যোহন 6 - Chakma Bible

পাচ্ আজার্ মান্‌জ্যরে হাবানা

¹ ইয়েন পরেদি যীশু গালীল সাগরর্ উকুলে গেলঅ। এ সাগরানরে তিবিরিয়া সাগর-অ কুয়ো অয়।

² সয়-সাগোজ্যে মানুচ্‌ যীশুর্ পিযে পিযে যাহ্ ধল্ল্যাক্, কিয়া পিড়েল্ল্যেগুনো উগুরে তে যে চিহ্নো ইজেবে যেদক্কানি আমক্ অবার্ কাম্ গোজ্যে তারা সিয়েনি দেক্ক্যন্।

³ যীশু তা শিচ্চ্যগুনোরে লোইনে এক্কো মুড়ো উগুরে উদিনে বলঅ।

⁴ সেক্কে যিহূদীগুনোর উদ্ধোর্-পরব সময়বো এচ্চ্যে।

⁵ যীশু চেরোকিত্যেদি রিনি চেলঅ আর দেগিলো সয়-সাগোজ্যে মানুচ্‌ তা ইধু এত্তন্। সেনত্যে তে ফিলিপরে কলঅ, “এ মানুচ্চুনোরে হাবেবাত্যে আমি কুত্তুন্ হানা কিনিবোং?”

⁶ ফিলিপরে চাগি চেবাত্যে তে সে কধাগান্ কলঅ, কিয়া কি গুরিবো সিয়েন্ তে কোই পাত্ত।

⁷ ফিলিপে জোব্ দিলো, “ইগুনে যুনি পত্তি জনে এক্কেনা গুরিয়ো পান্ তো দ্বিশত্ দীনারর্ রুটিয়েয়ো ন-কুলেব।”

⁸ যীশু শিচ্চ্যগুনোত্তুন্ আর একজন নাঙ্ এলঅ আন্দ্রিয়। তে এলঅ শিমোন-পিতরর্ ভেই।

⁹ আন্দ্রিয় যীশুরে কলঅ, “ইয়েনত্ এক্কো পুয়োর্ পাচ্চান্ মোক্ক্যে রুটি আর দ্বিবে মাছ আঘে; মাত্তর্ ইদুক্কুন্ মান্‌জ্যর সিগুন্দোই কি অবঅ?”

¹⁰ যীশু কলঅ, “মানুচ্চুনোরে বোজেই দুয়ো।” সে জাগানত্ বোউত্ ঘাস এলঅ। বেক্ মানুচ্চুনে ঘাচ উগুরে বুজিলাক্। সিয়েনত্ মরদ এলাক্কে কমেদি পাচ্ আজার্।

¹¹ ইয়েন পরেদি যীশু সেই রুটি কয়েক্কান লোইনে গোজেনরে ভালেদি জানেল আর যিগুনে বৈই এলাক্ সিগুনোরে ভাগ্ গুরি দিলাক্। সেবাবোত্যেগুরি তে মাছ-অ দিলো। যে যেদক্ মাগিলাক্ সেদ্ক্ পেলাক্।

¹² যেক্কেনে তারা বেক্কুনে পেট ভরে সং হেলাক্, যীশু তা শিচ্চ্যগুনোরে কলঅ, “যে কট্টানি উগুজ্যে সিয়েনি এক সমারে থুবো যেন কিচ্চু বর্‌বাদ্ ন-অয়।”

¹³ মানুচ্চুনে হানার্ পরেদি সে পাচ্চান্ রুটির যিয়েনি বাগী এলঅ শিচ্চ্যগুনে সিয়েনি থুবেইনে বারবো লেই ভোরেলাক্।

¹⁴ যীশুর এ আমক্ কামানি দেগিনে মানুচ্চুনে কুয়ো ধল্ল্যাক্, “পিত্‌থিমীত্ যে ভাববাদীবোর্ এবার্ কধা আঘে ইবে ঘেচ্চেক্‌‌গুরি সেই ভাববাদীবো।”

¹⁵ ইয়েন্দোই যীশু বুঝি পারিলো, মানুচ্চুনে তারে বলে ধুরিনে তারার্ রাজা বানেবাত্যে ধুরিবাত্তে এত্তন্। সেনত্তে তে গায় গায় আরঅ সেই মুড়োবোত্ গেলগোই।

প্রভু যীশু সাগর পানি উগুরে আঢিলো

¹⁶ সাজোন্যে অনার্ পরেদি যীশুর্ শিচ্চ্যগুনে সাগর পারত্ গেলাক্,

¹⁷ আর নৌকোত্ উদিনে কফরনাহূম শঅরত্ যেবাত্যে সাগর পার্ ওয়া ধল্ল্যাক্। সেক্কে আন্ধার্ ওইয়্যে, আর সেক্কেয়ো যীশু তারা ইধু ন-এজে।

¹⁸ ভারী বেচ্‌ গুরি বৈয়্যের্ বার্ বিলি সাগরত্অ দাঙর্ দাঙর্ তুবোল্ উদের্।

¹⁹ পাঁচ-ছয় কিলোমিটার নৌকোগান্ বেই যানার্ পরেদি তারা দেগিলাক্, যীশু সাগর উগুরেদি আঢিনে তারা নৌকোগান ইন্দি এজের্। ইয়েন দেগিনে শিচ্চ্যগুনে অমকদ দোরেলাক্।

²⁰ সেক্কে যীশু তারারে কলঅ, “ন-দোরেয়ো; ইবে দঅ মুই।”

²¹ শিচ্চ্যগুনে তারে নৌকোগানত্ তুলিবাত্তে চেলাক্, আর তারা যিধু যাদন্ নৌকোগান সেক্কে সিধু লুমিলো।

জিংকানি-রুটি পৌইদ্যেনে উপদেচ্‌

²² সাগর উকুলে যে মানুচ্চুনে থিয়েই এলাক্, তার্ কেল্যে তারা বুঝি পারিলাক্, তার্ আগ দিনোত্ সিধু এক্কান্ নঅ বাদে আর অন্য কনঅ নঅ ন-এলঅ। তারা আরঅ বুঝি পারিলাক্, যীশু তা শিচ্চ্যগুনো সমারে সে নগানত্ ন-উদে বরং শিচ্চ্যগুনে গায় গায় যেয়োন্।

²³ মাত্তর্ যিয়েনত্ প্রভু ভালেদি জানেবার্ পরেদি মানুচ্চুনে রুটি হেইয়োন্ সে জাগান কায় সেক্কে তিবিরিয়া শঅরত্তুন্ কয়েক্কান নঅ লুমিলোগি।

²⁴ ইয়েনত্যে মানুচ্চুনে যেক্কে দেগিলাক্, যীশু বা তা শিচ্চ্যগুনে কনজনে সিয়েনত্ নেই সেক্কে তারা সে নগানিত্ উদিনে যীশুরে তোগেবাত্যে কফরনাহূমোত্ গেলাক্।

²⁵ সিয়েনত্ লুমিনে তারা যীশুরে তোগেই পেইনে কলাক্, “মাষ্টর বাবু, তুই কক্কে ইধু এচ্চ্যস্?”

²⁶ যীশু জোব্ দিলো, মুই তমারে ঘেচ্চ্যেক্‌গুরি কঙর্, তুমি আমক্ অবার্ কাম্ দেক্ক্য বিলি যে মরে তগর্ সিয়েন নয়, মাত্তর্ পেট্ ভরে সং রুটি হেই পেইয়ো বিলি তগর্।

²⁷ মাত্তর্ যে হানাগান্ বর্‌বাদ্ ওই যায় সে হানাগানত্তে খিজেহিচ্চ্যে গুরিনে লাভ্ কি? যে হানাগান্ বর্‌বাদ্ ন-অয় বরং উমর্‌অ জিংকানি দান্ গরে সিয়েনত্যে খিজেহিচ্চ্যে গরঅ। সেই হানাগান্ মান্‌জ্যপুয়োবো তমারে দিবো, কিয়া বাবা গোজেনে প্রমাণ গুরি দেগেয়্যেদে যে, এ কামান্ গুরিবার অধিকার্ বানা তার্ আঘে।

²⁸ ইয়েন্দোই মানুচ্চুনে যীশুরে পুযোর্ গুরিলাক্, “সালে গোজেনর্ কাম্ গুরিবাত্যে আমাত্তুন্ কি গরা পুরিবো?”

²⁹ যীশু তারারে কলঅ, “গোজেনে যিবেরে পাধেয়্যে তা উগুরে বিশ্বেজ্ গরানা অলঅ গোজেনর্ কাম্।”

³⁰ সেক্কে তারা তারে পুযোর্ গুরিলাক্, “সালে কি এমন আমক্ অইদ্যে কাম্ তুই গুরিবে যিয়েন্ দেগিনে আমি তরে বিশ্বেজ্ গুরি পারিই?

³¹ আমা পূরোণি মানুচ্চুনে দঅ ধূল্যেচর-চাগালাত্ মান্না হেইয়োন্। পবিত্র বোইবোত্ লেগা আঘে, ‘গোজেনে স্বর্গত্তুন্ তারারে রুটি হেবাত্তে দিলো।’ ”

³² যীশু তারারে কলঅ, “মুই তমারে ঘেচ্চ্যেক্‌গুরি কঙর্, স্বর্গত্তুন্ যে রুটিগানি তুমি পেইয়ো সিয়েনি মোশি তমারে ন-দে, মাত্তর্ মঅ বাপ্পো আঝল্ রুটি স্বর্গত্তুন্ তমারে দের্।

³³ স্বর্গত্তুন্ লামি এইনে যিবে মান্‌জ্যরে জিংকানি দে তেয়ই গোজেনর্ দিয়্যে রুটি।”

³⁴ মানুচ্চুনে তারে কলাক্, “মাষ্টর বাবু, সালে সেই রুটিগানি নিত্য আমারে দে।”

³⁵ যীশু তারারে কলঅ, “মুয়ই সেই জিংকানি-রুটিগান্। যে মইধু এজে তাত্তুন্ কনদিন্অ পেট্ ন-পুরিবো। যে মঅ উগুরে বিশ্বেজ্ গরে তাত্তুন্ আর কনদিন্অ পানি তিরেচ্‌ ন-পেবঅ।

³⁶ মুই দঅ তমারে কোইয়োং, তুমি মরে দেক্ক্য মাত্তর্ তো বিশ্বেজ্ ন-গরঅ।

³⁷ বাবা মরে যিগুনোরে দে তারা বেক্কুনে মঅ ইধু এবাক্। যে মইধু এজে মুই তারে কনবাবদে বারেদি ফেলেই ন-দিম্,

³⁸ কিয়া মুই মঅ মনেমন্‌জক্কাগুরি কাম্ গুরিবাত্যে ন-এজং, বরং যে মরে দিপাধেয়্যে তার আওজ্ মজিম্ কাম্ গুরিবাত্যে স্বর্গত্তুন্ লামি এচ্চ্যং।

³⁹ যে মরে দিপাধেয়্যে তা আওজ্‌চান্ ইয়েন, যিগুনোরে তে মরে দিয়্যে তারাত্তুন্ একজনরেয়ো যেন মুই ন-আঝাং বরং শেজ্ দিনোত্ জেদা গুরি তুলোং।

⁴⁰ মঅ বাপ্পো আওজ্‌চান্ ইয়েন-তমা ভিদিরে যিগুনে পুয়োবোরে দেগিনে তা উগুরে বিশ্বেজ্ গরন্ তারা যেন উমর জিংকানি পান্। আর মুয়ই তারারে শেজ্ দিনোত্ জেদা গুরি তুলিম্।”

⁴¹ সেক্কে যিহূদী নেতাগুনে যীশু বিরুদ্ধে বক্‌বক্ গরা ধুরিলাক্, কিয়া যীশু কোইয়্যেদে, “স্বর্গত্তুন্ যে রুটিগান্ লামি এচ্চ্যে মুয়ই সেই রুটিগান্।”

⁴² সেই নেতাগুনে কুয়ো ধুরিলাক্, “ইবে কি যোষেফর্ পুয়ো যীশু নয়? ইবের্ মা-বাবরে দঅ আমি চিনিই। সালে তে কেধোক্ক্যেন্‌গুরি কয়, ‘মুই স্বর্গত্তুন্ লামি এচ্চ্যং’?”

⁴³ যীশু তারারে কলঅ, “তুমি নিজো ভিদিরে বক্‌বক্ ন-গুরিবা।

⁴⁴ মঅ বাপ্পো, যিবে মরে পাধেয়্যে তে টানি ন-আনিলে কনজনে মইধু এই ন-পারন্। আর মুয়ই তারে শেজ্ দিনোত্ জেদা গুরি তুলিম্।

⁴⁵ ভাববাদীগুনোর্ বোইবোত্ লেগা আঘে, ‘তারা বেক্কুনে গোজেনত্তুন্ শিক্ষ্যে পেবাক্।’ যে কেঅ বাবত্তুন্ শুনিনে শিক্ষ্যে পেইয়্যে তেয়ই মইধু এজে।

⁴⁶ বাবারে কনজনে ন-দেগন্, বানা যে গোজেনত্তুন্ এচ্চ্যে তেয়ই তারে দেক্ক্যে।

⁴⁷ মুই তমারে ঘেচ্চ্যেক্‌গুরি কঙর্, যে কেঅ মঅ উগুরে বিশ্বেজ্ গরে তে সেক্কেনে উমর জিংকানি পায়।”

⁴⁸ “মুয়ই জিংকানি-রুটি।

⁴⁹ তমা পূরোণি মানুচ্চুনে ধূল্যেচর-চাগালাত্ মান্না হেইয়োন্, আর তো তারা মুরি যেয়োন্।

⁵⁰ মাত্তর্ ইয়েন সেই রুটি যিয়েন্ স্বর্গত্তুন্ লামি এচ্চ্যে, যাতে মানুচ্‌ সিয়েন্ হেইনে মরণত্তুন্ রেহায় পান্।

⁵¹ মুয়ই সেই জিংকানি-রুটিগান্ যিয়েন স্বর্গত্তুন্ লামি এচ্চ্যে। এ রুটিগান্ যে হেবঅ তে উমরত্তে জিংকানি পেবঅ। মঅ কিয়্যেগানই সেই রুটিগান্। মান্‌জ্যে যেন জিংকানি পান্ সেনত্তে মুই মর্ এ কিয়্যেগান্ দিম্।”

⁵² এ কধাগান্ শুনিনে যিহূদী নেতাগুনো ভিদিরে তর্কাতুর্কি আরাম্ভ অলঅ। তারা কুয়ো ধুরিলাক্, “কিবাবোত্যেগুরি এ মানুচ্চো তা কিয়্যেগান্ আমারে হেবাত্তে দি পারে?”

⁵³ যীশু তারারে কলঅ, “মুই তমারে ঘেচ্চ্যেক্‌গুরি কঙর্, মান্‌জ্যপুয়োবোর্ য়েরাগান্ আর লো-গান্ যুনি তুমি ন-খঅ সালে তমা ভিদিরে জিংকানি নেই।

⁵⁴ যুনি কেঅ মর্ য়েরাগান্ আর লো-গান্ খায় তে উমর্‌অ জিংকানি পায়, আর মুই শেজ্ দিনোত্ তারে জেদা গুরি তুলিম্।

⁵⁵ মঅ য়েরাগান্ অলঅ আজল্ হানা আর মঅ লো-গান আজল্ হেবার্ পানীয়।

⁵⁶ যে মর্ য়েরাগান্ আর লো-গান্ খায় তে মঅ ভিদিরে থায় আর মুইয়ো তা ভিদিরে থাং।

⁵⁷ জেদা বাবা মরে দিপাধেয়্যে আর তাত্যেই মুই জেদা আঘং। ঠিগ্ সেবাবোত্যেগুরি যে মরে খায় তেয়ো মত্তে জেদা থেবঅ।

⁵⁸ ইয়েন সেই রুটিগান্ যিয়েন স্বর্গত্তুন্ লামি এচ্চ্যে। তমা পূরোণি মানুচ্চুনে যে রুটিগান্ হেইনেয়ো মুরি যেয়োন্ ইয়েন সেবাবোত্যে রুটি নয়। এ রুটিগান্ যে হেবঅ তে উমরত্যে জিংকানি পেবঅ।”

মানুচ্চুনোর্ অবিশ্বেজ্

⁵⁹ কফরনাহূম সমাজ-ঘরত্ শিক্ষ্যে দিবার্ অক্তত্ যীশু এ কধাগান্ কোইয়্যে।

⁶⁰ তা শিচ্চ্যগুনোত্তুন্ ভালোক্‌জনে এ কধাগান্ শুনিনে কলাক্, “ইয়েন্ ভারী আগাত্ত্যে শিক্ষ্যে। কন্না ইয়েন্ মানি লোই পারে?”

⁶¹ যীশু নিজো মনে বুঝি পারিলো যে, তা শিচ্চ্যগুনে এ পৌইদ্যেনে নানান্ কধা কদন্। সেনত্তে তে তারারে কলঅ, “ইয়েন্দোই কি তমা মনত্ দুঘ্ পর্?

⁶² সালে মান্‌জ্যপুয়োবো আগেদি যিধু এলঅ তারে সিধু উদি যাদে দেগিলে তুমি কি কবা?

⁶³ মান্‌জ্যর্ কিয়্যেগান্ কনঅ কামর্ নয়; পবিত্র আত্মাগানে জিংকানি দে। মুই তমারে যে কধাগানি কোইয়োং সিয়েনি আত্মিক জিংকানি দান্ গরে,

⁶⁴ মাত্তর্ তমা ভিদিরে এমন্‌ কেঅ কেঅ আঘন্ যিগুনে মরে বিশ্বেজ্ ন-গরন্।” কন্না কন্না যীশুরে বিশ্বেজ্ ন-গরন্ আর কন্না বা তারে শত্রুগুনো আঢত্ ধুরি দিবো, যীশু পৌইল্যেত্তুন্ ধুরি সিয়েন্ হবর্ পেদঅ।

⁶⁵ সেনত্তে তে কলঅ, “মুই তমারে কোইয়োং, বাবা বল্ ন-দিলে কনজনে মইধু এই ন-পারন্।”

পিতরে প্রভু যীশুরে স্বীগের্ গুরিলো

⁶⁶ যীশুর এ কধাগানত্যে শিচ্চ্যগুনোত্তুন্ ভালোক্‌জনে ফিরি গেলাক্ আর তা লগে আঢাউদো বন্ধ গুরি দিলাক্।

⁶⁷ ইয়েনত্তে যীশু সেই বারজন শিচ্চ্যরে কলঅ, “তুমিয়ো কি যেবাত্যে চঅ?”

⁶⁸ শিমোন-পিতর যীশুরে কলঅ, “প্রভু, আমি কা ইধু যেবং? উমর জিংকানির্ কধা দঅ তইধু আঘে।

⁶⁹ আমি বিশ্বেজ্ গোজ্যেই আর হবর্ পেইয়্যেই যে, তুয়ই গোজেনর্ সেই পবিত্র মানুচ্চো।”

⁷⁰ সেক্কে যীশু তারারে কলঅ, “মুই তমা বার জনরে কি বেঈ ন-নেযাং? অদচ তমা ভিদিরে এক্কো শত্রু আঘে।”

⁷¹ ইয়েনত্ যীশু শিমোন ইষ্কারিয়োতর্ পুয়ো যিহূদার্ কধা কোইয়্যে, কিয়া তেয়ই যেরেদি যীশুরে ধুরি দিবো। তে এলদে সেই বারজন ভিদিরে একজন।