যোহন 20 - Chakma Bible

প্রভু যীশু মরণত্তুন্ জেদা অলঅ

¹ সাপ্তার্ পত্তম্ দিনোর্ বেন্ন্যে মাদান্, আন্ধার্ থাগদে মগ্‌দলীনী মরিয়মে সেই কবর ইধু গেলঅ। তে দেগিলোদে, গোরান মুয়োনত্তুন্ পাত্তর্‌বো সরা ওইয়্যে।

² সেনত্তে তে শিমোন-পিতর আর যে শিচ্চ্যবোরে যীশু কোচ্‌পেদঅ সেই শিচ্চ্যবো ইধু ধাবা যেইনে কলঅ, “মানুচ্চুনে প্রভুরে গোরত্তুন্ নেযেয়োন। তারে কুধু থোইয়োন্ আমি সিয়েন হবর্ ন-পেই।”

³ পিতরে আর সেই অন্য শিচ্চ্যবো সেক্কে নিগিলিনে কবর ইন্দি যাহ্ ধল্লাক্।

⁴ দ্বিজনে একসমারে ধাবা দেদন্। অন্য শিচ্চ্যবো পিতর আগে আগে আরঅ সবরে ধাবা দিইনে পত্তমে গোর ইধু এলঅ, মাত্তর্ তে গোর ভিদিরে ন-গেলঅ।

⁵ তে মাঢা নিগিরিনে চেলঅ, যীশুর কিয়্যেনত্ যে কাবড়ানি বেড়েয়্যে এলঅ সিয়েনি পড়ি আঘে।

⁶ শিমোন-পিতরেয়ো তা পিজে পিজে এইনে কবর ভিদিরে সোমেল আর কাবড়ানি পোজ্যে আগেদে দেগিলো।

⁷ তে আরঅ দেগিলো, তা মাঢাবোত্ যে রুমোলান্ বেড়েয়্যে এলঅ সিয়েন্ অন্য কাবড় সমারে নেই, মাত্তর্ যুদো গুরিনে এক জাগাত্ গুজেই রাগা ওইয়্যে।

⁸ যে শিচ্চ্যবো পত্তমে কবরত্ যেয়্যে তেয়ো সেক্কে ভিদিরে সোমেল আর দেগিনে বিশ্বেজ্ গুরিলো।

⁹ মরণত্তুন্ যীশুর জেদা ওই উদিবার্ যে দরকার্ আঘে, পবিত্র বোইবোর্ সে কধাগান্ তারা আগেদি বুঝি ন-পারন্।

প্রভু যীশু মরিয়মরে দেগা দিলো

¹⁰ ইয়েন পরেদি শিচ্চ্যগুনে ঘরত্ ফিরি গেলাক্,

¹¹ মাত্তর্ মরিয়মে কবর বারেদি থিয়্যেইনে কানা ধুরিলো। তে কানদে কানদে নিগিরিনে কবর ভিদিরে রিনি চেলঅ,

¹² যীশুর্ কিয়্যেগান্ যিয়েনত্ পোজ্যে এলঅ সিয়েনত্ ধুব্ কাবড় উজ্যে দ্বিজন্ স্বর্গদূত্ বৈই আঘন্-এক্কো মাধাবো ইন্দি আর এক্কো ঠেঙদি।

¹³ তারা মরিয়মরে কলাক্, “কিত্ত্যেই কানর্?” মরিয়মে তারারে কলঅ, “মানুচ্চুনে মঅ প্রভুরে নেযেয়োন আর তারে কুধু থোইয়োন্ কোই ন-পারং।”

¹⁴ এ কধাগান্ কোইনে মরিয়মে পিজেদি ফিরিনে রিনি চেলঅ যীশু থিয়্যেই আঘে, মাত্তর্ তে যে যীশু সিয়েন্ বুঝি ন-পারিলো।

¹⁵ যীশু তারে কলঅ, “কিত্ত্যেই কানর্? কারে তগর্?” যীশুরে বাগান চুগিদার্ মনে গুরিনে মরিয়মে কলঅ, “চাহ্, তুই যুনি তারে নেযেই থাচ্ সালে কঅ কুধু থোইয়োচ্। মুই তারে নেযেম্।”

¹⁶ যীশু তারে কলঅ, “মরিয়ম।” সেক্কে মরিয়মে ফিরি থিয়্যেইনে অরামীয় ভাষাদি যীশুরে কলঅ, “রব্বুনি।” রব্বুনি অত্তাৎ মাষ্টরবাবু।

¹⁷ যীশু মরিয়মরে কলঅ, “মরে ধুরি ন-রাগেচ্, কিয়া মুই এজঅ উগুরে বাবা ইধু ন-যাং। তুই বরং ভেইয়ুনো ইধু যেইনে কঅ, যিবে মর্ আর তমার্ বাপ্, যিবে মর্ আর তমার্ গোজেন, মুই উগুরে তা ইধু যাঙর্।”

¹⁸ সেক্কে মগ্‌দলীনী মরিয়মে শিচ্চ্যগুনো ইধু যেইনে হবর্ দিলো, তে প্রভুরে দেক্ক্যে আর প্রভুই তারে এ বেক্‌ কধানি কোইয়্যে।

প্রভু যীশু শিচ্চ্যগুনোরে দেগা দিলো

¹⁹ সেই একই দিনোত্, সাপ্তার্ পত্তম্ দিনোর্ সাজোন্ন্যে অক্তত্ শিচ্চ্যগুনে যিহূদী নেতাগুনোর্ দরে ঘরর্ বেক্‌ দুয়োরানি নাঢিনে এক্কান্ জাগাত্ এগত্তর্ ওইয়োন্। সেক্কে যীশু এইনে তারা সংমধ্যে থিয়্যেইনে কলঅ, “তমার্ শান্তি ওক্।”

²⁰ এ কধাগান্ কোইনে তে তার্ দ্বিয়েন্ আঢ্ আর বুগো ধাক্কান্ তা শিচ্চ্যগুনোরে দেগেল। প্রভুরে দেগিনে শিচ্চ্যগুনে অমকদ হুজী অলাক্।

²¹ যেরেদি যীশু আরঅ তারারে কলঅ, “তমার্ শান্তি ওক্‌। বাবা যেধোক্ক্যেনগুরি মরে পাধেয়্যে মুইয়ো সেধোক্ক্যেনগুরি তমারে পাধাঙর্।”

²² এ কধাগান্ কোইনে তে শিচ্চ্যগুনো উগুরে ফুন্ দিইনে কলঅ, “পবিত্র আত্মাগানরে গুজি লঅ।

²³ তুমি যুনি কার পাপ খেমা গরঅ সালে তা পাপ্পান্ খেমা গরা অবঅ, আর যুনি কার পাপ খেমা ন-গরঅ সালে তা পাপ্পান্ খেমা গরা ন-অবঅ।”

অবিশ্বেজি থোমার বিশ্বেজ্

²⁴ যীশু যেক্কে এচ্চ্যে সেক্কে থোমা নাঙে সেই বারজন শিচ্চ্য ভিদিরে এক্কো তারা সমারে ন-এলঅ। এই থোমারে দিদুম কুয়ো অদঅ।

²⁵ অন্য শিচ্চ্যগুনে যেরেদি থোমারে কলাক্, “আমি প্রভুরে দেক্ক্যেই।” থোমা তারারে কলঅ, “মুই তা দ্বি আদত্ যুনি জোলোই মাজ্যে চিহ্নো ন-দেগং, সেই চিহ্নোগানত্ আঙুল্ ন-দুয়োং আর তা বুগোত্ আঢ্-দুয়োং, সেধক্কন্ সং কনঅ বাবদে বিশ্বেজ্ ন-গুরিম্।”

²⁶ ইয়েনর্ এক সাপ্তা বাদে শিচ্চ্যগুনে আরঅ ঘরঅ ভিদিরে এগত্তর্ অলাক্, আর থোমায়ো তারা সমারে এলঅ। যুনিয়ো বেক্‌ দুয়োরানি বান্ন্যে এলঅ তো যীশু এইনে তারা সংমধ্যে থিয়্যেইনে কলঅ, “তমার্ শান্তি ওক্‌।”

²⁷ পরেদি তে থোমারে কলঅ “তঅ আঙুলুন্ ইয়োত্ দিইনে মঅ দ্বিয়েন্ আঢ্ চাহ্ আর তঅ আঢ্‌তানি বাবেইনে মঅ বুগোত্ রাগা। অবিশ্বেজ্ ন-গুরিচ্ বরং বিশ্বেজ্ গর্।”

²⁸ সেক্কে থোমা কলঅ, “ও মঅ গিরোজ্, ও মঅ গোজেন।”

²⁹ যীশু তারে কলঅ, “থোমা, তুই কি মরে দেক্ক্যচ্ বিলি বিশ্বেজ্ গোজ্যস্? যিগুনে ন-দেগিনে বিশ্বেজ্ গরন্ তারা বর্ পেইয়্যে।”

³⁰ যীশু শিচ্চ্যগুনো মুজুঙোত্ চিহ্নো ইজেবে আরঅ ভালোক্কানি আমক্ অবার্ কাম্ গোজ্যে; সিয়েনি এ বোইবোত্ লেগা ন-অয়।

³¹ মাত্তর্ ইয়েনি বেক্কানি লেগা অলঅ যাতে তুমি বিশ্বেজ্ গরঅ, যীশুই মশীহ, গোজেনর্ পুয়ো, আর বিশ্বেজ্ গুরিনে যেন তা মাধ্যমে জিংকানি পঅ।