ইয়োব 11 - Chakma Bibleসোফরর পত্তম্ কধা 1 সেক্কেনে নামাথীয় সোফরে জোবত্ কলঅ, 2 এই বেক্ কধানির্ কি জোব্ দিয়্যে ন-অবঅ? কধা রাজাগুনোর্ কধানি কি ঠিগ্ বিলিনে প্রমান অবঅ? 3 তর্ এ বাজে কধাগান্ শুনিনে কি মান্জ্যে জুরো গুরি থেবাক্? তুই ঠাট্টা-তামাজা গুরিলে কি কনজনে তরে লাজ্ ন-দিবাক্? 4 তুই গোজেনরে কত্তে, তর্ ধর্ম বিশ্বেজত্ কনঅ ভেজাল্ নেই আর তা চোগেদি তুই খাটি। 5 আহ্, গোজেনে যেনে কধা কয়, তঅ বিরুদ্ধে মুয়োন্ খুলিবো 6 আর জ্ঞানর্ গুমুরো বেপারানি তরে হবর্ দুয়োন্, কিয়া জ্ঞানর্ বোউত্ পধ আঘে। ইয়েন্ ইদোত্ রাগা, তঅ পাপ মজিম্ গোজেনে তরে সাজা নঅ-দে। 7 গোজেনর গুমুরো পৌইদ্যেনে গভীনান্ কত্তমান্ সিয়েন্ কি তুই বুঝি পারচ্? বেগত্তুন্ খেমতাবলা গোজেনর দুজি কত্তমান্ সিয়েন্ কি তুই বিজিরে চেই পারচ্? 8 সিয়েনি যে আগাজত্তুন্অ অজল্ সিয়েন্ কি তুমি বুঝি পার? সিয়েনি গোর জাগার্ গভীনত্তুন্ বেশ্ গভীন্, তুই কি সিয়েন্ হবর্ পাজ্? 9 মাবিলে দেগা যেবঅ সিয়েনি পিত্থিমীর্ এক কিত্তেত্তুন্ অন্য কিত্তেত্তুন্অ বেশ্ লাম্বা আর সাগরত্তুন্অ বেশ্ পাদাজ্যে। 10 তে এইনে যুনি তরে জেলোত্ বন্দী গরে আর বিচের্ বজায়, সালে কন্না তারে মানা গুরি পারে? 11 তে ভন্ড মানুচ্চুনোরে হামাক্কাই চিনে; ভান্ন্যেই কিজু দেগিলে তে কি সিয়েন্ ন-চেবঅ না? 12 ঝার গাধা ছঅগুনে যেধোক্ক্যেন্ মানুচ্ ওইনে জর্ম নেযেই ন-পারন্, সেধোক্ক্যেন্ বুদ্ধি নেইয়্যে মানুচ্চুনে জ্ঞানী ওই ন-পারন্। 13 “মাত্তর্ যুনি তুই তঅ মনান্ পুরোপুরি গুরিনে তারে দুয়োজ্, তা ইন্দি তঅ আঢ্তান বাবেই দে, 14 তঅ আধত্ যে পাপ্পানি আঘে সিয়েনি দূর্ গুরি দে, আর অন্যেয়ানরে তঅ ঘরত্ থেবাত্তে ন-দিবে, 15 সালে তুই নিষ্কলংক ওইনে মাধা তুলিবে আর ন-দোরেইনে দরমর ওইনে থিয়্যেবে। 16 সেক্কে তঅ দুঘ্কান্ হামাক্কাই তুই ভুলি যেবে, মনে গুরিবে সিয়েন্ যেনে বানা বেই যেইয়্যে পানি। 17 তঅ জিংকানিগান্ অবদে দ্বিবুজ্যেত্তুন্অ বেশ্ জোক্জোক্যে আর আন্ধারান্ অবদে বেন্যেমাদান ধোক্ক্যেন্। 18 তর্ সাহস্ থেবঅ, কিত্যে আজা আঘে; চেরোকিত্তে চেইনে তুই গমেডালে জিরেবে; 19 তুই ঘুমোত্ পড়িলে কনজনে তরে দর্ ন-লাগেব। বোউত্ মান্জ্যে তইদু দোয়্যে চেবাক্। 20 মাত্তর্ শদানুনে উদ্ধোরর্ আজায় মিজে মিজে চেই থেবাক্, তারা কনঅ আশ্রয় ন-পেবাক্; শেজ্ নিজেশ্বো অবদে তারার্ আজা।” |
Copyright © 2021 Bangladesh Bible Society
Bangladesh Bible Society