যিরমিয় 6 - Chakma Bible

যিরূশালেমান আক্রমণ

¹ লগেপ্রভু কোইয়্যেদে, “ও বিন্যামীনর মানুচ্চুন, রোক্ষ্যে পেবাত্তে ধেই যঅ। যিরূশালেমত্তুন্ ধেই যঅ। তকোয় শঅরত্ শিঙে বাজঅ। বৈৎ-হক্কেরমত্ ইজিরে দুয়ো, কিত্তে উত্তোরেত্তুন্ দজা আর দর্‌‌‌‌গরেপারা ভস্তগানে ইজিরে দের্।

² দোল্ আর আরামে থেইয়্যে সিয়োন-ঝিবোরে মুই ভস্ত গুরিম।

³ গরগ্‌কুনে যেবাবোত্যেগুরি ভেড়া পাল্লোই এজন্ সেবাবোত্যেগুরি রাজাগুনে তারার সৈন্যদলুন্দোই তা বিরুদ্ধে এবাক্; সিয়েনর চেরোকিত্তে তারা তাম্বুল টাঙেবাক্ আর যে যার্ জাগানত্ থেবঅ।‌‌‌

⁴ তারা কবাক্কে, ‘তার বিরুদ্ধে যুদ্ধোর যুক্কোল্ অ। উদো, আঢ, আমি দিবুজ্যে আক্রমণ গুরিই। মাত্তর্ হায়, দিনোর পহ্‌রান কুমি যার্, আর সাজোন্যের ছাবাগান লাম্বা অর্।

⁵ সেনত্তে উদো, আঢ, আমি রেদোত্ আক্রমণ গুরিই আর তার ঘরানি ভস্ত গুরি দিই।’ ”

⁶ বেগত্তুন খেমতাবলা লগেপ্রভু তারারে এ কধাগান কোইয়্যেদে, “তুমি গাজ্‌চুন কাবিনে সিয়েনিলোই যিরূশালেমর বিরুদ্ধে তার দেবালান সমারে ভিদেকুড়্ বানঅ। এ শঅরানরে সাজা দিয়্যে পুরিবো; ইয়েন অত্যেচারে ভুরি যেইয়্যে।‌‌‌‌

⁷ কূয়ো পানি যেবাবোত্যেগুরি নিত্য নাল্ আঢে সেবাবোত্যেগুরি তে তার পাজিগানি নিত্য চালু রাগায়। সিয়েন ভিদিরে অত্যেচার আর ভস্ত অনার্ রঅ শুনো যায়; তার অসুগ কধা আর আঘাত্‌‌‌‌‌‌তানি নিত্য মঅ মুজুঙোত্ আঘে।‌‌‌

⁸ ও যিরূশালেম, উজিয়ার কধা শুন, সিয়েন ন-অলে মুই তমাত্তুন্ ফিরি যেইনে তঅ দেজ্‌‌‌‌‌চান ভস্ত আর মানুচ্ নেইয়্যে গুরিম।”

⁹ বেগত্তুন্ খেমতাবলা লগেপ্রভু কোইয়্যেদে, “আংগুর খেদত্তুন্ যেবাবোত্যেগুরি গমেডালে আংগুর ঝাড়ি ফেলা অয় সেবাবোত্যেগুরি শত্রুগুনে দেজত্তুন ইস্রায়েলীয়গুনোরে ঝাড়ি ফেলেবাক্। যে মানুচ্চো আংগুর তুলে তে যেবাবোত্যেগুরি আরঅ ডেলাত্ আঢ্ দে তারায়ো বাগি মানুচ্চুনো উগুরে সেবাবোত্যে গুরিবো।”

¹⁰ মুই কা লগে কধা কোম্ আর কারে উজিয়ার গুরিম যেনে তারা মঅ কধাগান শুনোন্? তারার কানানি ঢিবে দুয়োন সেনত্তে তারা ন-শুনোন্। লগেপ্রভুর কধানি তারার ঈচ্ গুরিবার বেপার ওইয়্যে; তারা সিয়েনত্ কনঅ গম্ ন-পান।

¹¹ মাত্তর্ মুই লগেপ্রভুর রাগে গুল্ ওইয়োং; মুই আর সিয়েন মঅ ইধু ধুরি রাগেই ন-পারঙর্। লগেপ্রভু জোবত্ কোইয়্যেদে, তুই সিয়েন পধত্ ঝি-পুয়োগুনো উগুরে আর এক সমারে এগত্তর্ ওইয়্যে গাবুজ্যেগুনো উগুরে ঢালি দে। নেগে-মোগে সিয়েন ভিদিরে ধরা পড়িবাক্, আর বুড়োগুনে আর অমকদ লুঙুর্ বুড়োগুনে রেহাই ন-পেবাক্।

¹² যিগুনে দেজত্ বজত্তি গরন তারা বিরুদ্ধে যেক্কে মুই সাজা দিবার আঢ্‌তান বাবেই দিম্ সেক্কে অন্যগুনো আঢত্ তারার ঘরানি, ভূইয়ানি আর মোগ্‌‍‍কুনোরে তুলি দিয়্যে অবঅ।

¹³ “চিগোনত্তুন্ ধুরি দাঙর্ বেক্কুনে লাভত্তে লুভ্ গরন; এন কি, ভাববাদী আর ধর্মগুরুগুন বেক্কুনে ছলনা গরন।

¹⁴ তারা মঅ মানুচ্চুনোর ঘা গানি এমন্ গুরি বানি দুয়োন যেন সিয়েন এমন কিজু নয়। তারা কন্দে, ‘শান্তি, শান্তি,’ আজলে শান্তি নেই।

¹⁵ তারা কি তারার সেই জঘন্য কামানিত্তে লাজ্ ন-পান? না, তারার কনঅ লাজ্ নেই; তারা লাজে রাঙা ওই ন-জানন্। সেনত্তে তারা সিগুনো ভিদিরে পড়িবাক্ যিগুনে যিগুনে সাজা পেবাক্। মুই যেক্কে তারারে সাজা দিম সেক্কে তারারে মাঢা লোঙেই দিয়্যে অবঅ। মুই লগেপ্রভু এ কধাগান কঙর্।”

¹⁶ লগেপ্রভু তা মানুচ্চুনোরে কত্তে, “তুমি চেরান্ পধ মুয়োত্ থিয়্যেইনে রিনি চঅ পুরোণ পধ কধা পুযোর্ গরঅ; গম্ পথ্‌‌তান্ কুদু সিয়েন পুযোর্ গুরিনে সেই পধেদি আঢঅ। সেক্কে তুমি নিজো নিজো মনত্ জিরেন পেবা। মাত্তর্ তুমি কোইয়োদে, ‘আমি সে পধেদি ন-চলিবোং।’

¹⁷ মুই তমা উগুরে চুগিদার নেযেইনে কোইয়োং, ‘তুমি শিঙের রঅ শুনো,’ মাত্তর্ তুমি কোইয়োদে, ‘আমি ন-শুনিবোং।’

¹⁸ সেনত্তে ও অন্য জাদ্‌তুন, শুনো; মঅ মানুচ্চুনোর যিয়েন অবঅ সিয়েন রিনি চঅ।‍‍‍

¹⁹ ও পিত্‌‍‍‍থিমীগান শুন, মুই মানুচ্চুনো উগুরে দজা ডাগি আনিম; সিয়েন অবদে তারার পরিকল্পনার ফল, কিত্তে তারা মঅ কধাগান ন-শুনোন্ আর মর্ সুদোমানি এলাফেলা গোজ্যন্। ‍

²⁰ ও মর্ মানুচ্চুন, শিবা দেজত্তুন্ যে আগর্‌বাট্টি এজে বা দূর্ দেজত্তুন্ যে মিদে বচ এজে সিয়েনত্ মর্ কি দরকার? তমার পুজ্যে-উৎসর্বর অনুষ্ঠানানে মরে হুজি ন-গরে।”

²¹ সেনত্তে লগেপ্রভু কোইয়্যেদে, “এ মানুচ্চুনো মুজুঙোত্ মুই নানান্ বাবোত্যে মানা গুরিম। বাবে-পুয়োই এক সমারে সিয়েনত্ উজোত্ হেবাক্; পাড়াল্যেগুনে আর সমাজ্যেগুনে ভস্ত ওই যেবাক্।”

²² লগেপ্রভু এ কধাগান কোইয়্যেদে, “চঅ, উত্তোরে দেজত্তুন একদল সৈন্য এত্তন্; পিত্‌থিমীর শেজ্ দুযিত্তুন এক্কো দাঙর্ জাদ রাগে গং দি এজের্।

²³ তারা ইধু ধনু আর সেল্ আগন; তারা চিৎনপুজ্যে আর কনঅ মেয়্যে ন দেগান্। ঘোড়া পিদিত্ উদি এবার অক্তত্ তারা রঅগুন সাগর গুজুরি উদেধে ধোক্ক্যেন; ও সিয়োন-ঝি, তরে আক্রমন গুরিবাত্তে তারা যোদ্ধা ধোক্ক্যেন যুক্কোল্ ওই এত্তন্।”

²⁴ আমি তারা পৌইদ্যেনে হবর্ পেইয়্যেই আর সেনত্তে আমা আঢ্‌‍‍‍‍‍তানি যেন অবশ ওইনে লুঙি পড়ের্। পিড়েগানে আমারে ঘিরি ধোজ্যে; পুয়ো পুদোইদে মিলে ধোক্ক্যেন পিড়েগানে আমারে ধোজ্যে।

²⁵ তুমি মাদত্ ন-যেয়ো বা পদথ্ ন-আত্য, কিত্তে শত্রুগুনো আঢত্ তলোয়ার আঘে আর চেরোকিত্তেদি রোইয়্যেদে অমকদ দর্।

²⁶ ও মঅ মানুচ্চুন, বস্তা পাদা পিনো আর ছেইয়ো উগুরে গজ্জ। এক্কোগুরি পুয়ো মুরিলে যেবাবোত্যেগুরি মান্‌জ্যে ইদোত্ তুলি তুলি কানন্ সেবাবোত্যেগুরি অমকদ আবিলেচ্ গুরিনে তুমি ইদোত্ তুলো, কিত্তে ভস্ত গুরিয়্যেবো আদিক্ক্যেন্‌গুরি আমা উগুরে এইনে লুমিবো।

²⁷ লগেপ্রভু কোইয়্যেদে, “মুই তরে মঅ মানুচ্চুনোর যগাচেইয়্যে বানেয়োং যেনে তুই তারা ইন্দি খিয়েল্ রাগেইনে তারা পথ্‌তানি পোরোক্কে গুরি পারচ্।‌‌

²⁸ তারা বেক্কুনে অমকদ উল্লোমী; তারা ইংসে গুরি বেড়ান। তারা ব্রোঞ্জ আর লুয়ো ধোক্ক্যেন; তারা বেক্কুনে ভান্ন্যেই ওই যেইয়োন।

²⁹ আগুন্দোই সিসে পুড়ি ফেলেবাত্তে কামাড় ফগনালোই যদবদে বোইয়্যের্ দের্; মাত্তর্ অনত্তক্ আজলান্ নিগিলেবার চেট্ট্যা গরা অর্, কিত্তে পাজিগুনোরে নিগিলে ন-যার্।‌‌

³⁰ তারারে কুয়ো অয় এলাফেলা গোজ্যে রূবো, কিত্তে মুই লগেপ্রভু তারারে ফেলেই দুয়োং।”