ইয়োব 15 - Chakma Bibleইলীফসর দ্বিলম্বর কধা 1 সেক্কেনে তৈমনীয় ইলীফসে জোবত্ কলঅ, 2 কনঅ জ্ঞানী মান্জ্যে কি এধোক্ক্যেন্ গুরিনে অনত্তক্ কধা কবঅ বা পূগো গরম বোইয়্যেরলোই পেত্ ভোরেব? 3 তে কি দগ্ন্যেই কধালোই তাদাতাদি গুরিবো না কি দাম্নেইয়্যে কধা কবঅ? 4 মাত্তর্ তুই দঅ গোজেনরে ভোক্তিলোই দরানা ছাড়ি দুয়োচ্ আর গোজেন ইদু তবনা গরানা কমে দুয়োচ্। 5 তঅ পাবত্তে তুই এধোক্ক্যেন্ গুরিনে কধা কর্ আর কধা কত্তে চালাক্ মান্জ্য ধোক্ক্যেন। 6 মুই নয়, মাত্তর্ তঅ নিজো মুয়োনে তরে দুযি গোজ্যে; তুই তর্ নিজো বিরুদ্ধে সাক্ষি দুয়োর্। 7 মান্জ্য ভিদিরেত্তুন্ কি তুই পত্তমে জোর্মেয়োজ্? মুড়োমুড়িগুনোর্ জর্মর আগেদি কি তর্ জর্ম ওইয়্যে? 8 গোজেনর সল্লাগানির্ কধা কি তুই শুন্যচ্? তুই কি গায় গায় পুরো জ্ঞানানর্ গিরোজ্? 9 তুই এন্ কি হবর্ পাজ্ যিয়েনি আমি হবর্ ন-পেই, আহ্ এন্ কি বুঝোজ্ যিয়েনি আমি ন-বুজিই? 10 আমা ভিদিরে এন্ এক্কো আঘে যিবের্ চুল্ পাক্যে, যিবে বুড়ো; তা বয়সছান্ তঅ বাবঅ বয়জত্তুন্অ বেশ্। 11 গোজেনর দিয়্যে বুঝোনা কি তর্ পক্ষে যদেস্ট নয়? সে কধাগান দঅ গমেডালে তরে কুয়ো ওইয়্যে। 12 তঅ মনানে কিত্তে তরে দূরোত্ সরায়? তঅ চোগ্কুন কিত্তেই রাগে জুলি উদের্? 13 ইয়েন্দোই দঅ তুই গোজেন বিরুদ্ধে রাগ গোজ্যস্ আর এ বেক্ কধানি তঅ মুয়োত্তুন্ নিগিলেয়োচ্। 14 মানুচ্চুন কন্না, তে খাটি ওই পারে? মিলেগুনোর পেদত্তুন্ যে জোর্মেয়্যে তে কন্না, নিদ্দুযি ওই পারে? 15 গোজেনে যুনি তা দূত্তুনো উগুরে বিশ্বেজ্ রাগেই ন-পারে, তা চোগেদি যুনি আগাজ্চান্অ খাটি ন-অয়, 16 সালে মানুচ্ যে অমকদ বজঙ্ আর পানি ধোক্ক্যেন্ বজঙানি খান্, তে কনমতে খাটি ওই ন-পারে। 17 মঅ কধাগান শুন্, মুই তরে বুঝেইনে কোম্; মুই যিয়েন্ দেখ্যং সিয়েন্ মুই তরে কোম্। 18 জ্ঞানী মানুচ্চুনে সিয়েনি তারার্ পূরোণি মানুচ্চুনো ইত্তুন্ পেইয়োন আর সিয়েনি বেক্কানি ফগদাঙ্ গোজ্যন। 19 বানা তারা আধত্ দেজ্ছান দিয়্যে ওইয়্যে, কনঅ বিদেশি তারার্ জ্ঞানানিত্ কাঙেলেত্যে ন-গরন্। 20 শদান্ মান্জ্যে জিংকানিবর্ দুঘ্ পান; চিৎনেইয়্যেগুনে যেদকদিন বাঁজি থেবাক্ সেদকদিন সং দুঘ্ ভোগ গুরিবাক্। 21 তা কানত্ দর্গরেপারা রঅ সুমিবো; যেক্কেনে বেক্কানি গম্ চলের্ বিলিনে মনে অবঅ সেক্কে লুদেয়্যেগুনে তারে আক্রমণ গুরিবাক্। 22 তার্ কনঅ আজা নেই, তে আন্ধারত্তুন্ ধেই এই পারিবো; তাত্তেই ঠিগ্ ওই আঘে দর্গরেপারা মরণান্। 23 তে হানাত্তে তোগেইনে ঘুরি বেড়ায় আর পুযোর্ গরে সিয়েন কুদু। তে হবর্ পায়, আন্ধার দিন্নো কায়-কুরে এচ্চ্যে। 24 দুদ্দশা আর মনত্ দুঘ্কানে তারে দর্ দেগায় আর খেমতাবলা রাজা ধোক্ক্যেন্ তারে আক্রমণ গুরিবাত্তে যুক্কোল্ অয়, 25 কিয়া তে গোজেনরে ঘুষি দেগায় আর বেগত্তুন্ খেমতাবলা গোজেন বিরুদ্ধে বার্বো গরে। 26 দাঙর্ আর দরমর ঢাল্লোই গত্তনাবো দরমর গুরিনে তে গোজেন বিরুদ্ধে উজেই যায়। 27 “তা মুয়োন্ তেল্লোই দাদঅ ওই যেইয়্যে আর কমরবো দাঙর্ ওইয়্যেদে য়েরালোই। 28 তে ভস্ত ওই যেইয়্যে শঅরত্ বজত্তি গরে; যে ঘরত্ কনজনে ন-থান, যে ঘরান্ ভস্ত ওইয়্যে কুর্ অবাত্তে যুক্কোল্ ওই আঘে, সিয়েনত্ তে বজত্তি গরে। 29 তে আর তাগোয়্যে ন-থেবঅ, তার্ ধন-সোম্বোত্তি থিদেবর্ ন-অবঅ, আর্ তার্ আজার আজার য়েমান্অ ন-থেবাক্। 30 তে আন্ধারান ছাড়ি ন-পারিবো; তে এন্ গাজঅ ধোক্ক্যেন্ অবঅ যিবের্ ডেলাগুন্ আগুনো জিল্লোই পুড়ি যেবাক্; গোজেন মুয়োর্ নিজেসে তে উড়ি যেবঅ। 31 বাজে জিনিজো উগুরে বিশ্বেজ্ গুরিনে তে যেনে নিজোরে ন-ঠগায়, কিয়া তে সিয়েনর্ বদলে কিচ্ছু ন-পেবঅ। 32 সময়োর আগেদি তার্ পাওনা সাজা তে বেক্কানি পেবঅ; তার্ ডেলা পাদানি ন-বাড়িবো। 33 তে এন্ আংগুর লুদি ধোক্ক্যেন্ অবঅ যিয়েত্তুন্ বেক্ কাজা আংগুরুন ঝুরি পোজ্যন্; তে এন্ জলপাই গাজ ধোক্ক্যেন্ অবঅ যিবের্ ফুলুন্ ঝুরি যেইয়োন্। 34 গোজেন উগুরে ভোক্তিনেইয়্যেগুনোর কনঅ ঝি-পূঅ ন-থেবাক্; তারার্ ঘুষোর্ ঘরানি আগুনে গিলিবো। 35 তারার্ পেদত্ থেবদে শদান্ আর তারা জর্ম দিবাক্ ভান্ন্যেইয়ুনোরে; তারার্ পেদত্ জোর্মেবদে ছলনা।” |
Copyright © 2021 Bangladesh Bible Society
Bangladesh Bible Society