যোহন 3 - Chakma Bible

নুয়ো জর্ম

¹ ফরীশীগুনো ভিদিরে নীকদীম নাঙে যিহূদীগুনোর্ এক্কো নেতা এলঅ।

² একদিন রেদোত্ তে যীশু ইধু এইনে কলঅ, “মাষ্টরবাবু, মুই হবর্ পাং তুই এক্কো মাষ্টর্ ইজেবে গোজেনত্তুন্ এচ্চ্যস্, কিয়া তুই যেদক্কানি আমক্ অবার্ কাম্ গোজ্যস্, গোজেনে সমারে ন-থেলে কেঅ সিয়েনি গুরি ন-পারে।”

³ যীশু নীকদীমরে কলঅ, “মুই তমারে ঘেচ্চেক্‌গুরি কঙর্, নুয়ো গুরিনে জর্ম ন-অলে কেঅ গোজেন রেজ্যগান চেই ন-পায়।”

⁴ সেক্কে নীকদীম তারে কলঅ, “মানুচ্‌ বুড়ো ওই গেলে কিবাবোত্যে গুরি তার্ আরঅ জর্ম ওই পারে? দ্বিবার্ মা পেদত্ ফিরি যেইনে তে কি আরঅ জর্ম লোই পারে?”

⁵ জোবত্ যীশু কলঅ, “মুই তরে ঘেচ্চেক্‌গুরি কঙর্, পানি আর পবিত্র আত্মাত্তুন্ জর্ম ন-অলে কনজনে গোজেন রেজ্যত্ সোমেই ন-পারে।

⁶ মান্‌জ্যত্তুন্ যিবে জর্মায় সিবে মানুচ্‌, আর যিয়েন্ পবিত্র আত্মাত্তুন্ জর্মায় সিয়েন্ আত্মা।

⁷ মুই যে তরে কলুং, তমাত্তুন্ নুয়ো গুরিনে জর্ম অনা দরকার্, ইয়েন্দোই আমক্ ন-অবা।

⁸ বৈয়্যের্ যিন্দি মনে কয় সিন্দি বায়্ আর তুই তা রবুয়ো শুনোচ্, মাত্তর্ কুত্তুন্ এজে আর কুধু বা যায় সিয়েন তুই হবর্ ন-পাজ্। পবিত্র আত্মাত্তুন্ যিগুনোর্ জর্ম ওইয়্যে সিগুনোর্‌অ ঠিগ্ সেবাবোত্যে অয়।”

⁹ নীকদীম যীশুরে পুযোর্ গুরিলো, “ইয়েন্ কেধোক্ক্যেন্ গুরি ওই পারে?”

¹⁰ সেক্কে যীশু তারে কলঅ, তুই ইস্রায়েলীগুনোর্ মাষ্টর্ ওইনেয়ো কি ইয়েনি ন-বুঝোচ্?

¹¹ তরে ঘেচ্চ্যেক্‌গুরি কঙর্, আমি যিয়েন হবর্ পেই সিয়েনই কোই আর যিয়েন্ দেক্ক্যেই সে পৌইদ্যেনে সাক্ষি দিই, মাত্তর্ তুমি আমা সাক্ষিগানি এলাফেলা গরঅ।

¹² মুই তমা ইধু জগদ পৌইদ্যেনে কধা কলে যেক্কে বিশ্বেজ্ ন-গরঅ সেক্কে স্বর্গীয় পৌইদ্যেনে কধা কলে কেধোক্ক্যেন্ গুরি বিশ্বেজ্ গুরিবা?

¹³ যে স্বর্গত্ থায় আর স্বর্গত্তুন্ লামি এচ্চ্যে সেই মান্‌জ্যপুয়োবো বাদে আর কনজনে স্বর্গত্ ন-উদোন্।

¹⁴ মোশি যেবাবোত্যেগুরি ধূল্যেচর-চাগালাত্ সেই সাপ্পোরে অজলত্ তুল্ল্যে সেবাবোত্যেগুরি মান্‌জ্য পুয়োবোরেয়ো অজলত্ তুলো অবঅ,

¹⁵ যেন যে কেঅ তা উগুরে বিশ্বেজ্ গরে তে উমর জিংকানি পায়।

¹⁶ “গোজেনে মান্‌জ্যরে এদক্ কোচ্‌পেলদে যে, তার্ বানা এক্কোগুরি পুয়োরে তে দান্ গুরিলো, যেন যে কেঅ সেই পুয়োবো উগুরে বিশ্বেজ্ গরে তে ভস্ত ন-অয় মাত্তর্ উমর্‌অ জিংকানি পায়।

¹⁷ গোজেনে মান্‌জ্যরে দুষি প্রমাণ গুরিবাত্যে তা পুয়োবোরে জগদত্ ন-পাধায়, বরং মান্‌জ্যে যেন পুয়োবোর্ মাধ্যমে পাপত্তুন্ উদ্ধোর্ পান্ সেনত্তে তে তারে পাধেয়্যে।

¹⁸ যে সেই পুয়োবো উগুরে বিশ্বেজ্ গরে তার্ কনঅ বিচের্ ন-অয়, মাত্তর্ যে বিশ্বেজ্ ন-গরে তারে দুষি বিলি আগেত্তুন্ ধুরি ঠিগ্ গরা ওইয়্যে, কিয়া তে গোজেনর্ বানা এক্কোগুরি পুয়ো উগুরে বিশ্বেজ্ ন-গরে।

¹⁹ তারে দুষি বিলি ঠিগ্ গরা ওইয়্যে কিয়া জগদত্ পহ্‌র এচ্চ্যে, মাত্তর্ মান্‌জ্যর্ কামানি ভান্ন্যেই বিলি মানুচ্ পহ্‌রত্তুন্ আন্ধাররে বেশ্ কোচ্‌পেইয়োন্।

²⁰ যে কেঅ অন্যেয় কাম্ গুরি থেলে তে পহ্‌রানরে ঘিনায়। তার্ অন্যেয় কামানি ফগদাং ওই পুড়িবো বিলি তে পহ্‌রঅ ইধু ন-এজে।

²¹ মাত্তর্ যে সত্যর্ পধেদি আঢে তে পহ্‌রঅ ইধু এজে যেন তার্ কামানি যে গোজেনর্ আওজ্ মজিম্ গরা ওইয়্যে সিয়েনি ফগদাং পায়।”

যোহনর্ সাক্ষি

²² ইয়েন পরেদি যীশু আর তা শিচ্চ্যগুনে যিহূদিয়া রেজ্যত্ গেলাক্। সিধু তে তা শিচ্চ্যগুনো সমারে কিজু দিন থেলঅ আর মানুচ্চুনোরে বাপ্তিষ্ম দিয়্যে ধুরিলো।

²³ শালীম নাঙে এক্কান্ আদাম ইধু ঐনোন বিলি এক্কান্ জাগাত্ সেক্কে যোহনেয়ো বাপ্তিষ্ম দের্, কিয়া সে জাগানত্ বোউত্ পানি এলঅ আর মানুচ্চুনেয়ো এইনে বাপ্তিষ্ম লদন্।

²⁴ সেক্কেয়ো যোহনরে জেল্‌খানাত্ বন্দী গরা ন-অয়।

²⁵ সে সময়োত্ ধর্মর্ সুদোম্ মজিম্ সিজি অনা পৌইদ্যেনে যোহন শিচ্চ্যগুনে এক্কো যিহূদী সমারে তর্কাতর্কি আরাম্ভ গোজ্যন্।

²⁶ পরেদি তারা যোহন ইধু এইনে কলাক্, “মাষ্টরবাবু, যিবে যর্দনর্ উই পারত্ তঅ সমারে এলঅ আর যিবে পৌইদ্যেনে তুই সাক্ষ্য দুয়োচ্, চাহ্, তে বাপ্তিষ্ম দের্ আর বেক্কুনে তা ইধু যাদন্।”

²⁷ ইয়েনর্ জোবত্ যোহনে কলঅ, “স্বর্গত্তুন্ দিয়্যে ন-অলে কারঅ পক্ষে কনঅ কিজু পানা সম্ভব্ নয়।

²⁸ তুমি মরে কধে শুন্ন্য, মুই মশীহ নয়, মাত্তর্ মরে তা আগেদি পাধা ওইয়্যে।

²⁹ যা আঢত্ ঝিবোরে দিয়্যে ওইয়্যে, তেয়ই জামেবো। জামেয় সমাজ্যেবো থিয়্যেইনে জামেয়র্ কধা শুনে আর তার্ রবুয়ো শুনিনে ভারী খুজী অয়। ঠিগ্ সেবাবোত্যেগুরি মর্ খুজীগান্ এচ্চ্যে পুরেল।

³⁰ তাত্তুন্ দাঙর্ ওই উদো পুড়িবো আর মত্তুন্ সুরি যা পুড়িবো।”

³¹ যিবে উগুরেত্তুন্ এজে তে বেক্কুনো উগুরে। যিবে পিত্‌থিমীত্তুন্ এজে তে পিত্‌থিমীর, আর তে পিত্‌থিমীর কধা কয়। মাত্তর্ যে স্বর্গত্তুন্ এজে তেয়ই বেক্কুনো উগুরে।

³² তে যিয়েন্ দেক্ক্যে আর শুন্ন্যে সিয়েনই সাক্ষ্য দে, মাত্তর্ কেঅ তার্ সাক্ষ্য মানি ন-লন্।

³³ যে তার্ সাক্ষ্য গ্রাজ্য গোজ্যে তে তারে দিইনে প্রমাণ গোজ্যে যে, গোজেনে যিয়েন্ কয় সিয়েন্ সত্য।

³⁴ গোজেনে যিবেরে পাধেয়্যে তে গোজেনর্ কধা কয়, কিয়া গোজেনে তারে পবিত্র আত্মা মাবি ন-দে।

³⁵ বাবে পুয়োরে কোচ্‌পায় আর তা আঢত্ বেক্কানি দিয়্যে।

³⁶ যে কেঅ পুয়োবো উগুরে বিশ্বেজ্ গরে তে সেক্কে উমর্‌অ জিংকানি পায়, মাত্তর্ যে পুয়োবোরে অমান্য গরে তে সেই জিংকানিগান্ কনদিন্‌অ ন-পেবঅ, বরং গোজেন রাগ্‌কান্ তা উগুরে থেবঅ।