যোহন 1 - Chakma Bible

গোজেন কধাগান মানুচ্‌ ওইনে জোর্মেল

¹ পত্তমে কধাগান্ এলঅ, কধাগান্ গোজেন সমারে এলঅ আর কধাগান্ নিজেই গোজেন এলঅ।

² আর পত্তমে তে গোজেন সমারে এলঅ।

³ বেক্কানি সেই কধালোই সৃট্টি ওইয়্যে। আর যিয়েনি সৃট্টি ওইয়্যে সিয়েনি ভিদিরে কনঅ কিজু তারে বাদে সৃট্টি ন-অয়।

⁴ তা ভিদিরে জিংকানি এলঅ আর সেই জিংকানিগান্ এলঅ মান্‌জ্যর পহর্।

⁵ সে পহরান্ আন্ধারত্ জ্বলের্ মাত্তর্ আন্ধার্ পহ্‌‌রানরে জিদি ন-পারে।

⁶ গোজেনে যোহন নাঙে এক্কো মান্‌‌জ্যরে পাধেয়্যে।

⁷ তে পহ্‌র পৌইদ্যেনে সাক্ষী ইজেবে সাক্ষি দিবাত্যে এচ্চ্যে যেনে বেক্কুনে তা সাক্ষিগান্ শুনিনে বিশ্বেজ্ গুরি পারন্।

⁸ যোহনে নিজে সেই পহ্‌রান্ ন-এলঅ মাত্তর্ সে পহ্‌রান্ পৌইদ্যেনে সাক্ষি দিবাত্যে এচ্চ্যে।

⁹ তেয়ই আঝল্ পহ্‌র, যে পত্তি মান্‌জ্যরে পহ্‌র দান গরে, তে পিত্‌থিমীত্ এজের্।

¹⁰ তে পিত্‌থিমীত্ এলঅ আর পিত্‌থিমীগান্ তা মাধ্যমে সৃট্টি ওইয়্যে, তো জগদর্ মানুচ্চুনে তারে ন-চিনিলাক্।

¹¹ তে নিজো দেজত্ এলঅ, মাত্তর্ তা নিজো মানুচ্চুনে তারে মানি ন-ললাক্।

¹² মাত্তর্ যেদক্‌জনে তা উগুরে বিশ্বেজ্ গুরিনে তারে গুজি ললাক্ তারারে বেক্কুনোরে তে গোজেনর্ পুয়ো অবার্ অধিকারান্ দিলো।

¹³ এ মানুচ্চুনোর্ জর্ম লোত্তুন্ ন-অয়, কিয়্যের্ কামনা বা মরদ বাসনাত্তুন্অ ন-অয়, মাত্তর্ গোজেনত্তুনই ওইয়্যে।

¹⁴ সে কধাগানই মানুচ্‌ ওইনে জর্মেল আর আমা ভিদিরে বজত্তি গুরিলো। বাবা গোজেনর্ বানা এক্কো গুরি পুয়ো ইজেবে তার্ যে মহিমা সে মহিমাগান্ আমি দেক্ক্যেই। তে দোয়্যে আর সত্যলোই ভরা।

¹⁵ যোহনে তা পৌইদ্যেনে রঅ ছাড়িনে সাক্ষ্য দিইনে কলঅ, “তেয়ই সে মানুচ্চো যিবে পৌইদ্যেনে মুই কোইয়োং, যে মঅ পরেদি এজের্ তে মত্তুন্ বেশ্ দাঙর্, কিয়া তে মর্ বোউত্ আগেত্তুন্ ধুরি আঘে।”

¹⁶ আমি বেক্কুনে তার্ সেই পূরোণ অনাত্তুন্ দোইয়্যে উগুরে আরঅ দোয়্যে পেইয়্যেই।

¹⁷ মোশির্ মাধ্যমে রীদি-সুদোম দিয়্যে ওইয়্যে, মাত্তর্ যীশু খ্রীষ্টর্ মাধ্যমে দোয়্যে আর সত্য এচ্চ্যে।

¹⁸ গোজেনরে কেঅ কনদিন্অ ন-দেগন্। তা লগে থেইয়্যে সেই বানা এক্কো গুরি পুয়ো, যিবে নিজেই গোজেন, তেয়ই তারে ফগদাং গোজ্যে।

যোহনর্ সাক্ষি

¹⁹ যেক্কে যিহূদী নেতাগুনে যিরূশালেম শঅরত্তুন্ কয়েক্কো ধর্মগুরু আর লেবীয়রে যোহন ইধু পাধেল সেক্কে যোহনে তারা ইধু এ সাক্ষিগান্ দিলো। তারা পুযোর্ গুরিলাক্, “তুই কন্না?”

²⁰ জোবত্ যোহনে অস্বীগের্ ন-গুরিলো বরং স্বীগের্ গুরিনে কলঅ, “মুই মশীহ নয়।”

²¹ সেক্কে তারা যোহনরে পুযোর্ গুরিলাক, “সালে কন্না? তুই কি এলিয়?” তে কলঅ, “নয়, মুই এলিয় নয়।” তারা কলাক্, “সালে তুই কি সেই ভাববাদীবো?” জোবত্ তে কলঅ, “নয়।”

²² সেক্কে তারা তারে কলাক্, “সালে তুই কন্না? যিগুনে আমারে পাধেয়োন ফিরি যেইনে তারারে দঅ আমার্ জোব্ দিয়্যে পুরিবো। তঅ নিজো পৌইদ্যেনে তুই নিজে কি কচ্?”

²³ যোহনে কলঅ, “মুয়ই সেই রবুয়ো, যিবে পৌইদ্যেনে ভাববাদী যিশাইয় কোইয়্যে, ধূল্যেচর-চাগালাত্ একজন রঅ দাঙর্ গুরিনে কত্তে, তুমি প্রভুর্ পথতান্ উজু গরঅ।”

²⁴ যোহন ইধু যিগুনোরে পাধেই দিয়্যে ওইয়্যে তারা ফরীশী এলাক্। তারা যোহনরে পুযোর্ গুরিলাক্,

²⁵ “যুনি তুই মশীহয়ো নয়, এলিয়য়ো নয় বা সেই ভাববাদীয়ো নয়, সালে কিত্ত্যে তুই বাপ্তিষ্ম দুয়োর্?”

²⁶ যোহনে জোবত্ কলঅ, “মুই পানিত্ বাপ্তিষ্ম দুয়োঙর্ ঠিগ্, মাত্তর্ তমা ভিদিরে এমন্‌ একজন আঘে যিবেরে তুমি ন-চিনো।

²⁷ যিবে মঅ পরেদি এবার্ কধা এলঅ। মুই তার্ জদা ফিটেগানি খুলিবার্ যগাজ্যে নয়।”

²⁸ যর্দন গাঙর্ উকুলে বৈথনিয়া আদামত্ যিয়েনত্ যোহনে বাপ্তিষ্ম দের্ সিয়েনত্ ইয়েনি বেক্কানি ঘোট্যে।

²⁹ তার্ কেল্যে যোহনে যীশুরে তা নিজো ইন্দি এত্তে দেগিনে কলঅ, “উইয়োবু চঅ, গোজেনর্ ভেড়া ছবুয়ো, যিবে মান্‌জ্যর্ বেক্‌ পাপ্পানি দূর্ গরে।

³⁰ ইবে সেই মানুচ্চো যিবে পৌইদ্যেনে মুই কোইয়োং, মঅ পরেদি একজন এজের্ যিবে মত্তুন্ দাঙর্, কিয়া তে মর্ বোউত্ আগেত্তুন্ ধুরি আঘে।

³¹ মুই তারে ন-চিনিদুং, মাত্তর্ তে যেন ইস্রায়েলীয়গুনো ইধু ফগদাং পায় সেনত্তে মুই এইনে পানিত্ বাপ্তিষ্ম দোঙর্।”

³² সে পরেদি যোহনে এ সাক্ষিগান্ দিলো, “মুই পবিত্র আত্মারে কোদোর ধোক্ক্যেন্ ওইনে স্বর্গত্তুন্ লামি এইনে তা উগুরে থাদে দেক্ক্যং।

³³ মুই তারে ন-চিনিদুং, মাত্তর্ যে মরে পানিত্ বাপ্তিষ্ম দিবাত্তে পাধেয়্যে তেয়ই মরে কোই দিয়্যে, ‘যা উগুরে পবিত্র আত্মারে লামি এইনে থাদে দেগিবে, তেয়ই সে মানুচ্চো যিবে পবিত্র আত্মালোই বাপ্তিষ্ম দিবো।’

³⁴ মুই সিয়েন্ দেক্ক্যং আর সাক্ষ্য দোঙর্, ইবেই গোজেনর্ পুয়োবো।”

শিচ্চ্য অনা

³⁵ তার্ কেল্যে যোহন আর তার দ্বিজন্ শিচ্চ্য আরঅ সিয়েনত্ এলাক্।

³⁶ এমন সময়োত্ যীশুরে আঢি যাদে দেগিনে যোহনে কলঅ, “উইয়োবু চঅ, গোজেনর্ ভেড়া ছবুয়ো।”

³⁷ যোহনরে এ কধাগান্ কধে শুনিনে সে দ্বিজন্ শিচ্চ্য যীশুর্ পিজে পিজে যাহ্ ধুরিলাক্।

³⁸ যীশু পিজেদি ফিরিনে তারারে এত্তে দেগিনে কলঅ, “তুমি কি তগর্?” যোহন শিচ্চ্যগুনে পুযোর্ গুরিলাক্, “রব্বি (অত্তাৎ মাষ্টরবাবু), তুই কুধু থাচ্?”

³⁹ যীশু তারারে কলঅ, “এইনে চুগি।” সেক্কে তারা যেইনে যীশু যিয়েনত্ থেদঅ সে জাগায়ান্ চেলাক্ আর সেদিন্ন্যে তা সমারে থেলাক্। সেক্কে প্রায় বেল্যে মাদান্ চের্‌বো বাজের্।

⁴⁰ যোহন কধা শুনিনে যে দ্বিজন্ যীশুর্ পিজে পিজে যেইয়োন্ তারাত্তুন্ একজন নাঙ্ এলঅ আন্দ্রিয়। তে এলঅ শিমোন-পিতর ভেই।

⁴¹ আন্দ্রিয় পত্তমে তার্ ভেই শিমোনরে তোগেইনে নিগিলেল আর কলঅ, “আমি মশীহর (অত্তাৎ খ্রীষ্টর্) দেগা পেইয়্যেই।”

⁴² আন্দ্রিয় শিমোনরে যীশু ইধু আনিলো। যীশু শিমোন ইন্দি রিনি চেইনে কলঅ, “তুই যোহন পুয়ো শিমোন, মাত্তর্ তরে কৈফা বিলি ডাগা অবঅ।” এ নাঙানর্ অত্ত পিতর, অত্তাৎ পাত্তর্।

⁴³ তার্ কেল্যে যীশু ঠিগ্ গুরিলো তে গালীল রেজ্যত্ যেবঅ। সে সময়োত্ যীশু ফিলিপ সমারে দেগা ওইনে তারে কলঅ, “আয়, মঅ শিচ্চ্য অগি।”

⁴⁴ ফিলিপে এলঅ বৈৎসৈদা আদামর্ মানুচ্। আন্দ্রিয় আর পিতরেয়ো সেই একই আদাম মানুচ্‌।

⁴⁵ ফিলিপ নথনেলরে তোগেই পেইনে কলঅ, “মোশি যিবে কধা রীদি-সুদোম লিগি যেইয়্যে আর যিবে পৌইদ্যেনে ভাববাদীগুনেয়ো লেখ্যন্ আমি তার্ দেগা পেইয়্যেই। তে যোষেফর্ পুয়ো যীশু, নাসরত আদাম মানুচ্‌।”

⁴⁶ নথনেল ফিলিপরে কলঅ, “নাসরতত্তুন্ কি গম্ কনকিজু এই পারে?” ফিলিপ তারে কলঅ, “এইনে চাহ্।”

⁴⁷ যীশু নথনেলরে নিজো ইন্দি এত্তে দেগিনে তা পৌইদ্যেনে কলঅ, “উইয়ো চাহ্, এক্কো আঝল্ ইস্রায়েলীয়। তা মনত্ কনঅ ছলনা নেই।”

⁴⁸ নথনেলে যীশুরে পুযোর্ গুরিলো, “তুই কেধোক্ক্যেন্ গুরি মরে চিনিলে?” জোবত্ যীশু তারে কলঅ, “ফিলিপ তরে ডাগিবার্ আগে যেক্কে তুই সেই ডোমোর্ গাজ তলে এলে, সেক্কে মুই তরে দেক্ক্যং।”

⁴⁹ ইয়েন্দোই নথনেল যীশুরে কলঅ, “মাষ্টরবাবু, তুয়ই গোজেনর্ পুয়ো, তুয়ই ইস্রায়েলীয়গুনোর্ রাজা।”

⁵⁰ যীশু তারে কলঅ, “তরে সেই ডোমোর্ গাজ তলে দেক্ক্যং, এ কধাগান্ কোইয়োং বিলি বিশ্বেজ্ গুরিলে? ইয়েনত্তুন্ বেশ্ আরঅ দাঙর্ কাম্ তুই দেগিবে।”

⁵¹ পরেদি যীশু কলঅ, “মুই তমারে ঘেচ্চ্যেক্‌গুরি কঙর্, তুমি স্বর্গগান্ খুলো দেগিবা, আর দেগিবা গোজেনর্ দূত্তুনে মান্‌জ্য পুয়োবোর্ কায় কুরেত্তুন্ উদোদন্ আর তা কায়কুরে লামদন্।”