যোহন 17 - Chakma Bible

শিচ্চ্যগুনোত্যে তবনা

¹ এই বেক্‌ কধানি কনার্ পরেদি যীশু স্বর্গ ইন্দি রিনি চেইনে কলঅ, বাবা, সময় এচ্চ্যে। তঅ পুয়োবোর্ মহিমাগান্ ফগদাং গর্ যেন পুয়োবোয়ো তঅ মহিমাগান্ ফগদাং গুরি পারে।

² তুই তারে বেক্‌ মানুচ্চুনো উগুরে অধিকার্ দুয়োচ্, যেন যিগুনোরে তুই তা আদত্ দুয়োচ্ তারারে বেক্কুনোরে তে উমর্‌অ জিংকানি দি পারে।

³ তরে, মানে এক্কো গুরি সত্য গোজেনরে আর তুই যিবেরে দিপাধেয়োচ্ সেই যীশু খ্রীষ্টরে হবর্ পানাই অলঅ উমর্‌অ জিংকানি।

⁴ তুই যে কামানি মরে গুরিবাত্যে দুয়োচ্ সিয়েনি থুম্ গুরিনে এ জগদত্ মুই তর্ মহিমাগান্ ফগদাং গোজ্যং।

⁵ বাবা, পিত্‌থিমীগান্ বানেবার্ আগেদি তঅ সমারে মর্ যে মহিমাগান্ এলঅ সেই মহিমাগান্ তুই আরঅ মরে দে।

⁶ জগদ ভিদিরেত্তুন্ যিগুনোরে তুই মরে দুয়োচ্ মুই তারা ইধু তরে ফগদাং গোজ্যং। তারা তরই এলাক্, আর তুই তারারে মত্তে দুয়োচ্। তারা তঅ কধা মানিনে চলদন্।

⁷ তারা ইক্কিনে বুঝি পাজ্জ্যন্, যিয়েনি তুই মরে দুয়োচ্ সিয়েনি তত্তুন্ এচ্চ্যে।

⁸ ইয়েনর্ কারণান্ অলঅ, তুই যিয়েনি যিয়েনি মরে কবাত্যে কোইয়োচ্ সিয়েনি মুই তারারে কোইয়োং। তারা সিয়েনি মানি লোইনে জদবদে হবর্ পেইয়োন্দে যে, মুই তত্তুন্ এচ্চ্যং, আর বিশ্বেজ্অ গোজ্জ্যন্দে যে, তুয়ই মরে পাধেয়োচ্।

⁹ মুই বেক্কুনোত্তে কোজোলী ন-গরঙর্, মাত্তর্ যিগুনোরে তুই মঅ আদত্ দুয়োচ্ তারাত্যে কোজোলি গরঙর্, কিয়া তারা দঅ তরই।

¹⁰ যিয়েনি মর্ সিয়েনি বেক্কানি তর্ আর যিয়েনি তর্ সিয়েনি বেক্কানি মর্। সিগুনোর্ মাধ্যমে মর্ মহিমাগান্ ফগদাং ওইয়্যে।

¹¹ মুই আর এ পিত্‌থিমীত্ নেই, মাত্তর্ তারা দঅ এ পিত্‌থিমীত্ আঘন্; আর মুই তঅ ইধু এজঙর্। পবিত্র বাবা, তুই মরে তর্ যে নাঙান্ দুয়োচ্ সেই নাঙানর্ গুণে ইগুনোরে রক্ষ্যে গর্, যেন আমি যেধোক্ক্যেন্ এক, ইগুনেয়ো সেধোক্ক্যেন্ এক ওই পারন্।

¹² মুই যেদক্ দিন তারা সমারে এলুং সেদক্ দিন তর্ যে নাঙান্ তুই মরে দুয়োচ্ সেই নাঙানর্ গুণে মুই তারারে রোক্ষ্যে গুরি এচ্চ্যং। মুই তারারে চুগি দুয়োং, তারাত্তুন্ কনজনে বর্‌বাদ্ ন-অন্। বানা যিবের্ ভস্ত অবার্ কধা এলঅ তেয়ই ভস্ত ওইয়্যে, যেন পবিত্র বোইবোর্ কধা পূরোণ্ অয়।

¹³ ইক্কিনে মুই তঅ ইধু এজঙর্, আর মর্ হুজীয়ে যেন তারার্ মনানি ভুরি যায় সেনত্তে জগদত্ থাগদে এই বেক্ কধানি কঙর্।

¹⁴ তুই যিয়েনি কোইয়োচ্ মুই তারারে সিয়েনি জানেয়োং। জগদ মানুচ্চুনে তারারে ঈচ্ গোজ্যন্, কিয়া মুই যেধোক্ক্যেন্ এ জগদর্ নয় তারায়ো সেধোক্ক্যেন্ এ জগদর্ নয়।

¹⁵ মুই তরে কোজোলি ন-গরঙর্ তুই তারারে এ জগদত্তুন্ নেযাগোই, বরং কোজোলি গরঙত্তে, শদান আঢত্তুন্ তারারে রোক্ষ্যে গর্।

¹⁶ মুই যেধোক্ক্যেন্ এ জগদর্ নয় তারায়ো সেবাবোত্যে এ জগদর্ নয়।

¹⁷ সত্যলোই তর্ নাঙে তুই তারারে যুদো গুরি থঅ। তর্ কধাগানি সেই সত্য।

¹⁸ তুই যেবাবোত্যেগুরি মরে জগদত্ পাধেয়োচ্ সেবাবোত্যেগুরি মুইয়ো তারারে জগদত্ পাধেয়োং।

¹⁹ তারাত্যে তর্ নাঙে মুই নিজোরে যুদো গোজ্যং যেন সত্যলোই তারারেয়ো ফারগ্ গরা অয়।

²⁰ মুই যে বানা ইগুনোত্তে কোজোলি গরঙর্ সিয়েন নয়, মাত্তর্ যিগুনে ইতারা কধালোই মঅ উগুরে বিশ্বেজ্ গুরিবাক্ তারাত্যেয়ো কোজোলি গরঙর্, যেন তারা বেক্কুনে এক অন্।

²¹ বাবা, তুই যেধোক্ক্যেন্ মঅ সমারে আঘচ্ আর মুই তঅ সমারে আঘং সেধোক্ক্যেন্ তারায়ো যেন আমা সমারে এগত্তর্ ওইনে থেই পারন্। সেক্কে জগদর্ মানুচ্চুনে বিশ্বেজ্ গুরি পারিবাক্ যে, তুই মরে পাধেয়োচ্।

²² যে মহিমাগান্ তুই মরে দুয়োচ্ সিয়েন মুই তারারে দুয়োং যেন আমি যেধোক্ক্যেন্ এক তারায়ো সেধোক্ক্যেন্ গুরি এক্ ওই পারন্,

²³ অত্তাৎ মুই তারা সমারে আগং আর তুই মঅ সমারে আগচ্, আর এবাবোত্যেগুরি যেন তারা গমেডালে এক ওই পারন্। সেক্কে জগদর্ মানুচ্চুনে কোই পারিবাক্ যে, তুয়ই মরে পাধেয়োচ্, আর মরে যেধোক্ক্যেন্ তুই কোচ্‌পাচ্ সেধোক্ক্যেন্ গুরি তারারেয়ো কোচ্‌পেয়োচ্।

²⁴ “বাবা, মুই চাং যিগুনোরে তুই মরে দুয়োচ্, মর্ মহিমাগান্ চেবাত্যে তারা যেন মুই যিধু আঘং সিধু মঅ সমারে থেই পারন্। সেই মহিমাগান্ তুয়ই মরে দুয়োচ্, কিয়া পিত্‌থিমীগান্ সৃট্টি অবার্ আগেত্তুন্ ধুরি তুই মরে কোচ্‌পেইয়োচ্।

²⁵ ন্যায়বলা বাবা, জগদর্ মানুচ্চুনে তরে ন-চিনোন্ মাত্তর্ মুই তরে চিনোং। আর তুই যে মরে দিপাধেয়োচ্ ইগুনে সিয়েন্ বুঝি পাজ্জ্যন্।

²⁶ মুই তারা ইধু তরে ফগদাং গোজ্যং আহ্ আরঅ ফগদাং গুরিম্, যেন তুই মরে যেধোক্ক্যেন্ কোচ্‌পাচ্ সেধোক্ক্যেন্ কোচ্‌পানা তারা মনত্ থায়, আর মুই যেন তারা সমারে এগত্তর্ থাং।”