ইয়োব 10 - Chakma Bible1 মর্ বাঁজি থানাগানই মুই ঘিনাং, সেনত্তে মঅ দুঘোর্ কধানি মুই আভাংপাদারি কোম্ আর মঅ পরাণর্ তিদে অবস্থাত্তুন্ কধা কোম্। 2 ও গোজেন, মরে দুযি ন-গুরিচ্, মাত্তর্ মঅ বিরুদ্ধে তর্ যে আবিত্তি আঘে সিয়েন্ মরে কঅ। 3 মরে দুঘ্ দিইনে তর্ কি লাভ? তঅ আদঅ কামান্ কি তুই টেঙোই ঠেলর্ আর শদানুনোর্ সল্লালোই হুজি অর্? 4 তঅ চোখ্কুন কি মান্জ্য চোগো ধোক্ক্যেন্? মান্জ্যে যেধোক্ক্যেন্ দেগন্ তুইয়ো কি সেধোক্ক্যেন্ দেগচ? 5 মান্জ্য ধোক্ক্যেন্ কি তঅ দিনুন্ কাদি যায়? তারা ধোক্ক্যেন্ কি তঅ বজরুনো কাদি যায়? 6 তুই কি সেনত্তে মঅ দুজ্ছানি তগর্ আর মঅ পাপ্পানি বিজিরে চর্? 7 তুই দঅ হবর্ পাজ্ মুই দুযি নয় আর তঅ আঢত্তুন্ উদ্ধোর্ গুরিয়্যে কনজন নেই। 8 তঅ আঢ্তানে মরে ঠিগ্ গোজ্যে, বানেয়্যে; ইক্কিনে তুই কি ফিরিনে মরে ভস্ত গুরিবে? 9 ইদোত্ তুল্, মাদি পিলে ধোক্ক্যেন্ গুরিনে তুই মরে বানেয়োজ্; ইক্কিনে তুয়ই কি আরঅ মরে ধূল্যে ধোক্ক্যেন্ গুরিবে? 10 দুধো ধোক্ক্যেন্ গুরিনে তুই মরে ঢাল্যচ্ আর ধোয় ধোক্ক্যেন্ গুরিনে মরে জমেয়োজ্। 11 মরে চাম্বোই আর য়েরালোই বেড়েয়োচ্, আড়্ আর য়েরালোই এক সমারে মরে বানেয়োচ্। 12 তুই মরে জিংকানি দুয়োজ্, অমকদ কোচ্পানা দেগেয়োচ্; তঅ যত্তন্দোই মঅ পরাণান্ রোক্ষ্যে পেইয়্যে। 13 মাত্তর্ ইয়েনই তঅ মনত্ তুই লুগেই রাগেয়োচ্, আর মুই হবর্ পাং ইয়েন তঅ মনত্ রোইয়্যে, 14 যুনি মুই পাপ গরং, তুই সিয়েন্ খিয়েল্ রাগেবে আর মর্ দুষ্চানর্ সাজা ন-দিইনে তুই ন-ছাড়িবে। 15 যুনি মুই দুযি অং সালে মঅ উগুরে দযা এবঅ। যুনি মুই নিদ্দুযিয়ো অং তো মুই মাধা তুলি ন-পারিম্, কিয়া মুই লাজে ভর্পুনোং ওইয়োং আর দুঘোত্ পোজ্যং। 16 যুনি মুই মাধা অজল্ গরং সালে তুই সিংহ ধোক্ক্যেন্ মত্তেই হাপ্ দি থেবে আর মরে আরঅ তর্ দর্গরেপারা বল্ দেগেবে। 17 মঅ বিরুদ্ধে তুই নুয়ো নুয়ো সাক্ষী তুলোর্ আর মঅ উগুরে তর্ কাঙেলেত্যে বাড়েই তুলোর্; তঅ আক্রমণান্ এককানর্ পর্ এক্কান্ মঅ বিরুদ্ধে এজের্। 18 “কিত্তে তুই মা পেদত্তুন্ মরে নিগিলেই আন্যস্? কনঅ চোগে মরে দেগিবার্ আগেদি কিত্তে মুই ন-মুরিলুং? 19 হায়, মরে যুনি কনদিন্অ সৃট্টি গরা ন-অদঅ, বা পেদত্তুন্ সজা গোরত্ নেযা অদঅ! 20 মঅ কয়েক্ দিনোর্ আয়ু পেরায় থুম্; এবেরা তুই মরে ইরি দে যেনে মুই কানক্কণ্ অলে ফুত্তি গুরি পারং। 21 মুই যাদিমাদি আন্ধার্ আর ঘুর্ঘুজ্যে ছাবা দেজত্ যেম্; মুই আর্ কনদিন্অ ফিরি ন-এম্। 22 সিয়েন্ ঘুর্ঘুজ্যে আন্ধারর্ দেজ, ঘুর্ঘুজ্যে ছাবা আর কাঙেলেত্যের্ দেজ; সিয়েনত্ পহ্রান্অ আন্ধার ধোক্ক্যেন্।” |
Copyright © 2021 Bangladesh Bible Society
Bangladesh Bible Society