ইয়োব 18 - Chakma Bibleবিল্দদর দ্বিলম্বর কধাগান 1 সেক্কেনে শূহীয় বিল্দদে জোবত্ কলঅ, 2 তর্ এ কধানি কনা কক্কে থুম্ অবঅ? তুই গমেডালে চিদে গর্, সালে আমি কধা কোই পারিবোং। 3 আমারে কিত্তে য়েমান ধোক্ক্যেন্ মনে গরর্? তমা চোগোত্ কিত্তে আমি বুদ্ধি নেইয়্যে ওইয়্যেই? 4 তুই দঅ রাগে নিজোরে কট্টা কট্টা গরর্; তত্তেই কি পিত্মিগান ছাড়ি যাহ্ পুরিবো? নাকি মুড়োগুনোরে তা জাগানত্তুন্ সোরেই দিয়্যে পুরিবো? 5 “শদানুনোর্ চেরাগ্কুন্ মারেই ফেলা অবঅ; তা আগুনোর জিলান্ ন-জুলিবো। 6 তা তাম্বুলো ভিদিরে পহ্রান্ আন্ধার অবঅ; তা কায়-কুরে রাগেয়্যে পহ্রান্ মুরি যেবঅ। 7 তার্ আদিবার বলান্ বল্পোজ্যে অবঅ; তা দিয়্যে সল্লাগানে তারে তলেদি ফেলেই দিবো। 8 তা টেঙানে তারে জাল ভিদিরে ঠিলি ফেলেব; তে সেই জাল ভিদিরে টেঙ্ দিবো। 9 তা টেঙঅ মুড়িবো ফালত্ পুরিবো, আর ফাল্ পাদানাগানে তারে আক্সোই রাগেব। 10 তাত্তেই মাদিত্ হেবা লুগেয়্যে থেবঅ; তা পথ্তানত্ ফাল্ পাত্যে থেবঅ। 11 দরান্ তা চেরোকিত্তে থেবঅ; তা পত্তি পোইধেত্ সিয়েনে তার্ পিজে থেবঅ। 12 দযাগানে তাত্তেই আগুরি আঘে; তে পুড়ি গেলে ভস্তগানে তাত্তেই যুক্কোল্ ওই আঘে। 13 সিয়েনে তা কিয়্যের্ চামানি খেই ফেলেব; মরণর পত্তম পূঅবো তার্ পুরো কিয়্যেগানরে গিলিবো। 14 তা তাম্বুলানর নিরাপদ অবস্থাত্তুন্ তারে উগুরে ফেলা পুরিবো; তারে নেযা অবঅ দর্ গরেপারা-রাজা ইদু। 15 তা তাম্বুলোত্ তার্ নিজোর কিচ্ছু ন-থেবঅ; তা থেবার্ ঘরান উগুরে জোল্জোল্যে গন্ধক ছিদি দিয়্যে অবঅ। 16 তলেদি তার্ শিঙোরান্ শুগেই যেবঅ আর উগুরে তার্ ডেলা-পাদানি মুরি যেবঅ। 17 পিত্থিমীত্তুন্ তা স্মৃতি উদি যেবঅ; দেজত্ তা নাঙান্ ন-থেবঅ। 18 তারে পহ্রত্তুন্ আন্ধারত্ দূর্ গরা অবঅ; সংসারত্তুন্ তারে ধাবেই দিয়্যে অবঅ। 19 নিজো জাদ ভিদিরে তার্ কনঅ গুট্টি ন-থেবাক্; তে যিদু থেদঅ সাৎ সিয়েনত্ আর কনজন ন-থেবাক্। 20 পোজিম্ দেজর মানুচ্চুনে তার দুর্ভাগ্যত্যেগান্ দেগিনে আমক্ অবাক্, আর পুগ দেজর মানুচ্চুনোর অমকদ দর্ লাগি যেবঅ। 21 শদান মানুচ্চুনোর থেবার ঘরানি হামাক্কাই এবাবোত্যে অবঅ; যে গোজেনরে হবর্ ন-পায় তার্ দজাগান্ এবাবোত্যে অবঅ।” |
Copyright © 2021 Bangladesh Bible Society
Bangladesh Bible Society