ইয়োব 14 - Chakma Bible1 মিলে পেদত্ জোর্মেয়্যে মানুচ্চুনোর্ জিংকানি কয়েকদিনোর্, আর সিয়েন্ দুঘে ভরা। 2 তে ফুলো ধোক্ক্যেন্ ফুদি উদে সে পরেদি শুগেই যায়; তে ছাবা ধোক্ক্যেন্ আধি যায়, আর ন-থায়। 3 এ বাবোত্যে একজন উগুরে কি তমা চোগ্ পোজ্যে? বিচেরত্তে কি তুই মরে তঅ মুজুঙোত্ আনিবে? 4 অসিজিত্তুন্ কি কনজনে সিজি কিজু বানেই পারন্? কনজনে ন-পারন্। 5 মান্জ্যর আয়ু ঠিগ্ গরা আঘে; তুই তার্ কয়মাস ঠিগ্ গুরি রাগেয়োজ্; তার্ দুযিগান্ তুই ঠিগ্ গোজ্যস্, তে সিয়েন্ পার্ ওই ন-পারে। 6 সেনত্তে তা ইন্দিত্তুন্ তুই তঅ চোগ্কুন ফিরে, তারে জিরেন্ দে; আল্লো গাবুরো ধোক্ক্যেন্ তারে তা সময়ান্ কাদেবাত্তে দে। 7 গাজ্চুনোর্অ আজা আঘে; সিবে কাবি ফেলেলেয়ো আর উদিবো, সিবেত্তুন্ আরঅ নুয়ো ডেলা নিগিলিবো। 8 মাদি ভিদিরে তা শিঙোরান্ পুরোন্ ওই যায়, সিয়েনর গড়াগান্ মাদিত্ মুরি যায়। 9 তো পানি বাজ্ পেলে সিয়েন্ আর উদে; নুয়ো চারা ধোক্ক্যেন্ আরঅ সিবের্ ডেলাগুন্ নিগিলে। 10 মাত্তর্ মানুচ্ মুরিলে তে থুম্ ওই যায়; তে শেজ্ নিজেস্ ছাড়িনে কুদু যায়? 11 ঢেবা পানিগান যেধোক্ক্যান শুগেই যায় আর গাঙানি যেধোক্ক্যেন্ গুরিনে মুরি যায়, 12 সেধোক্ক্যেন্ মানুচ্ মুরিলে আর ন-উদোন্; আগাজ্ছান শেজ্ ওই ন-যানা সং তে আর্ ন-জাগিবো, তে মরণ-ঘুমোত্তুন্ জাগি ন-উদিবো। 13 আহ্, তুই যুনি মরে শবাশালত্ লুগেই রাগেদে, তর্ রাগ্কান লামি ন-যানা সং লুগেই রাগেদে, সে পরেদি মত্তেই এক্কান্ সময় ঠিগ্ গুরিনে আরঅ মরে মনত্ তুলিদে! 14 মানুচ্ মুরিনে কি আরঅ জেদা অন্? যুনি অন্, সালে মর্ জদবদে কাম্ গরানার্ বেক্ দিনুনোত্তে মুই নুয়ো গুরিনে উদিবাত্তে বাজ্জেই থেম্। 15 সেক্কেনে তুই ডাগিবে আর মুই শমক্ দিম; তঅ আঢ্তোই বানেয়্যে মানুচোত্তে তঅ পরাণান্ কানিবো। 16 সেক্কেনে তুই মঅ টেঙর্ পোইদ্যেগুন্ গুনিবে মাত্তর্ মঅ পাপ ইন্দি খিয়েল্ ন-রাগেবে। 17 সেক্কেনে তুই এক্কো থৈল্যে ভিদিরে মঅ দুজ্ছানি সীলমর্ গুরি রাগেবে আর মর্ পাপ বেক্কানি ঢাগি দিবে। 18 “মাত্তর্ মুড়োগুন্ যেধোক্ক্যেন্ গুরি এক্কানা এক্কানা ক্ষয় যেইনে ভাঙি পড়ে, পাত্তরুন্ যেধোক্ক্যেন্ তা নিজো জাগাত্তুন্ সুরি যান্, 19 পানিয়্যে যেধোক্ক্যেন্ পাত্তররে ক্ষয় গরে আর পানি গঙারে মাদিরে ধোয় নেযায়, সেধোক্ক্যেন্ গুরিনে তুই মানজ্যর্ আজাগানিরে শেজ্ গরচ্। 20 তুই উমরত্তে তারে দঙা, আর তে যায়; তা চেঙেরা বুদুলি দিইনে তুই তারে দূর্ গুরি দে। 21 তা পূঅগুনে সর্মানি অলে তে হবর্ ন-পায়; তারা অসর্মানি অলেয়ো তে সিয়েনি ন-দেগে। 22 তে বানা তা কিয়্যের্ দুঘো কধানি বুঝি পারে আর নিজোত্তে আবিলেচ্ গরে।” |
Copyright © 2021 Bangladesh Bible Society
Bangladesh Bible Society