ইয়োব 12 - Chakma Bibleইয়োবর জোব্ দেনা 1 সেক্কেনে ইয়োবে জোবত্ কলঅ, 2 তুমি মনেগরঅ তুমি বানা জ্ঞানী মানুচ্ আর তমার্ মরাণার্ লগে লগে জ্ঞানান্অ মুরি যেবঅ। 3 মাত্তর্ তমা ধোক্ক্যেন্ মর্অ বুদ্ধি আঘে; মুই তমাত্তুন্ তলে নয়; তুমি যিয়েন্ কোইয়ো সিয়েন্ কন্না হবর্ ন-পাই? 4 মুই গোজেনরে ডাগিদুঙ্ আর তে মরে জোব্ দিদো, তো মঅ সমাজ্যেগুনো ইদু মুই এক্কো আজিবার্ মানুচ্ ওইয়োং; গম্ আর নিদ্দুযি অলেয়ো মুই ইক্কিনে আজিবার্ মানুচ্ বাদে আর কিচ্ছু নয়। 5 সুগী মানুচ্চুনে দুঘ্কানিরে ইংসে-নিন্দে গরন্; তারা মনে গরন্ যিগুনোর্ টেঙানি উজোত্ খায় দুঘ্-কষ্ট তারাত্তে। 6 লুদেয়্যেগুনোর্ তাম্বুলোত্ কনঅ হাঙেলেত্যে নেই; যিগুনে গোজেনরে হাঙেলেত্যে গরন্ তারা গমেডালে থান্; গোজেনেয়ই যেনে তারারে বেক্কানি দের্। 7 য়েমানুনোরে পুযোর্ গর্, তারা তরে শিগেবাক্; আগাজ পেক্কুনোরে কঅ, তারায়ো তরে কোই দিবাক্; 8 পিত্থিমীগানরে কঅ, তেয়ো তরে শিগেব; সাগরর্ মাছসুনেয়ো তরে কোই দিবাক্। 9 ইগুনে বেক্কুনে হবর্ পান্ লগেপ্রভুর বলানে ইয়েনি গোজ্যে। 10 তা আধত্ বেক্ পরাণবলাগুনোর্ জীংকানিগানি আঘে; বেক্ মানুচ্চুনোর্ নিজেস্ছুনো তা আধত্ আঘে। 11 জিলানে যেধোক্ক্যেন্ হানার্ সুয়োত্তানি নেযায় সেধোক্ক্যেন্ কানানেয়ো কধানি জগা যায়। 12 তুমি কোই থাগঅ, বুড়ো মানুচ্চুনো ইদু জ্ঞান পাহ্ যায় আর ভালোক্ দিন সং বুদ্ধি পায়। 13 মাত্তর্ জ্ঞান্ আর বলান্ গোজেনর; সল্লা আর বুদ্ধি তার্। 14 তে ভাঙিলে আর সিয়েন্ বানা ন-যায়; তে কাররে জেলোত্ আক্সোই রাগেলে ছড়ান্ দিয়্যে ন-যায়। 15 তে পানিগান্ বন্ধ গুরি রাগেলে শুগে যায়; তে সিয়েন্ খুলি দিলে দেজ্ছান ভস্ত অয়। 16 বল্ আর জ্ঞানান তার্; যিবেরে ছলনা গরা ওইয়্যে আর যিবে ছলনা গরে তারা দ্বিজনে তা আধত্ তলে। 17 তে মন্ত্রীগুনোর্ কাবড়্-চুগোড়ানি খুলি ফেলেইনে তারারে বানি থয় আর বিচেরগ্কুনোরে ভুল্ বানায়। 18 তে রাজার্ কাবড়্-চুগোড়ানি কারি নেযায় আর তারে বানি থয়। 19 তে ধর্মগুরুগুনোর কাবড়্-চুগোড়ানি খুলিনে তারারে বানি থয় আর যিগুনে শিঙোর্ গাড়েইনে বোই আগন্ তারারে উগুড়ে ফেলায়। 20 বিশ্বেজি মানুচ্চুনোর মুয়োনি তে বন্ধ গরে আর বুড়ো মানুচ্চুনোর্ চিদে-চেতনাগানি বর্বাত্ গরে। 21 তে দাঙর্ পোজিশনর্ মানুচ্চুনোরে ঘিনাই আর বোলীগুনোরে আত্যার্ছাড়া গরে। 22 আন্ধারত্ লুগেয়্যে বেপারানি তে ফগদাঙ্ গরে আর ঘুর্ঘুজ্যে ছাবাগানরে পহ্রত্ আনে। 23 তে জাত্তুনোরে দাঙর্ গরে আর ভস্তয়ো গরে, তারারে বাড়েই তুলে আরঅ বন্দী দজানিয়ো নেযায়। 24 পিত্থিমীর্ নেতাগুনোর্ বিচের্ বুদ্ধিগানি তে দূর্ গরে, পথ্নেইয়্যে মানুচ্ছাড়া জাগাত্ তারারে ঘুরি বেড়েবাত্তে দে। 25 তারা পহ্র বাদে আন্ধারানরে বিজিরে বিজিরে বেড়ায়; তে তারারে মাত্তল ধোক্ক্যেন্ আঢায়। |
Copyright © 2021 Bangladesh Bible Society
Bangladesh Bible Society