যিরমিয় 52 - Chakma Bible

যিরূশালেমর পতন

¹ এগোজ্ বজর বয়জত্ সিদিকিয় রাজা অলঅ। তে যিরূশালেমত্ এগার বজর্ রাজাগিরি গোজ্যে। তা মাবো নাঙান্ অলদে হমূটল; তে এলদে লিব্‌না শঅরর্ যিরমিয়র ঝি।

² যিহোয়াকীমো ধোক্ক্যেন সিদিকিয় লগেপ্রভুর চোগেদি যিয়েন ভান্ন্যেই সিয়েনই গুরিদো।

³ যিরূশালেম আর যিহূদার মানুচ্চুনোত্যে লগেপ্রভু রাগে ফুলি উঠ্যে আর যেরেদি তে তা মুজুঙোত্তুন্ তারারে দূর্ গুরি দিয়্যে। পরেদি সিদিকিয় বাবিল রাজার বিরুদ্ধে উল্লোমি গুরিলো।

⁴ সেনত্তে তার রাজাগিরির্ নয় বজরর্ দশ মাজত্ দশ দিনোত্ বাবিল রাজা নবূখদ্‌নিৎসরে তার বেক্ সৈন্যগুন নিইনে যিরূশালেম বিরুদ্ধে যুদ্ধোযাত্রা গুরিলো। তারা শঅরর্ বারেদি তাম্বুল্ ফেলেলাক্ আর শঅরর্ চেরোকিত্তে দেবাল্ বানেলাক্।

⁵ রাজা সিদিকিয়র রাজাগিরির্ এগার বজর্ সং শঅরান ঘিরি রাগা অলঅ।

⁶ চের্ মাজত্ নয় দিনোত্ শঅরত্ ভাদরাদর্ অবস্থা এদক্ বেশ্ অলঅ যে, মানুচ্চুনোর্ হেবাত্তে কিচ্চু ন-এলঅ।

⁷ পরেদি শঅর দেবালর্ এক্কান জাগা ভাঙি গেলঅ। যুনিয়ো বাবিলীয়গুনে সেক্কেয়ো শঅরান্ ঘিজ্যে এলাক্ তো রেদোত্ যিহূদার বেক্ সৈন্যগুন রাজার বাগান ইধু দ্বিদেবাল গেদোদি ধেই যেইনে অরাবার ইন্দি গেলাক্।

⁸ রাজার বেক্ সৈন্যগুন তাত্তুন্ যুদো ওই যেইনে ছিদি পড়িলাক্ আর সে সময়োত্ বাবিলীয় সৈন্যদলুন্‌অ রাজা সিদিকিয়র পিজেদি লোড়েইনে যিরীহোর সংজাগানত্ তারে ধুরি ফেলেলাক্।

⁹ তারা সিদিকিয়রে বন্দী গুরিনে হমাৎ দেজর্ রিব্‌লাত বাবিল রাজার ইধু নেযেলাক্ আর সিদু তারে সাজার্ উগুম দিয়্যে অলঅ।

¹⁰ বাবিল রাজা রিব্‌লাদত্ সিদিকিয়র চোগো মুজুঙোত্ তা পুয়োগুনোরে মারে ফেলেল আর যিহূদার বেক্ রাজার চাগরুনোরেয়ো মারে ফেলেল।

¹¹ সে পরেদি তে সিদিকিয়র্ চোগ্ দ্বিবে তুলি ফেলেল, তারে পিদোল শিগোল্লোই বানিনে বাবিলোত্ নেযেল আর তে ন-মরানা সং তারে জেলখানাত্ রাগেল।

¹² বাবিল রাজা নবূখদ্‌নিৎসরর রাজাগিরির্ ঊনেশ্ বজরর্ পাচ্ মাজর্ দশ দিনোত্ রাজা রোক্ষিদলর্ সেনাপতি ইজেবে যিবে রাজারে সেবা গুরিদো সেই নবূষরদনে যিরূশালেমত্ এলঅ।

¹³ তে লগেপ্রভুর ঘরত্, রাজঘরত্ আর যিরূশালেমর বেক্ ঘরানিত্ আগুন ধোরেই দিলো। বেক্ আজল্ আজল্ ঘরানি তে পুড়ি ফেলেল।

¹⁴ রাজার রোক্ষিদলর্ সেনাপতিবোর্ তলেদি বাবিলীয় বেক্ সৈন্যদলুনে যিরূশালেমর দেবালান ভাঙি ফেলেলাক্।

¹⁵ যিদুক্কুন নাঢা মানুচ্ শঅরত্ পড়ি এলাক্ তারাত্তুন্ কয়েক জনরে আর বাদবাগি কালিগরুনোরে আর যিগুনে বাবিল রাজার তপ্পে যেইয়োন রোক্ষিদলর্ সেনাপতি নবূষরদনে তারারে বন্দী গুরি নেযেল।

¹⁶ মাত্তর্ আংগুর খেত্‌‌তান দেগাশুনো আর ভূইয়ানি চাষ গুরিবাত্তে কিজু নাঢা মান্‌‌জ্যরে তে দেজত্ থোই গেলঅ।

¹⁷ বাবিলীয়গুনে লগেপ্রভুর ঘরর্ পিদোলর্ দ্বিবে খুদো, গাবালা বোজেবার পিদোলর্ আসনানি আর পিদোলর্ দাঙর্ পিলেবো ভাঙিনে কট্টা কট্টা গুরিনে বাবিলোত নেযেলাক্।

¹⁸ ইয়েনি বাদেয়ো তারা বেক্ পিলেগুন, বেল্‌‌‌চা, ফিটে কাজেবার্ চিম্‌‌‌টি, চেরাগ্, হাতা আর উবোসনা-ঘরর্ সেবা-কামত্তে অন্য বেক্ পিদোল জিনিস্‌‌‌‌চানি নেযেলাক্।

¹⁹ রাজার রোক্ষিদলর্ সেনাপতি সোনা বা রূবোর্ বানেয়্যে যিদুক্কুন গলচ্, আগুন রাগেবার পিলে, গলস্, বেল্‌সা, পানীয়-উৎসর্ব অনুষ্ঠানর পিলে আর অন্য যিদুক্কুন পিলে এলাক্ সিগুন্‌অ নেযেলাক্।

²⁰ রাজা শলোমনে লগেপ্রভুর ঘরত্তে যে দ্বিবে খুদো, দাঙর্ পিলে তা তলে বারবো পিদোল গোরু আর যেদক্কানি আসন বানেয়্যে সিয়েনি বেক্ পিদোলানি মাবানা সম্ভব ন-এলঅ।

²¹ পত্তি খুদো এলাক্ আদার আঢ অজল্ আর পাদাজ্যে এলাক্ বার আঢ্; পত্তি খুদোর্ চের্ আঙুল্ পিদোল বেড়েয়্যে এলঅ আর ভিদিরেগান্ ফাগ্ এলঅ।

²² এক্কো খুদোর্ মাঢা পাচ আঢ্ অজল্ এলঅ আর সেই মাঢাবোর চেরোকিত্যে পিদলর্ শিগোল আর পিদোলর্ ডালুম্বোই সাজেয়্যে এলঅ। অন্য খুদোবোয়ো এক্কুই।

²³ পিদোলর্ শিগোলানর্ চেরোকিত্যে একশত্তো ডালোম এলাক্, মাত্তর্ মুজুুঙেত্তুন্ বানা ছিয়েনব্বইবো ডালোম দেগা যেদঅ।

²⁴ যিহূদীগুনোর আজল্ ধর্মগুরুবো সরায়, দ্বিলম্বর্ ধর্মগুরু সফনিয় আর তিনজন চুগিদাররে রক্ষীদলর্ সেনাপতিবো বন্দী গুরিনে নেযেল।

²⁵ যিগুনে সেক্কেয়ো শঅরত্ এলাক্ তারা ভিদিরেত্তুন্ তে যোদ্ধাগুনে উগুরে নেযেয়্যে এক্কো কামগুরিয়্যে আর রাজার সাতজন সল্লাদিয়্যেরে ধুরিলো। ইগুনবাদে সেনাপতির লিগিয়্যেবো, যিবে সৈন্যদলত্ মানুচ্ ভত্তি গোরেদ তারে আর শঅর ভিদিরে পেইয়্যে আরঅ ষায়েটজন মান্‌‌জ্যরেয়ো ধুরিলো।

²⁶ সেনাপতি নবূষরদনে তারারে বেক্কুনোরে বন্দী গুরিনে রিব্‌লাত বাবিল রাজার ইদু নেযেল।

²⁷ রাজা হমাৎ দেজর্ রিব্‌লাত ইগুন বেক্কুনোরে মারে ফেলেল। এবাবোত্যেগুরি যিহূদার মানুচ্চুনোরে বন্দী গুরিনে নিজোর্ দেজত্তুন্ দূরোত্ নেযা অলঅ।

²⁸ নবূখদ্‌নিৎসরে যে মানুচ্চুনোরে বন্দী গুরি নেযেয়্যে তারা জনেদি অলাক্, সাত বজরে তিন আজার্ তেইশজন যিহূদী,

²⁹ নবূখদ্‌নিৎসরর রাজাগিরির্ আদার বজরত্ যিরূশালেমত্তুন আস্‌‌তোশ বত্রিশজন যিহূদী;

³⁰ আর তার রাজাগিরির তেইশ বজরত্ রাজার্ চুগিদারুনোর সেনাপতি নবূষরদনে সাতশ পাজ্‌‌‌চোল্লিশজন যিহূদীরে নেযেল। ইগুনে জনেদি এলাক্ বেক্কুনে চের্‌‌‌‌ আজার ছয়শঅ।

যিহোয়াখীনে ছড়ান্ পেলঅ

³¹ যিহূদার রাজা যিহোয়াখীনর বন্দী অনার্ সাত্রিশ বজরত্ ইবিল-মরোদকে বাবিলোর্ রাজা অলঅ। তে সে বজরর্ বার মাজর্ পোজোস্ দিনোত্ যিহোয়াখীনরে জেলখানাত্তুন্ ইরি দিলো।

³² তে যিহোয়াখীনো সমারে গমেডালে কধা কলঅ আর বাবিলোত্ তা সমারে আর তার যিদুক্কুন রাজা এলাক্ তারাত্তুন্‌‌অ বেশ্ তারে আরঅ সর্মানর আসনান্ দিলো।

³³ যিহোয়াখীনে জেলখানার কাবড়্-চুগোরানি খুলি ফেলেল আর জিংকানির্ বাদবাগি দিনুন্ দোলেডালে রাজা সমারে হানা-দানা গুরিনে কাদেই দিলো।

³⁴ তে যেদক্ দিন্ বাঁজি এলঅ সেদক্ দিন্ রাজা সুদোম মজিম্ তারে পত্তিদিনোত্তে এক্কো ভাতা দিদো।