন-দে, নিজো মুয়োদি কোজোলি গুরিলেয়ো জোব্ ন-দে। 17 মঅ মোক্কো মর্ নিজেস্ছুন ঘিনেই; মঅ নিজো ভেইয়ুনেয়ো মরে জঘন্য বিলিনে মনে গরন। 18 এমন্ কি, চিগোন্ ঝি-পুঅগুনেয়ো মরে ঘিনেন্; মুই থিয়্যেলে তারা মরে ঠাট্টা-তামাজা গরন্। 19 মর্ বেক্ সদর্ সমাজ্যেগুনে মরে ঘিনেন্; মুই যিগুনোরে কোচ্পাং তারা মঅ বিরুদ্ধে থিয়্যেইয়োন। 20 মুই ইক্কিনে আড়-চামাড়া বাদে আর কিচ্ছু নয়, বানা পরাণান্দোই বাঁজি আগং। 21 ও মঅ সমাজ্যেগুন, মর্ পিরেগান্দোই পিরে পঅ, কিয়া গোজেনর আঢ্তানে মরে আঘাত্ গোজ্যে। 22 গোজেন ধোক্ক্যেন্ কিত্তে তুমি মঅ পিজেদি লড়র্? তুমি কি মরে দুঘ্ দেনা ন-থামেবা? 23 “হায়, মর্ বেক্ কধানি যুনি লেগা অদঅ! সিয়েনি যুনি বোইয়োর পাদাত্ থেদঅ! 24 যুনি পাত্তরর্ ফলগত্ লুয়োর্ যন্ত্র আর সীজেলোই জিংকানিবর্ সিয়েন্ খোদাই গোজ্যে থেদঅ! 25 মুই হবর্ পাং মর্ উদ্ধোর গুরিয়্যেবো জেদা আঘে; যেরেদি তে পিত্থিমীগান উগুরেদি এইনে থিয়্যেব। 26 মঅ চামাড়াগান ভস্ত ওই যানার পরেন্দিয়ো মুই জেদা বাদে গোজেনরে চেই পেম্। 27 মুই নিজে তারে চেই পেম্; অন্য বাবোত্যে গুরি নয়, মাত্তর্ মুই মঅ নিজো চোগেদি তারে চেই পেম্। মর্ মনানে গমেডালে সিয়েন্ চার্। 28 যুনি তুমি কঅ, ‘দুঘোর্ গড়াগান তা ভিদিরে রোইয়্যে বিলিনে আমি তারে দুঘ্ দির্,’ 29 সালে লাম্বা ছুড়িগানর্ দরানাগান্ তমাত্তুন্ থানা উচিত্, কিত্যে গোজেন রাগ্কান লাম্বাছুড়িগান দিইনে সাজা আনিবো; আর এবাবোত্যেগুরি তুমি হবর্ পেবা, বিচের্ আঘে।” |
Copyright © 2021 Bangladesh Bible Society
Bangladesh Bible Society