যোহন 13 - Chakma Bible

শিচ্চ্যগুনোরে টেং ধোই দেনা

¹ উদ্ধোর্-পরবর্ কিজু আগর্ ঘটনা। যীশু বুঝি পারিলোদে তার্ এ পিত্‌থিমীগান ফেলেনে বাবা ইধু যেবার্ অক্‌ত ওইয়্যে। এ পিত্‌থিমীত্ যিগুনে তার্ নিজোর্ মানুচ্‌ এলাক্ তারারে তে কোচ্‌পেদ আর শেজদি সং কোচ্‌পেইয়্যে।

² সেক্কে হেবার্ অক্‌ত। ইয়েন আগেদি শদানে শিমোনর্ পুয়ো যিহূদা ইষ্কারিয়োত মনত্ যীশুরে শত্রুগুনো আঢত্ ধোরেই দিবার্ আওজ্‌চান্ জাগেই দিয়্যে।

³ যীশু কোই পারিদো, বাবা গোজেনে তা আঢত্ বেক্কানি দিয়্যে। তে আরঅ কোই পারিদো, তে তাত্তুন্ এচ্চ্যে আর তা ইধু ফিরি যার্।

⁴ ইয়েনত্যে তে হানাগান্ থোইনে উদিলো আর উগুরেদি কাবড়ান্ খুলি ফেলেইনে এক্কান্ গান্‌জাকানি লোইনে ফার্‌বোত্ বেড়েল।

⁵ সিয়েন পরেদি তে গাবালাত্ পানি ঢালিনে শিচ্চ্যগুনো টেঙানি ধুয়ো ধুরিলো আর ফার্‌বোত্ বেড়েইয়্যে গান্‌জাকানিগান্দোই সিয়েনি পুযি দিয়্যে ধুরিলো।

⁶ এবাবোত্যেগুরি যীশু যেক্কে শিমোন-পিতর ইধু এলঅ সেক্কে পিতরে তারে কলঅ, “প্রভু, তুই কি মঅ টেঙানি ধোই দিবে?”

⁷ যীশু জোব্ দিলো, “মুই যিয়েন্ গরঙর্ সিয়েন্ তুই ইক্কে বুঝি ন-পারর্ মাত্তর্ যেরেদি বুঝি পারিবে।”

⁸ পিতরে তারে কলঅ, “তুই কনদিন্‌অ মঅ টেঙানি ধোই ন-দিবে।” যীশু পিতররে কলঅ, “যুনি মুই তরে ধোই ন-দুয়োং সালে মঅ লগে তর্ কনঅ মিলেমিলি নেই।”

⁹ সেক্কে শিমোন-পিতরে কলঅ, “প্রভু, সালে বানা মঅ টেঙানি নয়, মঅ আঢ্‌তানি আর মাঢাবোয়ো ধোই দে।”

¹⁰ যীশু তারে কলঅ, “যে গাত্ত্যে তার্ টেঙানি বাদে আর কিচ্চু ধবার্ দরকার্ নেই, কিয়া তার্ আর বেক্কানি সাব্ আঘে।

¹¹ তুমি অবুচ্চ্যই সাব্ আঘঅ, মাত্তর্ বেক্কুনে নয়।” কন্না তারে ধুরি দিবো সিয়েন্ তে হবর্ পেদঅ। সেনত্তে তে কলঅ, “তুমি বেক্কুনে সাব্ নয়।”

¹² শিচ্চ্যগুনোর্ বেক্ টেঙানি ধনার্ পরেদি যীশু তা উগুরে কাবড়ান্ উরিনে আরঅ বুজিলো আহ্ তারারে কলঅ, মুই কি গুরিলুং সিয়েন্ কি তুমি বুঝিলা?

¹³ তুমি মরে মাষ্টর্ আর প্রভু বিলি ডাগঅ, আর সিয়েন্ থিগই কঅ কিয়া মুয়ই সিবে।

¹⁴ মাত্তর্ মুই প্রভু আর মাষ্টর্ ওইনেয়ো যেক্কে তমা টেঙানি ধোই দিলুং সেক্কে তুমিয়ো একজন আরেকজনরে টেঙানি ধোই দেনা উচিত্।

¹⁵ মুই তমা ইধু ইয়েন্ গুরি দেগেয়োং, যেন তমা উগুরে মুই যিয়েন্ গুরিলুং তুমিয়ো সিয়েন্ গরঅ।

¹⁶ মুই তমারে ঘেচ্চ্যেক্‌গুরি কঙর্, চাগর্ তা গিরোজত্তুন্ দাঙর্ নয়। যিবেরে দিপাধা ওইয়্যে তে তাত্তুন্ দাঙর্ নয় যে তারে দিপাধেয়্যে।

¹⁷ ইয়েনি বেক্কানি কোই পারিনে যুনি সিয়েনি পালঅ সালে তুমি বর্ পেইয়্যে।

¹⁸ “মুই তমা বেক্কুনো কধা ন-কঙর্। মুই যিগুনোরে বেঈ লোইয়োং তারারে দঅ মুই হবর্ পাং। মাত্তর্ পবিত্র বোইবোর্ এ কধাগান্ পূরোণ উয়ো পরিবো, ‘যে মঅ সমারে হানা-দানা গরে, তেয়ো মঅ বিরুদ্ধে টেং তুল্ল্যে।’

¹⁹ ইয়েন গুদিবার্ আগেদি মুই তমারে কঙর্, যেন ঘুদিলে পরেদি তুমি বিশ্বেজ্ গুরি পার যে, মুয়ই সিবে।

²⁰ মুই তমারে ঘেচ্চ্যেক্‌গুরি কঙর্, মুই যিবেরে দিপাদাং, যে তারে মানি লয় তে মরেয়ো মানি লয়, আর যে মরে মানি লয়, যিবে মরে পাধেয়্যে তে তারেয়ো মানি লয়।”

কন্না প্রভু যীশুরে ধুরি দিবো?

²¹ এ বেক্‌ কধানি কনার্ পরেদি যীশু মনান্ থির্ নেইয়্যে অলঅ। তে খুলোমেলাগুরি কলঅ, “মুই তমারে ঘেচ্চেক্‌গুরি কঙর্, তমাত্তুন্ একজনে মরে শত্রুগুনো আঢত্ ধুরি দিবো।”

²² যীশু কা কধা কর্ সিয়েন্ বুঝি ন-পারিনে শিচ্চ্যগুনে একজন আরেকজন ইন্দি রিনি চাহ্ ধুরিলাক্।

²³ তারাত্তুন্ যীশু যিবেরে কোচ্‌পেদ তে যীশুর কায়কুরে এলঅ।

²⁴ শিমোন-পিতর তারে ইজিরেদি কলঅ, “তে কা কধা কর্ পুযোর্ গরঅ।”

²⁵ সেই শিচ্চ্যবো সেক্কে যীশু ইন্দি এলান্ দিইনে কলঅ, “প্রভু, তে কন্না?”

²⁶ যীশু জোব্ দিলো, “এ রুটির্ কট্টাগান্ কদরাবোত্ ভুরেইনে যারে দিম্ তেয়ই সে মানুচ্চো।” আর তে রুটির্ কট্টাগান্ কদরাবোত্ ভুরেইনে শিমোন ইষ্কারিয়োত পুয়ো যিহূদারে দিলো।

²⁷ রুটির্ কট্টাগান্ লনার্ পরেদি শদানে যিহূদা ভিদিরে সোমেল। যীশু তারে কলঅ, “যিয়েন্ গুরিবে যাদিমাদি গর্‌।”

²⁸ যিগুনে যীশু সমারে খাদন্ তারা কনজনে ন-বুঝিলাক্ কিত্তে যীশু যিহূদারে এ কধাগান্ কলঅ।

²⁹ কেঅ কেঅ মনে গুরিলাক্, পরবত্যে যিয়েনি দরকার্ যীশু যিহূদারে সিয়েনি কিনি আনিবাত্যে কোইয়্যে বা নাঢা মানুচ্চুনোরে কিজু দিবাত্যে কোইয়্যে, কিয়া তারার্ টেঙা বাক্সুবো যিহূদা ইধু থেদঅ।

³⁰ রুটির্ কট্টাগান্ নেযানার্ লগে লগে যিহূদা বারেদি গেলঅ। সেক্কে রেত্ ওইয়্যে।

নুয়ো উগুম্

³¹ যিহূদা বারেদি যানার্ পরেদি যীশু কলঅ, মান্‌জ্য পুয়োবোর্ মহিমাগান্ ফগদাং অবার্ সময় এচ্চ্যে আর তা মাধ্যমে গোজেনর্ মহিমাগান্ ফগদাং পেবঅ।

³² গোজেনর্ মহিমাগান্ যেক্কে তা মাধ্যমে ফগদাং অবঅ সেক্কে গোজেনেয়ো মান্‌জ্য পুয়োবোর্ মহিমাগান্ নিজো ভিদিরে ফগদাং গুরিবো আর সিয়েন্ তে যাদিমাদি গুরিবো।

³³ “পুয়োলগ্, আর বানা কিজু সময় মুই তমা সমারে আঘং। তুমি মরে তোগেবা, মাত্তর্ মুই যিহূদী নেতাগুনোরে যেবাবোত্যে কোইয়োং, ‘মুই যিধু যাঙর্ তুমি সিধু এই ন-পারিবা,’ সেবাবোত্যে তমারেয়ো ইক্কিনে সিয়েন্ কঙর্।

³⁴ এক্কান্ নুয়ো উগুম্ মুই তমারে দোঙর্-তুমি একজন আরেকজনরে কোচ্‌পেইয়ো। মুই যেধোক্ক্যেন্ তমারে কোচ্‌পেইয়োং সেধোক্ক্যেন্ তুমিয়ো একজন আরেকজনরে কোচ্‌পেইয়ো।

³⁵ যুনি তুমি একজন আরেক জনরে কোচ্‌পঅ সালে বেক্কুনে বুঝি পারিবাক্ তুমি মর্ শিচ্চ্য।”

পিতরর্ এগেম্

³⁶ শিমোন-পিতর যীশুরে কলঅ, “প্রভু, তুই কুধু যর্?” যীশু জোব্ দিলো, “মুই যিধু যাঙর্ তুমি ইক্কিনে মঅ সমারে সিধু এই ন-পারঅ, মাত্তর্ জেরেদি তুমি এবা।”

³⁷ পিতরে তারে কলঅ, “প্রভু, কিত্ত্যে ইক্কিনে আমি তঅ সমারে যেই ন-পারিবোং? তত্ত্যে মুই মঅ পরাণান্-অ দিম্।”

³⁸ সেক্কে যীশু কলঅ, “ঘেচ্চেক্‌গুরি কি তুই মত্যে তঅ পরাণান্ দিবে? মুই তরে ঘেচ্চেক্‌গুরি কঙর্, রাদা কুরো ডাগ্ কারিবার্ আগেদি তুই তিনবার্ কবে, তুই মরে ন-চিনোচ্।”