ইয়োব 16 - Chakma Bibleইয়োবর জোব্দেনা 1 সেক্কে জোবত্ ইয়োবে কলঅ, 2 মুই এবাবোত্যে কধা বোউত্ শুন্যং; কি বাবোত্যে দুঘ্ দিয়্যে সান্তনাগুরিয়্যে তুমি বেক্কুন! 3 তমার্ এ সুর্বোত্যে বোইয়্যের ধোক্ক্যেন্ কধানি কনদিন্অ কি থুম্ ন-অবঅ? তমারে কিয়্যে পেইয়্যে, তুমি তর্ক গরা ধোজ্য? 4 তমা অবস্থাগান যুনি মঅ ধোক্ক্যেন্ অদঅ সালে মুইয়ো তমা ধোক্ক্যেন্ কধা কোই পাত্তুং, তমা বিরুদ্ধে বোউত্ কধা কোই পাত্তুং আর তমারে দেগিনে মাধাবোয়ো লারে পাত্তুং। 5 মাত্তর্ মুই সিয়েন্ ন-গুরিদুঙ্, বরং মঅ মুয়োনে তমারে উচ্ছোমি দিদো; মঅ মুয়োর্ বুঝেবার কধানিয়ে তমারে সুগ্ দিদো। 6 কধা কলেয়ো মঅ পিড়েগান ন-কমে; জুরো গুরি থেলেয়ো সিয়েন্ দূর্ ন-অয়। 7 ও গোজেন, তুই দঅ মরে ক্ষয় অবাত্তে দুয়োজ্; মর্ পুরো সংসারানরে তুই ভস্ত গুরি ফেলেয়োচ্। 8 তুই মঅ কিয়্যেগান্ শুগেই ফেলেয়োজ্, আর সিয়েন মঅ বিরুদ্ধে সাক্ষী ওইয়্যে; মঅ শুগুনো চেঙারাগানে মঅ বিরুদ্ধে সাক্ষি দের্। 9 গোজেনে মরে জদবদে আক্রমণ গোজ্যে আর রাগে মরে কট্টা কট্টা গোজ্যে; তে মরে দেগিনে দাত্ কামারার্; মঅ বিপক্ষগুনে মঅ বিরুদ্ধে চোগ্ তুল্যন্। 10 মরে ঠাট্টা গুরিবাত্তে মান্জ্যে মুয়োন্ খুল্যন্; ঘিনেইনে তারা মঅ গালানত্ চুয়োর্ মাজ্যন্ আর মঅ বিরুদ্ধে একলগে এগত্তর্ অন্। 11 বজং মানুচ্চুনো ইদু গোজেনে মরে তুলি আন্যে; শদান্ মানুচ্চুনো আধত্ তে মরে ফেলেই দেগি। 12 মুই গমেডালে এলুং মাত্তর্ তে মরে দি ভাগ্ গোজ্যে; মঅ গত্তনাবো ধুরিনে তে মরে আজার্ মাজ্যে। তে মরে তা সেল্লো তাগেদে জাগায়ান বানেয়্যে। 13 তা ধনুবলাগুনে মরে ঘিরি ফেল্যন্; চিৎনেইয়্যে মান্জ্য ধোক্ক্যেন্ তে মঅ বুক্কো ফাদি দিয়্যে আর মঅ ভারাল্লো মাদিত্ ঢালি দিয়্যে। 14 বার্ বার্ তে মর্ রোক্ষ্যে গুরিয়্যে-দেবালান্ ভাঙি ফেলেয়্যে, যুদ্ধো গুরিয়্যে ধোক্ক্যেন্ তে মঅ ইন্দি ধাবা ধাবা এচ্চ্যে। 15 মঅ কিয়্যেগান উগুরে মুই বস্তাপাদা বেড়েয়োং; মঅ বার্বো গরানাগান্ মুই ধূল্যেত্ ফেলেই দুয়োং। 16 কানদে কানদে মঅ মুয়োন্ রাঙা ওইয়্যে, মঅ চোগো তলেদি কালি পোজ্যে; 17 তো মুই কাররে অত্যেচার্ ন-গরং মঅ তবনাগান খাটি আঘে। 18 ও পিত্থিমীগান্, মঅ লো-গান্ ঢাগি ন-দিজ; মঅ কানানাগান্ যেনে আমিঝে শুনো যায়। 19 ইক্কিনিয়ো মঅ সাক্ষীগুন্ স্বর্গত আগন্; মঅ পক্ষেদি যিবে কধা কবঅ তে উগুরে আঘে। 20 যিবে মঅ পক্ষেদি আঘে তে মর্ সমাজ্যে, আর মুই গোজেন ইদু চোগো পানি ফেলাং। 21 মান্জ্যে যেধোক্ক্যেন্ সমাজ্যে পক্ষ ওইনে কধা কন্ সেধোক্ক্যেন্ যুনি বানা একজনে মঅ পক্ষ ওইনে গোজেন ইদু কধা কোই পারিদো! 22 মর্ দঅ আর কয়েক্কো বজর পরেদি সে পধেদি যাহ্ পুরিবো যে পথ্তানদি গেলে আর মুই ন-ফিরিম্। |
Copyright © 2021 Bangladesh Bible Society
Bangladesh Bible Society