যোহন 12 - Chakma Bible

মরিয়মর শ্রদ্ধা

¹ উদ্ধোর-পরব ছদিন্ আগে যীশু বৈথনিয়াত্ গেলঅ। যিবেরে তে মরণত্তুন্ জেদা গোজ্যে সেই লাসারে বৈথনিয়াত্ বজত্তি গুরিদো।

² সিধু তারা যীশুত্যে হানার্ যুক্কোল গুরিলাক্। মার্থা হানা লবিয়োত্ গরের্। যিগুনে যিশু সমারে হেবাত্যে বোচ্চ্যন্ তারা ভিদিরে লাসারেয়ো এলঅ।

³ এমন সময়োত্ মরিয়মে কমেদি তিনশত্ গ্রাম অমকদ মংগা, খাটি তুম্‌বাচ্‌ তেলান্ আনিলো আর যীশুর্ টেঙত্ ঢালি দিইনে নিজো চুল্‌লোই তা টেঙানি পুযি দিলো। সেই আতর তুম্‌বাচে গোদা ঘরানি ভুরি গেল।

⁴ যীশু শিচ্চ্যগুনোত্তুন্ এক্কো, যে তারে শত্রুগুনো আঢত্ ধুরি দিবো, সেই যিহূদা ইষ্কারিয়োতে কলঅ,

⁵ “এ আতরান্ তিনশত দীনার্‌লোই বেজিনে নাঢা মানুচ্চুনোরে দিয়্যে যেদঅ। কিত্ত্যে সিয়েন্ গরা ন-অলঅ?”

⁶ যিহূদা যে নাঢা মানুচ্চুনো পৌইদ্যেনে চিন্তে গুরিনে এ কধাগান্ কোইয়্যে সিয়েন্ নয়। আসলে তে এলদে চুর্। টেঙা বাক্সুবো তাইধু থেদঅ বিলি যিগুন্ থুয়ো অদঅ সিগুনোত্তুন্ চুর্ গুরিদো।

⁷ যীশু কলঅ, “তুমি তারে মনত্ দুঘ্ ন-দুয়ো। মরে কবর্ দিবার্ সময়োত্ সাজেবাত্যে তে ইয়েন্ থোইয়্যে।

⁸ নাঢা মানুচ্চুনে দঅ নিত্য তমা ইধু আগন্, মাত্তর্ মরে তুমি নিত্য ন-পেবা।”

⁹ যীশু বৈথনিয়াত্ আঘন্ কোই পারিনে যিহূদীগুনো ভিদিরেত্তুন্ বোউত্ মানুচ্ সিধু এলাক্। তারা যে বানা যীশুত্যে সিধু এচ্চ্যন্ সিয়েন্ নয়, মাত্তর্ যিবেরে যীশু মরণত্তুন্ জেদা গোজ্যে সেই লাসাররেয়ো চেবাত্যে এলাক্।

¹⁰ সেক্কে আজল্ ধর্মগুরুগুনে লাসাররেয়ো মারে ফেলেবাক্ বিলি ঠিগ্ গুরিলাক্,

¹¹ কিয়া লাসারর্ কারনে যিহূদীগুনো ভিদিরে ভালোক্‌জনে নেতাগুনোরে ফেলেইনে যীশু উগুরে বিশ্বেজ্ গুরিলাক্।

যিরূশালেমত্ সমানা

¹² যিদুক্কুন্ মানুচ্ পরবত্ যেয়োন্ তারা সে পরেদি দিনোত্ শুনিলাক্ যীশু যিরূশালেমত্ এজের্।

¹³ সেক্কে তারা খাজোর্ পাদালোই তারে আগ্ বারেই আনিবাত্যে গেলাক্ আর রঅ ছাড়িনে কুয়ো ধুরিলাক্, “হোশান্না, যে প্রভুর নাঙে এজের্ তার্ বাঈনী ওক্‌। তেয়ই ইস্রায়েলর্ রাজা।”

¹⁴ পবিত্র বোইবোর্ কধা মজিম্ যীশু এক্কো গাধা দেগিনে তা উগুরে বুজিলো। বোইবোত্ লেগা আঘে,

¹⁵ ও সিয়োন-ঝিবো, ন-দোরেচ্। রিনি চাহ্, তর্ রাজাবো গাধা ছঅ উগুরে চরিনে এজের্।

¹⁶ যীশুর্ শিচ্চ্যগুনে পত্তমে ইয়েনি বুঝি ন-পারিলাক্। যেরেদি যীশুর্ মহিমাগান্ যেক্কে ফগদাং অলঅ সেক্কে তারার্ মনত্ পড়িলো পবিত্র বোইবোর্ সে কধাগান্ যীশু পৌইদ্যেনে লেগা ওইয়্যে। তারার্ আরঅ মনত্ পড়িলো মানুচ্চুনে যীশুত্যে ইয়েনি বেক্কানি গোজ্যন্।

¹⁷ লাসাররে কবরত্তুন্ ডাগিনে জেদা গুরি তুলিবার্ অক্তত্ যিদুক্কুন্ মানুচ্ যীশুর্ কায়কুরে এলাক্ তারা লাসারে জেদা ওই উদোনা পৌইদ্যেনে সাক্ষি দিয়্যে ধুরিলাক্।

¹⁸ সেনত্তে মানুচ্চুনে যীশুরে অাগ্‌বারেই আনিবাত্যে যেয়োন্, কিয়া তারা শুন্ন্যন্‌দে যীশুই সেই আমক্ অবার্ কামান্ গোজ্যে।

¹⁹ ইয়েন দেগিনে ফরীশীগুনে একজন আরেকজনরে কলাক্, “আমার কনঅ লাভ্ ন-অর্। চঅ, গোদা দুনিয়েগান্ তা দলত্ যেয়েগোই।”

নিজো মরণ পৌইদ্যেনে প্রভু যীশু

²⁰ সেই পরবত্ যিগুনে উবোসনা গুরিবাত্যে এচ্চ্যন্ তারা ভিদিরে কয়েক্কো গ্রীকঅ এলাক্।

²¹ তারা ফিলিপ ইধু এইনে তারে কোজোলি গুরিনে কলাক্, “এইয়্যে শুন্, আমি যীশুরে দেগিবাত্তে চেই।” ফিলিপে অলঅ গালীল রেজ্যর্ বৈৎসৈদা আদাম মানুচ্।

²² ফিলিপে যেইনে কধাগান্ আন্দ্রিয়রে কলঅ। যেরেদি আন্দ্রিয় আর ফিলিপে যেইনে যীশুরে কলাক্।

²³ যীশু সেক্কে আন্দ্রিয় আর ফিলিপরে কলঅ, মান্‌জ্য পুয়োবোর্ মহিমাগান্ ফগদাং পেবার্ অক্‌ত এইচ্চ্যে।

²⁴ মুই তমারে ঘেচ্চ্যেক্‌গুরি কঙর্, গম বীজিবো মাদিত্ পরিনে যুনি ন-মরে সালে বানা এক্কো বীজ্ থায়, মাত্তর্ যুনি মরে সালে বোউত্ শোজ্য জর্মায়।

²⁵ যে নিজো পরাণানরে বেশ্ কোচ্‌পায় তে তার্ ঘেচ্চেক্‌গুরি জিংকানিগান্ আরায়, মাত্তর্ যে এ জগদত্ সিয়েন্ ন-গরে তে তার্ ঘেচ্চেক্‌গুরি জিংকানিগান্ উমরত্যে রোক্ষ্যে গুরিবো।

²⁶ কনজনে যুনি মরে সেবা গুরিবাত্তে চায় সালে তে মঅ পধেদি চোলোক্। মুই যিধু আঘং মর্ সেবাগুরিয়্যেবোয়ো সিধু থেবঅ। কনজনে যুনি মরে সেবা গরে সালে বাবা তারে সর্মান গুরিবো।

²⁷ “মঅ মনান্ ইক্কিনে ওলোজোলো ওইয়্যে। মুই কি এ কধাগান্ কোম্, ‘বাবা, যে সময়বো এচ্চ্যে সে সময়বোত্তুন্ মরে রোক্ষ্যে গর্’? মাত্তর্ ইয়েনত্যে দঅ মুই এ সময়ান সং এচ্চ্যং।

²⁸ বাবা, তঅ মহিমাগান্ ফগদাং গর্।” স্বর্গত্তুন্ সেক্কে এ কধাগান্ শুনো গেলঅ, “মুই মঅ মহিমাগান্ ফগদাং গোজ্যং আহ্ আরঅ সিয়েন্ ফগদাং গুরিম।”

²⁹ যে মানুচ্চুনে সিয়েনত্ থিয়্যেই এলাক্ তারা সিয়েন্ শুনিনে কলাক্, “সিয়েন মেঘ গুজুরোনি।” কেঅ কেঅ আরঅ কলাক্, “কন্ স্বর্গদূতে তা সমারে কধা কলঅ।”

³⁰ সেক্কে যীশু কলঅ, “এ কধাগান্ মত্যে কুয়ো ন-অয়, মাত্তর্ তমাত্যে কুয়ো ওইয়্যে।

³¹ এ জগদ মানুচ্চুনোর্ বিচের সময় এবেরা এচ্চ্যে, আর জগদর্ গিরোজ আঢত্তুন্ ইক্কিনে রাজাগিরি কাড়ি নেযা অবঅ।

³² মরে যেক্কে মাদিত্তুন্ অজলত্ তুলো অবঅ সেক্কে মুই বেক্কুনোরে মঅ কায়কুরে টানি আনিম্।”

³³ তার্ কিবাবোত্যে মরণান্ অবঅ সিয়েন বুঝেবাত্যে তে এ কধাগান্ কলঅ।

³⁴ সেক্কে মানুচ্চুনে যীশুরে কলাক্, “আমি পবিত্র বোইবোত্তুন্ শুন্ন্যেই মশীহ উমরত্তে থেবঅ। মাত্তর্ তুই কিবাবোত্যে গুরি কর্ যে, মান্‌জ্য পুয়োবোরে অজলত্ তুলো অবঅ? সালে এ মান্‌জ্যপুয়োবো কন্না?”

³⁵ যীশু তারারে কলঅ, “আর কয়েক্ দিনোত্তে পহ্‌রান্ তমা সমারে সমারে আঘে। পহ্‌রান্ তমা ইধু থাদে সময়োত্ আঢা মারঅ যেন আন্ধারানে তমারে জিদি ন-পারে। যে আন্ধারত্ আঢে তে কুদু যার্ সিয়েন হবর্ ন-পায়।

³⁶ পহ্‌রান্ তমা ইধু থাদে সময় পহ্‌রান উগুরে বিশ্বেজ্ গরঅ যেন তুমি সেই পহ্‌র মানুচ্ ওই পারঅ।” এ বেক্ কধানি কনার্ পরেদি যীশু মানুচ্চুনো মুজুঙোত্তুন্ যেইনে নিজোরে লুগেই রাগেল।

বিশ্বেজ্ আর অবিশ্বেজর্ ফল

³⁷ যুনিয়ো তে তারা মুজুঙোত্ চিহ্নো ইজেবে এদক্কানি আমক্ কাম্ গোজ্যে তো মানুচ্চুনে তা উগুরে বিশ্বেজ্ ন-গরন্।

³⁸ ইয়েন ওইয়্যেদে যেন ভাববাদী যিশাইয় কোইয়্যে এ কধাগান্ পূরোণ্ অয়: প্রভু, আমার দিয়্যে হবরান্ কন্না বিশ্বেজ্ গোজ্জ্যে কা ইধু বা প্রভুর্ খেমতাবলা আঢ্‌তান্ ফগদাং ওইয়্যে?

³⁹ সেই মানুচ্চুনে ইয়েনত্যে বিশ্বেজ্ গুরি ন-পারন্, কিয়া যিশাইয় যেবাবোত্যেগুরি কোইয়্যে সেবাবোত্যেগুরি

⁴⁰ “গোজেনে তারা চোগ্‌কুন্ নাঢি দিয়্যে আর মনানি বাজে গুরি দিয়্যে, যাতে তারা চোগেদি ন-দেগন্ আর মনানদি ন-বুঝোন্, আর গম্ অবাত্তে তাইধু ফিরি ন-এজন্।”

⁴¹ যিশাইয় যীশুর মহিমাগান্ দেক্ক্যে বিলি তা পৌইদ্যেনে এ কধাগান্ কোইয়্যে।

⁴² তো নেতাগুনোত্তুন্ ভালোক্‌জনে যীশু উগুরে বিশ্বেজ্ গুরিলাক্, মাত্তর্ ফরীশীগুনে সমাজত্তুন্ তারারে নিগিলেই দিবাক্ সেই দরে তারা সিয়েন্ স্বীগের্ ন-গুরিলাক্।

⁴³ তারা গোজেনত্তুন্ বাঈনী পানাত্তুন্ মান্‌জ্যত্তুন্ বাঈনী পানাগান্ বেশ্ গম্ পেদাক্।

⁴⁴ পরেদি যীশু রঅ দাঙর্ গুরিনে কলঅ, “যে মঅ উগুরে বিশ্বেজ্ গরে তে যে বানা মঅ উগুরে বিশ্বেজ্ গরে সিয়েন্ নয়, মাত্তর্ যে মরে পাধেয়্যে তা উগুরেয়ো বিশ্বেজ্ গরে।

⁴⁵ যে মরে দেগে, যিবে মরে পাধেয়্যে তে তারেয়ো দেগে।

⁴⁶ মুই এ জগদত্ পহ্‌র ইজেবে এচ্চ্যং যেন মঅ উগুরে যে বিশ্বেজ্ গরে তে আন্ধারত্ ন-থায়।

⁴⁷ যুনি কেঅ মঅ কধা শুনিনে সেবাবোত্যেগুরি ন-চলে সালে মুই নিজে তার্ বিচের্ ন-গরং, কিয়া মুই মান্‌জ্যরে দুষী প্রমাণ গুরিবাত্যে ন-এজং বরং মান্‌জ্যরে পাপত্তুন্ উদ্ধোর্ গুরিবাত্যে এচ্চ্যং।

⁴⁸ যে মরে খিয়্যে ন-গরে আর মঅ কধা ন-শুনে তাত্যে বিচের্ গুরিয়্যে আঘে। যে কধাগান্ মুই কোইয়োং সেই কধাগান্ শেজ্ দিনোত্ তারে দুষী বিলিনে প্রমাণ গুরিবো;

⁴⁹ কিয়া মুই দঅ নিজোত্তুন্ কিচ্চু ন-কং, মাত্তর্ যে মরে পাধেয়্যে সেই বাবা নিজেই মরে উগুম্ গোজ্যে কি কি কুয়ো পুরিবো।

⁵⁰ মুই কোই পারং তা উগুমানই উমর্‌অ জিংকানি। ইয়েনত্যে মুই যেদক্কানি কধা কং সিয়েনি মঅ বাবার্ উগুম্ মজিম্ কং।”