ইয়োব 1 - Chakma Bibleপরিচয় 1 ঊষ দেজত্ ইয়োব নাঙে এক্কো মানুচ্ বজত্তি গুরিদো। তে এক্কো নিদ্দুজি আর গম্ মানুচ্ এলঅ। তে গোজেনরে ভোক্তি সহকারে দোরেদ আর ভান্ন্যেই কামত্তুন্ দূরোত্ থেদঅ। 2 তার্ সাত্তো পূঅ আর তিন্নো ঝি এলঅ। 3 তার্ সাত আজার্ ভেড়া ছাগল, তিন আজার্ উট, পাচশত্ জড়া বলদ গোরু আর পাচশত্ পাড়ি গাধা এলঅ আর চাগর্-চাগরানিয়ো এলাক্ ভালোক্কুন্। পূগ দেজর বেক্ মানুচ্চুনোত্তুন্ তে অলদে বেগত্তুন্ তাগোয়্যে। 4 তা পূঅগুনে পালা পালা গুরিনে তারার্ নিজো নিজো ঘরত্ হানা যুক্কোল্ গুরিদাক্ আর তারা সমারে হানা-দানা গুরিবাত্তে মানুচ্ পাধেইনে তারার্ তিন বোনোরে বাত্যেদাক্। 5 তারার্ হানার্ দিনুন্ থুম্ অলে পরেদি ইয়োবে তারারে ডাগি আনিনে সিজি গুরিদো। বেন্যেপোত্যে তে তারার্ পত্তি জনত্তে এক্কো গুরিনে পুজ্যে-উৎসর্বর পরব্ গুরিলো। তে মনে গুরিদো, “মঅ ঝি-পূঅগুনে অয়ত পাপ গোজ্যন্ আর মনে মনে গোজেনরে অসর্মান গোজ্যন্।” ইয়োবে আমিঝে এবাবোত্যে গুরিদো। ইয়োবর্ পত্তম পোরোক্ষ্যে 6 একদিন্যে স্বর্গদূত্তুনে লগেপ্রভুর মুজুঙোত্ যেইনে লুমিলাক্ আর শদান্নোয়ো তারা সমারে লুমিলো। 7 সেক্কে লগেপ্রভু শদানরে কলঅ, “তুই কুত্তুন্ এচ্ছোস্?” জোবত্ শদান্নো লগেপ্রভুরে কলঅ, “পিত্থিমীর্ ভিদিরেদি ইন্দি-উন্দি গুরিনে এলুঙ্।” 8 লগেপ্রভু সেক্কে সদান্নোরে কলঅ, “মঅ মানুচ্ ইয়োব ইন্দি কি তুই রিনি চেইয়োচ্? পিত্থিমীত্ তা ধোক্ক্যেন্ আর কনজন নেই। তে নিদ্দুজি আর গম্ মানুচ্। তে মরে ভোক্তিগুরিনে দরায়্ আর ভান্ন্যেই কামত্তুন্ দূরোত্ থায়।” 9 সেক্কে সদান্নো কলঅ, “ইয়োবে কি এনে বাদে তরে ভোক্তিগুরিনে দরায়? 10 তুই কি তা চেরোকিত্তে আর তা ঘরর্ আর তার্ যিয়েনি আঘে সিয়েনির্ চেরোকিত্তে ঘিরিনে ন-রাগাজ্? তুই দঅ তা কামত্ বর্ দুয়োজ্, সেনত্তেই তার্ এ্যমানপাল্লোই দেজ্ছান ভুরি যেইয়্যেগোই। 11 মাত্তর্ তুই আঢ্ বাবেইনে তার বেক্কানিত্ আঘাত্ গর্, তে হামাক্কাই তঅ মুজুঙোত্ তঅ বিরুদ্ধে অগমান কধা কবঅ।” 12 সেক্কে লগেপ্রভু শদান্নোরে কলঅ, “ঠিগ্ আঘে; তার্ যিয়েনি আঘে সিয়েনি তঅ আঢত্ দিলুঙ্, মাত্তর্ তা কিয়্যেগান উগুরে তুই এক্কো আঙুল ন-বাজেবে।” সেক্কে শদান্নো লগেপ্রভুর মুজুঙোত্তুন্ নিগিলি গেলগোই। 13 একদিন্যে ইয়োবর্ ঝি-পুঅগুনে দাঙর্ ভেইবোর ঘরত্ হানা-দানা গত্তন্ আর আংগুর-রস খাদন্। 14 এন্ সময়োত্ ইয়োবরে হবর্ দিবাত্তে এক্কো মানুচ্ এইনে কলঅ, “তর্ গোরুগুনে ভুইয়ো চাজ্ গত্তন্ আর পাড়ি গাধাগুনেয়ো কায়-কুরে চরদন্। 15 এ ভিদিরে শিবায়ীয়গুনে লুদেবাত্তে এইনে সিগুনোরে নেযেলাক্। তারা তঅ চাগরুনোরে মারে ফেলেয়োন। তরে হবর্ দিবাত্তে বানা মুই রোক্ষ্যে পেইয়োং।” 16 মানুচ্চো সেক্কেয়ো কধা কর্ এন সময়োত্ আর এক্কো এইনে হবর্ দিলো, “আগাজত্তুন্ গোজেনর আগুন পড়িনে তঅ ভেড়াপালুনোরে আর চাগরুনোরে পুড়ি ফেলেয়্যে। তরে হবর্ দিবাত্তে বানা মুই রোক্ষ্যে পেইয়োং।” 17 দ্বিলম্বর মানুচ্চো সেক্কেয়ো কধা কর্ এন্ সময়োত্ আর এক্কো মানুচ্ এইনে হবর্ দিলো, “কল্দীয়গুনে তিন্নো দলত্ ভাগ ওইনে হানা দিইনে তঅ উট্তুন নেযেয়োন। তরে হবর্ দিবাত্তে বানা মুই রোক্ষ্যে পেইয়োং।” 18 তিন লম্বর্ মানুচ্চো সেক্কেয়ো কধা কর্ এন্ সময়োত্ হবর্ দিবাত্তে আর এক্কো এইনে কলঅ, “তর্ ঝি-পূঅগুনে তারার্ দাঙর্ ভেইয়োর ঘরত্ হানা-দানা গত্তন্ আর আংগুর-রস খাদন্। 19 সেক্কে ধূল্যেচর-চাগালাত্তুন্ আদিক্ক্যেগুরি এক্কান্ তুত্যে বোইয়্যের্ এইনে ঘরানরে আঘাত্ গুরিলো। সেক্কে ঘরান্ ভাঙি যেইনে তারা উগুরে পড়িনে তারা মুরি গেলাক্। তরে হবর্ দিবাত্তে বানা মুই রোক্ষ্যে পেইয়োং।” 20 এ কধাগান শুনিনে ইয়োবে থিয়্যেইনে মনত্ দুঘে তা কাবড়ান ফাদি ফেলেল আর চুলান্ কাবি ফেলেল। সে পরেন্দি মাদিত্ মাধা নিগিরিনে গোজেনরে তা মনর্ ভোক্তি জানেইনে কলঅ, 21 “মা পেদত্তুন্ মুই লাংটা-বাংটা এচ্ছোং আর লাংটা-বাংটা যেম্। লগেপ্রভুই দিয়্যে আর লগেপ্রভুই নেযেয়্যে; লগেপ্রভুর বাঈনী ওক্।” 22 ইয়েনি ঘুদিলেয়ো ইয়োবে পাপ ন-গুরিলো বা গোজেনরে দুজ্ ন-দিলো। |
Copyright © 2021 Bangladesh Bible Society
Bangladesh Bible Society