যিরমিয় 9 - Chakma Bible

¹ হায়, মঅ মাঢাবো যুনি পানির ঝুর্‌ঝুরি অদঅ, আর মঅ চোগ্‌কো অদঅ পানির পয়নালা! সালে মঅ জাদর্ যে মানুচ্চুনোরে মারে ফেলা ওইয়্যে তারাত্তে মুই দিনে রেদে কানিদুং।‌‌‌

² হায়, ধূল্যেচর-চাগালাত্ যেইয়্যেগুনোর থেবার জাগান ধোক্ক্যেন মর্ যুনি এক্কান জাগা থেদঅ! সালে মঅ মানুচ্চুনোরে ছাড়িনে মুই সিয়েনত্ যেই পারিদুং, কিত্তে তারা বেক্কুনে সিনেলী আর বেঈমানর দল।

³ লগেপ্রভু কোইয়্যেদে, “তারা মিজে সেল্ মারিবাত্তে তারার ধনু ধোক্ক্যেন জিলানরে যুক্কোল্ রাগেয়োন; দেজত্ সত্য উগুরে মিজেগান জিদি যেইয়্যে। তারা পাপ উগুরে পাপ গরা ধোজ্যন্। তারা মরে তারার গোজেন বিলিনে স্বিগের্ ন-গরন।

⁴ তারা পত্তিজনে সমাজ্যেগুনোত্তুন্ উজিয়ার ওক্ আর নিজো ভেইয়ুনোরে বিশ্বেজ্ ন-গোরোক্, কিত্তে পত্তি ভেইয়্যে ঠগান্ আর পত্তি সমাজ্যেই ইংসে গরন।

⁵ সমাজ্যে সমাজ্যেরে ঠগায় আর কনজনে সত্য কধা ন-কন। তারা তারার জিলানরে মিজে কধা কবাত্তে শিগেয়োন; পাপ গুরি গুরি তারা নিজোরে বল্‌পোজ্যে গোজ্যন। ‌‌‌‌

⁶ তুই ছলনার সংমোধ্যে বজত্তি গরর্। তঅ মানুচ্চুনে ছল্ ধোজ্জ্যন্; তারা মইধু নিজোরে গোজেই ন-দুয়োন।”

⁷ সেনত্তে বেগত্তুন খেমতাবলা লগেপ্রভু কোইয়্যেদে, “চঅ, মুই তারার তুদোগান নিগিলেনে পোরোক্কে গুরিম, কিত্তে মঅ মানুচ্চুনোরে নিইনে মুই আর কি গুরি পারিম?

⁸ তারার জিলানি দর্‌গরেপারা সেল ধোক্ক্যেন; সিয়েনে ছলনার কধা কয়। পত্তিজনে মুয়োদি পাড়াল্যেগুনো লগে মিদে কধা কন মাত্তর্ মন ভিদিরে সিয়েনর বিরুদ্ধে ফাল্ পাদন। ‌‌‌‌‍

⁹ মুই কি ইয়েনত্তে তারারে সাজা ন-দিম? এবাবোত্যে জাদ উগুরে কি মুই নিজেই হেনা ন-সুজিম?”

¹⁰ মুড়োমুড়িগুনোত্তে মুই কানিম্ আর আবিলেচ্ গুরিম আর আবিলচ্ গুরিম ধূল্যেচর-চাগালার য়েমান চোড়েবার জাগানিত্তে। সিয়েনি ভস্ত ওই যেইয়্যে, সিয়েনত্ কনজনে যানা-এযানা ন-গরন্। য়েমান পালর ডাগনি আর শুনো ন-যায়। আগাজ পেগ্‌কুনে ধেই যেইয়োন আর এ্যামানুনে যেয়োন্দোই।‍

¹¹ লগেপ্রভু কোইয়্যেদে, “মুই যিরূশালেমানরে এক্কান ভস্তর কুড়্ আর শিয়েলর থেবার জাগা বানেম। মুই যিহূদার শঅরানিরে এমন ভস্তর জাগা বানেম, সিয়েনত্ আর কনজনে বজত্তি গুরি ন-পারিবাক্।”

¹² কন্ মানুচ্চো এমন জ্ঞানী যে, এ কধাগান বুঝি পারে? কন্না লগপ্রভুর ইত্তুন শুনিনে সিয়েন অন্যগুনোরে জানেই পারে? কিত্তে দেজ্‌চান ভস্ত ওইনে ধূল্যেচর ধোক্ক্যেন এমন পুজ্যে ভূইয়ো ধোক্ক্যেন রোইয়্যে, কনজনে সিয়েন পার ওই ন-যান?

¹³ লগেপ্রভু কোইয়্যেদে, “সিয়েনর কারনান্ অলঅ, মুই যে সুদোমানি তারারে দুয়োং সিয়েনি তারা ছাড়ি যেইয়োন; তারা মর্ বাধ্য ন-অন বা মঅ কধানিয়ো মানি ন-চলন্।

¹⁴ সিয়েনর বদলে তারা তারার মনর্ একঘেয়েমি অনুসারে চলদন; তারার বাপ্‌পুনোর শিক্ষ্যে মজিম তারা বাল দেবেদার পিজেদি চলদন্।

¹⁵ সেনত্তে মুই ইস্রায়েলর গোজেন বেগত্তুন খেমতাবলা লগেপ্রভু এ কধাগান কঙর্, ‘চঅ, মুই এ মানুচ্চুনোরে তিদে হানা আর বিষবলা পানি হেবাত্তে বাধ্য গুরিম।

¹⁶ মুই তারারে এমন বেক্ জাদ ভিদিরে ছিদি দিম্ যিগুনোরে তারা হবর্ ন-পান বা তারার পুরোণি মানুচ্চুনেয়ো হবর্ ন-পান। তারার ভস্ত ন-গরানা সং মুই যুদ্ধো পাধেইনে তারা পিজেদি লোড়েম্।’ ”

¹⁷ বেগত্তুন খেমতাবলা লগেপ্রভু কোইয়্যেদে, “তুমি ইক্কিনে চিদে গুরি চঅ। আবিলেচ্ গুরিয়্যে মিলেগুনোরে ডাগি আনঅ; যিগুনে এ কামত্ কাবিল্ তারারে ডাগিবাত্তে মানুচ্ পাদঅ।”

¹⁸ তারা যাদিমাদি এইনে আমাত্তে আবিলেচ্ গোরোদোক্ যেধক্কন সং আমা চোগেদি পানি ভাসি ন-যায় আর চোগো পাদাত্তুন পানি বেই ন-যায়।

¹⁹ সিয়োনত্তুন এ আবিলেচর্ কধাগান শুনো যার্, “আমি কেধোক্ক্যেন গুরি ভস্ত ওই গেলং! কেধোক্ক্যেন গুরি এত্তমান লাজত্ পড়িলোং! আমা ঘরানি ভস্ত ওই যেইয়্যে, সেনত্তে আমাত্তুন দেজ্ ছাড়িনে যাহ্ পুরিবো।”

²⁰ ইক্কিনে ও মিলেগুন, লগেপ্রভুর কধাগান শুনো; তা মুয়ো কধাগান শুনিবাত্তে তুমি কান্ পাদি থাগঅ। কিবাবোত্যেগুরি আবিলেচ্ গরা পরে সিয়েন যার্ যার্ ঝিগুনোরে শিক্ষ্যে দুয়ো, আর আবিলেচর্ গান গেবাত্তে অন্যগুনোরে শিক্ষ্যে দুয়ো।

²¹ মরণানে আমা জানালাদি উদিনে আমা তাম্বুলানি ভিদিরে চোম্বেগি; সিয়েনে পধে পধে ঝি-পুয়োগুনোরে শেজ্ গুরি দিয়্যে আর শঅর চক্কর্‌‌বোত্তুন শেজ্ গুরি দিয়্যে গাবুজ্যেগুনোরে।

²² লগেপ্রভু মরে এ কধাগান কবাত্তে কলদে, “মানুচ্চুনোর মরা কিয়্যেগানি গবর ধোক্ক্যেন খুলো মাদত্ পড়ি থেবঅ; যিগুনে খেত্-খেত্তি কাবন্ তারা পিজেদি কাবিনে ফেলে রাগেয়্যে শোজ্য ধোক্ক্যেন সিগুন পড়ি থেবাক্, কনজনে তারারে ন-কুড়েবাক্।”

²³ লগেপ্রভু কোইয়্যেদে, “জ্ঞানী মানুচ্চুনে তারার জ্ঞানর বাড়্ ন-গোরোক্, বা খেমতাবলাগুনে তারার তারার বলর্ বাড়্‌বো ন-গোরোক্ বা তাগোয়্যেগুনে তারার ধনর বাড়্‌বো ন-গোরোক্,

²⁴ মাত্তর্ যে বাড়্‌বো গুরিবাত্তে চায় তে ইয়েনিলোই বাড়্‌বো গোরোক্, তে মরে বুঝে আর হবর্ পায়, অত্তাৎ তে হবর্ পাইদে, মুয়ই লগেপ্রভু; মর্ কোচ্‌পানাগান বোউত্ আর পিত্‌থিমীত মর্ কামানি ন্যায়ে আর সততালোই ভরা। ইয়েনি পৌইদ্যেনে মুই গম্ পাং। মুই লগেপ্রভু এ কধাগান কঙর্।”‌‍

^25-26 লগেপ্রভু কোইয়্যেদে, “এমন দিন এজের্ যেক্কে মুই মিসর, যিহূদা, ইদোম, অম্মোন, মোয়াব আর ধূল্যেচর-চাগালাত্ বজত্তি গুরিয়্যে যিগুনে মাঢাবোর দ্বি ডাগেদি চুল কাবন্ তারারে বেক্কুনোরে সাজা দিম। তারারে বানা কিয়্যেদি চুনুগুলোবোর মাঢাবো চামান্ কাবা ওইয়্যে, মনেদি চুনুগুলোবোর্ মাঢাবোর্ চামান্ কাবা ন-অয়; আর ইস্রায়েলীয়গুনোরেয়ো মনেদি চুনুগুলোগুনোর্ মাঢাগুনোর্ চামান্ কাবা ন-অয়।”