যিরমিয় 51 - Chakma Bible1 লগেপ্রভু কোইয়্যেদে, চাহ্, লেব্-কামাই, অত্তাৎ বাবিল আর তা মানুচ্চুনো বিরুদ্ধে ভস্তগুরিয়্যে বোইয়্যেরানরে মুই আনঙর্। 2 বাবিলরে ঝাড়িবাত্তে আর তা দেজ্চানরে ভস্ত গুরিবাত্তে মুই তাইধু বিদেশীগুনোরে পাদেম; তা দযার্ দিনোত্ তারা বেক্কানিত্তুন্ তা বিরুদ্ধে যেবাক্। 3 বাবিল ধনুবলাবো তার্ ধনুগান ন-টানোক্ বা তে তার্ সেল্লো ন-পোরোক্। তা গাবুজ্যেগুনোরে ছাড়ি ন-দুয়ো; তার সৈন্যদলুনোরে পুরোপুরিগুরি ভস্ত গুরি দুয়ো। 4 তারা বাবিল পধে পধে অমকদ আঘাত্ পেইনে মুরিনে পড়ি থেবাক্। 5 ইস্রায়েল আর যিহূদারে তারার গোজেন বেগত্তুন্ খেমতাবলা লগেপ্রভু ছাড়ি ন-যায়, যুনিয়ো ইস্রায়েলর সেই সুদ্ধো-সাংগ মানুচ্চোর্ মুজুঙোত্ তারার্ দেজ্চান দুষে ভরা ওইয়্যে। 6 তুমি বাবিলত্তুন্ ধেই যঅ। তুমি পত্তিজনে নিজো নিজো জিংকানিগানি রোক্ষ্যে গরঅ। তা পাপত্তে তুমি ভস্ত ওই ন-যেয়ো। লগেপ্রভুর হেনা সুজিবার্ অক্ত ওইয়্যে; তার যিয়েন পেবার্ তারে তে সিয়েন দিবো। 7 বাবিলান লগেপ্রভুর আঢত্ এক্কান সোনার গলস ধোক্ক্যেন এলঅ; সিয়েনে গোদা পিত্থিমীগানরে মাত্তল্ গোজ্যে। জাদ্তুনে তা আংগুর-রস হেইয়োন, সেনত্তে ইক্কিনে তারা পাগল ওই যেইয়োন। 8 বাবিল অদাদৎ পড়ি যেইনে ভাঙি যেইয়্যে। তাত্তে আবিলেচ্ গরঅ। তার্ পীড়েগানত্তে মলম আনঅ; অয়ত তে গম্ অবঅ। 9 মান্জ্যে কন্, “আমি বাবিলরে গম্ গুরিবাত্তে চেরেস্টা গুরির্, মাত্তর্ তে গম্ ন-অয়। আঢঅ, আমি তারে ছাড়িনে যে যার্ দেজত্ যেই, কিত্তে তার্ সাজাগান আগাজত্ সং লুম্বেগোই, সিয়েন মেঘ সং অজলত্ উঠ্যেগোই।” 10 আমি যে লগেপ্রভুর নিজোর্ মানুচ্ তে সিয়েন দেগেই দিয়্যে, আমা গোজেন লগেপ্রভু যিয়েনি গোজ্যে এজঅ, আমি সিয়েনি সিয়োনত্ কোই। 11 তুমি সেলুন্ ধারঅ, ঢাল নেযঅ। লগেপ্রভু মাদীয় রাজাগুনোরে রাগ্ তুলি দিয়্যে, কিত্তে তা উদ্দেশ্যগান অলঅ বাবিলরে ভস্ত গরানা। লগেপ্রভু হামাক্কায় তা ঘরানত্তে হেনা সুজিবো। 12 বাবিলরে আক্রমণ গুরিবাত্তে এক্কান বাবতা তুলো। রোক্ষীদলরে আরঅ দরমর গরঅ, চুগিদার্ বজঅ, গুমুরো জাগাত্ সৈন্যগুনোরে যুক্কোল্ রাগঅ। লগেপ্রভু বাবিল মানুচ্চুনো বিরুদ্ধে তার উদ্দেশ্যগান্ আর উগুম মজিম্ কাম গুরিবো। 13 ও বাবিল, তুই দঅ বোউত্ পানি পারত্ বজত্তি গরচ্ আর বোউত্ ধন-সম্পদর গিরোজ্; তর্ থুমান এচ্চ্যে, তরে ছাজি ফেলেবার সময় ওইয়্যে। 14 বেগত্তুন্ খেমতাবলা লগেপ্রভু তার নিজো নাঙে শমক্ হেইনে কোইয়্যেদে, “মুই হামাক্কায় এক ঝাক্ পুগ্-যুগ্ পাল ধোক্ক্যেন মানুচ্ দিইনে তরে ভর্পুনং গুরিম, আর তারা তঅ উগুরে জিদেনার ডাগনি দিবাক্।” 15 লগেপ্রভু নিজোর খেমতালোই পিত্থিমীগান বানেয়্যে, তা জ্ঞানান্দোই সংসারান থিদেবর্ গোজ্যে আর বুদ্ধিলোই আগাজ্চান বিজেই দিয়্যে। 16 তা উগুমে আগাজর্ পানিগান গুজুরি উদে; তে পিত্থিমীর শেজ্ দুযিত্তুন্ মেঘ তুলি আন্যে। তে ঝড়ত্তে কারেন্ বানায় আর তা ভান্ডালত্তুন্ বোইয়্যের্ নিগিলে আনে। 17 বেক্ মানুচ্চুন জ্ঞাননেইয়্যে আর ভুল্; পত্তি সনাবান্যে তা মূত্তিগুনোত্তে লাজায়। তার্ ছাজিনে বানেয়্যে মূত্তিগুন মিজে, সিগুনো ভিদিরে নিজেস্ নেই। 18 তারা অগুণোর্, ঈচ্ গুরিবার জিনিস্; বিচেরর্ সময় আজলে সিগুন ভস্ত ওই যেবাক্। 19 যিবে যাকোবর্ পাওনা ভাগ্ তে ইগুনো ধোক্ক্যেন নয়, কিত্তে তেয়ই বেক্ জিনিস্চানির সিরিস্টিগুরিয়্যে আর ইস্রায়েল তার বিশেষ সোম্বোত্তি। তা নাঙান্ বেগত্তুন্ খেমতাবলা লগেপ্রভু। 20 লগেপ্রভু কোইয়্যেদে, “ও বাবিল, তুই মর্ যুদ্ধোর্ মুগোড়্, মর্ যুদ্ধোর্ আত্যের্; তরে দিইনে মুই জাদ্তুনোরে চুরমার গুরিম, তরে দিইনে রেজ্যগানিরে ভস্ত গোজ্যং; 21 তরে দিইনে মুই ঘোড়া আর ঘোড়া মাউট্তোরে চুরমার গোজ্যং; 22 তরে দিইনে মুই মরদ আর মিলেগুনোরে চুরমার গোজ্যং, তরে দিইনে বুড়ো আর চিগোন্ গুরোগুনোরে চুরমার গোজ্যং, তরে দিইনে গাবুজ্যে আর গাবুজ্যে মিলেগুনোরে চুরমার গোজ্যং।” 23 তরে দিইনে মুই গরক্ আর ভেড়া পালুনোরে চুরমার গোজ্যং, তরে দিইনে চাষী আর বলদতুনোরে চুরমার গোজ্যং, তরে দিইনে শাজন্গুরিয়্যেগুনোরে আর রাজার কামগুরিয়্যেগুনোরে চুরমার গোজ্যং। 24 লগেপ্রভু কোইয়্যেদে, “বাবিল আর বাবিলোত্ বজত্তি গুরিয়্যে বেক্কুনে সিয়োনত্ যেদক্কানি অন্যেয় কাম্ গোজ্যন্ তমা চোগো মুজুঙোত্ মুই সিয়েনির ফল দিম।” 25 লগেপ্রভু কোইয়্যেদে, ও ভস্তগুরিয়্যে মুড়ো, তুই বেক্ পিত্থিমীগানর ভস্তগুরিয়্যে; মুই তঅ বিরুদ্ধে। মঅ আঢ্তান মুই তঅ বিরুদ্ধে বাবেইনে অজল্ মুড়োত্তুন্ তরে গোজ্যেই দিম আর তরে এক্কো পুড়ি যেইয়্যে মুড়ো বানেম্। 26 মান্জ্যে কুণো পাত্তর্বোত্তে তত্তুন্ কনঅ পাত্তর্ ন-নিবাক্, গড়াগানত্তেয়ো ন-নিবাক্; তুই জিংকানিবর্ মানুচ্ নেইয়্যে ওই থেবে। 27 “তুমি দেজ ভিদিরে বাবতা তুলো। জাদ্তুনো ভিদিরে শিঙে বাজঅ। তা বিরুদ্ধে যুদ্ধোত্তে জাদ্তুনোরে যুক্কোল্ গরঅ; তা বিরুদ্ধে অরারট, মিন্নি আর অস্কিনস রেজ্যগানিরে ডাগঅ। তা বিরুদ্ধে এক্কো সেনাপতিরে নেযঅ; পুগ্-যুগ ধোক্ক্যেন ভালোক্কুন ঘোড়া পাধেই দুয়ো। 28 তা বিরুদ্ধে যুদ্ধো গুরিবাত্তে জাদ্তুনোরে, মাদীয় রাজাগুনোরে, তারার্ শাজন্গুরিয়্যে গুনোরে আর বেক্ রাজার কামগুরিয়্যে গুনোরে আর তারার শাজনর্ অধীন বেক্ রেজ্যগানিরে যুক্কোল্ গরঅ। 29 দেজ্ গির্গিরের্ আর মজরা খার্, কিত্তে বাবিলরে মানুচ্ নেইয়্যে আর উগুজ্যে ভূই গুরি রাগেবার লগেপ্রভুর যে উদ্দেশ্য সিয়েন ঠিগ্ রোইয়্যে। 30 বাবিল যোদ্ধাগুন যুদ্ধো গরানা থামেয়োন; তারা তারার তাম্বুলো ভিদিরে রোইয়োন। তারার খেমতা ফুরেই যেইয়্যে; তারা মিলে ধোক্ক্যেন বল্পোজ্যে ওই যেইয়োন। তারার থেবার জাগানিত্ আগুন বাজেই দিয়্যে ওইয়্যে; বাবিলর্ বেক্ গেট্তুনোর্ লাগাড়াগুন ভাঙি ফেলা ওইয়্যে। 31 হবর্ কোইয়্যেবোর পর হবর্ কোইয়্যে আর দূতোর্ পরেদি দূত যাদন্দে বাবিল রাজার ইধু ফগদাং গুরিবাত্তে, তার পুরো শঅরান্ গজক্ গরা ওইয়্যে, 32 তা গাঙান আঢিনে পার্ অইদ্যে জাগায়ান গজক্ গরা ওইয়্যে, নলঝারত্ আগুন বাজেই দিয়্যে ওইয়্যে আর সৈন্যগুনে অমকদ দোরেয়োন।” 33 মুই ইস্রায়েলর গোজেন বেগত্তুন্ খেমতাবলা লগেপ্রভু কঙর্, “বাবিল-ঝি শোজ্য মারিবার সময়োর হানা ধোক্ক্যেন ওইয়্যে; খেত্-খেত্তি কাবেদে ধোক্ক্যেন তারে কাবি ফেলেবার সময় যাদিমাদি এবঅ।” 34 যিরূশালেমর মানুচ্চুনে কদন্, “বাবিল রাজা নবূখদ্নিৎসরে আমারে গিলি ফেল্যে, আমারে চুরমার গোজ্যে, আমারে সুদো কুমো ধোক্ক্যেন গোজ্যে। দানব ধোক্ক্যেন্ তে আমারে গিলি ফেল্যে আর আমারে গম্ গম্ হানা দিইনে তা পেট্তো ভোরেয়্যে, আর সে পরেদি আমারে এঁটোকাঁটা ধোক্ক্যেন দূর্ গুরি দিয়্যে।” 35 সিয়োনর আদাম্মেগুনে কদন্, “আমা কিয়্যেনি উগুরে যে অত্যেচার গরা ওইয়্যে সিয়েনি বাবিল উগুরেয়ো গরা ওক্। যিগুনে বাবিলোত্ বজত্তি গরন্ আমা লোগানিত্তে তারা দায়ী থাদোক্।” 36 সেনত্তে লগেপ্রভু কত্তে, ও যিরূশালেম, মুই তর্ তপ্পে ওম্ আর তর্ ওইনে হেনা সুজিম্; মুই তা সাগরান শুগেই ফেলেম আর বেক্ পয়নালাগুন শুগুনো বানেম। 37 বাবিলান অবঅ এক্কান ভস্ত ওইয়্যে কুর্, শিয়েলুনোর্ থেবার জাগা আর ঠাট্টা-মশকারির্ জাগা। সিয়েনত্ কনজন বজত্তি ন-গুরিবাক্; তা অবস্থা দেগিনে মানুচ্চুনে আমক্ অবাক্। 38 তা মানুচ্চুনে বেক্কুনে সিংহ ধোক্ক্যেন গুজুরিবাক্, সিংহ ছঅগুনো ধোক্ক্যেন গোঁ গোঁ গুরিবাক্। 39 তারা রাগ্ গুরিলে পরেদি মুই তারাত্তে এক্কো মেইট্বানর্ বেবস্থা গুরিম। মুই তারারে মাত্তল্ গুরিম যেন তারা হুজিয়ে নাজি উদোন্, সে পরেদি উমরত্তে ঘুমোন্, কনদিন্অ ন-জাগন। 40 ভেড়া ছঅগুনো ধোক্ক্যেন্গুরি, ভেড়া আর পাদা ধোক্ক্যেন্গুরি মুই তারারে জবাই গুরিবার জাগানত্ নেযেম। 41 শেশকরে, অত্তাৎ বাবিলরে কিবাবোত্যেগুরি গজক্ গরা অবঅ! গোদা পিত্থিমীগানর্ বাঈনী গুরিবার মানুচ্চোরে কিবাবোত্যেগুরি অধিকার গরা অবঅ! বাবিলরে দেগিনে জাদ্তুনে আমক্ অবাক্। 42 বাবিল উগুরে সাগরান উদি এবঅ, তার গুজুরি উঠ্যে তুবোলান্ তারে ঢাগি ফেলেব। 43 তার শঅরানি ভস্ত ওই যেবঅ। সিয়েনি অবঅ শুগুনো আর ধূল্যেচর দেজ্; সেই দেজত্ কনজনে বজত্তি ন-গুরিবাক্, সিয়েন ভিদিরেদি কনজনে যানা-এযানা ন-গুরিবাক্। 44 মুই বাবিল বেল দেবেদারে সাজা দিম্ আর তে যিয়েন গিল্যে সিয়েন তারে দিইনে ওগোলেম্। জাদ্তুনে আর তাইধু গঙার ধোক্ক্যেন ন-যেবাক্। বাবিল দেবালানঅ পড়ি যেবঅ। 45 ও মর্ মানুচ্চুন্, বাবিল ভিদিরেত্তুন্ নিগিলি এজঅ। তুমি পত্তিজনে নিজো জিংকানিগানি রোক্ষ্যে গরঅ। লগেপ্রভুর জ্বোল্জল্যে রাগত্তুন্ দাবা যেইনে ধেই যঅ। 46 যেক্কে নানান্ বাবোত্যে গুজব শুনো যেবঅ সেক্কে আশা ন-আরেয়ো বা ন-দোরেয়ো; এক বজরত্ এক্কান গুজব উদিবো আর অন্য বজরত্ আর এক্কান গুজব উদিবো। সেই গুজব্পান অলঅ, বাবিলোত্ অত্যেচার অর্ আর এক শাজন্গুরিয়্যে আর এক শাজন্গুরিয়্যের্ বিরুদ্ধে লাক্যে। 47 এমন সময়ান হামাক্কায় এজের্ যেক্কে মুই বাবিল মূত্তিগুনোরে সাজা দিম্; তার পুরো দেজ্চানই অসর্মান অবঅ আর সিয়েনর মুরি যেইয়্যে মানুচ্চুন বেক্কুনে সিয়েন ভিদিরে পড়ি থেবাক্। 48 আগাজ্চান, পিত্থিমীগান আর সিয়েন ভিদিরে বেক্কানিয়ে বাবিল বেপারান্দোই হুজিয়ে রঅ ছাড়িবো, কিত্তে উত্তোরেত্তুন্ ভস্তগুরিয়্যেবো এইনে তারে আক্রমণ গুরিবো। মুই লগেপ্রভু এ কধাগান কঙর্। 49 বাবিলানত্যে যেবাবোত্যেগুরি বেক্ পিত্থিমীগানর্ মানুচ্চুন মরিনে পড়ি এলাক্ সেবাবোত্যেগুরি ইস্রায়েলীয়গুনোরে মারে ফেলানার কারনে বাবিলীয়গুনোর্অ মরিনে পড়ি থাহ্ পুরিবো। 50 তুমি যিগুনে মরণর্ আঢত্তুন্ রোক্ষ্যে পেইয়ো তুমি আঢি এজঅ, দেরি ন-গোজ্য। দূর দেজত্ থেবার অক্তত্ লগেপ্রভুরে ইদোত্ তুলো আর যিরূশালেম পৌইদ্যেনে চিদে গরঅ। 51 “তুমি কোইয়ো, ‘আমা পৌইদ্যেনে ঈচ্ গরানার কধা শুন্ন্যেই বিলিনে আমি অসর্মান ওইয়্যেই। লাজে আমা মুয়োনি নাঢা যেইয়্যে, কিত্তে লগেপ্রভুর ঘরর্ সুদ্ধো-সাংগ জাগানিত্ বিদেশীগুনে সোম্মোন্।’ 52 মাত্তর্ মুই কঙর্, দিন এজের্ যেক্কে মুই বাবিল মূত্তিগুনোরে সাজা দিম্ আর বাবিল বেক্ জাগানিত্ অমকদ আহত মানুচ্চুনে বুগ্ চাবেরেবাক্। 53 বাবিলান যুনি আগাজত্ সংঅ লুমেগোই আর সিয়েনত্ দরমর ঘর্ তুলে, তো মুই তা বিরুদ্ধে ভস্তগুরিয়্যেগুনোরে পাধেই দিম্।” 54 বাবিলত্তুন্ কানানি রঅ শুনো যার্, বাবিলীয়গুনো দেজত্তুন বিরাট্ ভস্ত অনার্ রবো উদি এজের্, 55 কিত্যে লগেপ্রভু বাবিলানরে ভস্ত গুরিবো; তে তার্ দর্গরেপারা রবোরে থামেই দিবো। শত্রুগুনে দাঙর্ দাঙর্ তুবোল ধোক্ক্যেন গুজুরি গুজুরি এবাক্; তারা দাঙর্ দাঙর্ গুরি রঅ ছাড়িবাক্। 56 বাবিল বিরুদ্ধে এবঅ ভস্তগুরিয়্যেবো; তা যোদ্ধাগুনে ধরা পড়িবাক্ আর তারার ধনুগানি ভাঙি যেবঅ; কিত্যে লগেপ্রভু হেনাসুজিয়ে গোজেন; বাবিলোরে তারা সাজা তারারে দিবো। 57 যিবের্ নাঙান বেগত্তুন্ খেমতাবলা লগেপ্রভু সেই রাজাবো কোইয়্যেদে, “মুই তার রাজার চাগরুনোরে, জ্ঞানী মানুচ্, শাজন্গুরিয়্যে, দাঙর্ পোজিশনর কামগুরিয়্যেগুন আর যোদ্ধাগুনোরে মাত্তল্ গুরিম। তারা উমরত্যে ঘুম যেবাক্; তারা আর ন-জাগিবাক্। 58 বাবিল দাডঅ দেবালান্ ভাঙিনে সং গুরি ফেলা অবঅ আর তার অজল্ গেট্তুনোত্ আগুন ধুরি দিয়্যে অবঅ। মানুচ্চুনে মিজে মিজে নিজোরে বল্পোজ্যে গুরিবাক্, জাদ্তুনোর কামর্ ফল আগুনোত্ পড়ি যেবঅ।” 59 যিহূদার রাজা সিদিকিয়র রাজাগিরির চের্ বজরত্ মহসেয়র নাদিন, অত্তাৎ নেরিয়র পুয়ো সরায় যিবে রাজার এক্কো নিজো কামগুরিয়্যে এলঅ, তে যেক্কে রাজার লগে বাবিলোত্ যেইয়্যে সেক্কে যিরমিয় তারে কিজু উগুম দিয়্যে। 60 বাবিল উগুরে যেদক্কানি দযা এবঅ, অত্তাৎ বাবিল পৌইদ্যেনে যেদক্কানি কধা লেগা ওইয়্যে সিয়েনি যিরমিয় এক্কো গুজেই থোইয়্যে বোইয়োত্ লেখ্যে। 61 যিরমিয় সরায়রে কলঅ, “তুই যেক্কে বাবিলোত্ লুমিবে সেক্কে খিয়েল রাগেবে যেনে এই বেক্ কধানি তুই মানুচ্চুনোরে পোড়েই শুনোচ্। 62 সে পরেদি কবে, ‘ও লগেপ্রভু, তুই এ জাগায়ান ভস্ত গুরিবার কধা কোইয়োচ্, সিয়েনত্ মানুচ্ বা য়েমান কনজনে সিয়েন ভিদিরে বজত্তি ন-গুরিবাক্; ইয়েন উমরত্তে মানুচ্ নেইয়্যে ওই থেবঅ।’ 63 এ বোইবো পড়ানা থুম্ গুরিনে সিয়েনত্ এক্কো পাত্তর্ বানিনে ইউফ্রেটিস গাঙত্ ফেলেই দিবে। 64 সে পরেদি কবে, ‘এবাবোত্যেগুরি বাবিলান ডুবিবো, আর ন-উদিবো, কিত্যে লগেপ্রভু সিয়েন উগুরে দযা আনিবো। তে এক্কুবারে শেজ্ ওই যেবঅ।’ ” যিরমিয়র কধা ইয়োদোই থুম্ অলঅ। |
Copyright © 2021 Bangladesh Bible Society
Bangladesh Bible Society