যিরমিয় 5 - Chakma Bible

গম্ বিলিনে কনজন নেই

¹ লগপ্রভু কোইয়্যেদে, “তুমি যিরূশালেমর পথ্‌তানিত্ এ মাঢাত্তুন উ মাঢাত্ আর চেরোকিত্তে রিনি চঅ। সিদুগোর্ শঅর্-চক্করুনোত্ যেইনে তোগেই নেযঅ। চঅ, যুনি এমন কাররে পঅ যে ন্যায়ভাবে আর গমেডালে চলের্ সালে মুই এ শঅরানরে খেমা গুরি দিম।‌‌

² যুনিয়ো তারা হবর্ কন, ‘জেদা লগেপ্রভুর নাঙে,’ তো তারা মিজে গুরিনে শমক্ হান্।”

³ ও লগেপ্রভু, তুই কি সত্যগান দেগিবাত্তে ন-চাজ্? তুই তারারে আঘাত্ গুরিলেয়ো তারা পিড়ে ন-পান; তুই তারারে গুড়ি গুরিলেয়ো তারা সংশোধনান্ এলাফেলা গোজ্যন্। তারার মুয়োনি তারা পাত্তরত্তুন্‌অ বেশ্ দর গুরিনে মনান ফিরেদে অস্বিগের্ গোজ্যন।

⁴ মুই ভাবিলুং, “তারা নাঢা আর ভুল্, কিত্তে তারা লগেপ্রভুর পথ্‌তান আর তারার গোজেনর সুদোমানি হবর্ ন-পান।‌

⁵ সেনত্তে মুই নেতাগুনো ইধু যেইনে তারা লগে কধা কোম্; হামাক্কায় তারা লগেপ্রভুর পথ্‌তান আর গোজেনর সুদোমানি হবর্ পান।” মাত্তর্ তারায়ো এক সমারে জুঙোল্ ভাঙিনে বান্ন্যেগান্ ছিনি ফেল্যন।

⁶ সেনত্তে ঝারত্তুন্ এক্কো সিংহ এইনে তারারে মারে ফেলেব। ধূল্যেচর-চাগালার এক্কো হোক্ক্যে বাঘে তারারে ভস্ত গুরিবো আর তারার্ শঅরানি ইধু এক্কো হোক্ক্যে বাঘে উঠ্ পাদি থেবঅ। যুনি কনজনে সিয়োনত্তুন নিগিলি এজন্ সালে তে কট্টা কট্টা ওই যেবঅ, কিত্তে তারার পাপ্ অমকদ বেশ্ আর তারার ভান্ন্যেই পধেদি যেবার ঘটনাগান বেশ্।

⁷ লগেপ্রভু কোইয়্যেদে, ও যিরূশালেম, কিত্তে মুই তরে খেমা গুরিম? তর্ ঝি-পুয়োগুনে মরে ফেলেই যেইয়োন আর যিগুনে গোজেন নয় তারা নাঙে শমক্ খেইয়োন। মুই তারার বেক্ দরকারানি ফুরেই দুয়োং, তো তারা সিনেলী গোজ্যন আর দলে দলে বেশ্যেগুনো ঘরত্ যেইয়োন।

⁸ তারা পেট ভুরি হেইয়্যে তেজী কামুক ঘোড়া ধোক্ক্যেন এক্কো আর এক্কোর মোগো লগে মিজেবাত্তে ডাগি উঠ্যন্।

⁹ মুই লগেপ্রভু পুযোর্ গরঙর্, ইয়েনত্তে কি মুই তারারে সাজা ন-দিম্? মুই কি এবাবোত্যে জাদ উগুরে হেনা ন-সুজিম্?

¹⁰ “ও জাদ্‌তুন, তুমি যিরূশালেমর আংগুর খেত্‌‌‍‌‍তানিত্ যেইনে সিয়েনি ভস্ত গরঅ মাত্তর্ পুরোপুরি বর্‌‌বাত ন-গোজ্য। সিয়েনর ডেলাগুন কাবি ফেলঅ, কিত্তে এ মানুচ্চুন লগেপ্রভুর নয়।‍,

¹¹ ইস্রায়েল আর যিহূদার মানুচ্চুন মঅ উগুরে অমকদ অবিশ্বেজি ওইয়োন। মুই লগেপ্রভু এ কধাগান কঙর্।”

¹² তারা লগেপ্রভুর পৌইদ্যেনে মিজে কধা কদন্। তারা কদন, “তে কিচ্চু ন-গুরিবো। আমার কনঅ খেতি ন-অবঅ; আমি কনদিন্‌অ যুদ্ধো বা ভাদড়াত্ ন-দেগিবোং।

¹³ ভাববাদীগুনে বোইয়্যের ধোক্ক্যেন; তারা ভিদিরে গোজেনর কধা নেই। সেনত্তে তারা যিয়েনি কন্ সিয়েনি তারা উগুরে গরা অবঅ।”

¹⁴ সেনত্তে বেগত্তুন্ খেমতাবলা গোজেন লগেপ্রভু এ কধাগান কোইয়্যেদে, “মানুচ্চুনে এ কধানি কদন্ বিলিনে তঅ মুয়োদি মঅ কধানি আগুনো ধোক্ক্যেন গুরিম আর এ মানুচ্চুনোরে গুরিম তক্তা ধোক্ক্যেন; সে আগুনানে সিয়েনরে পুড়ি ফেলেব।”

¹⁵ লগেপ্রভু কোইয়্যেদে, “ও ইস্রায়েলীয়গুন, মুই তমা বিরুদ্ধে দূরত্তুন এক্কো জাদরে আনিম্। সিবে এক্কো পুরোণি আর টিগি থেইয়্যে জাদ্; সে মানুচ্চুনোর ভাষা তুমি হবর্ ন-পেবা আর তারা কধানি তুমি ন-বুঝিবে।

¹⁶ তারা জদবদে সেল্ মারন; তারা বেক্কুনে দরমর যোদ্ধা।

¹⁷ তারা তমা খেদ্‌তানি আর হানাগানি গজক্ গুরিবাক্, গজক্ গুরিবাক তমা ঝি-পুয়োগুনোরে; তারা তমার গোরু-ভেড়ার পালুন গজক্ গুরিবাক, গজক্ গুরিবাক তমার বেক্ আংগুর আর ডোমোর্ গাজ্‌চুন। যে দেবাল্-ঘিজ্যে শঅর উগুরে তুমি বিশ্বেজ্ গোজ্য সিয়েন তারা যুদ্ধো গুরিনে ভস্ত গুরি দিবাক্।” ‌

¹⁸ লগেপ্রভু কোইয়্যেদে, “তো সেই দিনুনোত্ মুই পুরোপুরিগুরি তরে ভস্ত ন-গুরিম।

¹⁹ যেক্কে মান্‌জ্যে পুযোর্ গুরিবাক্, ‘আমা গোজেন লগেপ্রভু আমা উগুরে ইয়েনি কিত্তে গুরিলো?’ সেক্কে তুই তারারে কবে, ‘যেবাবোত্যে তুমি মরে ছাড়িনে তমা দেজত্ দেব-দেবেদাগুনোরে সেবা গোজ্য সেবাবোত্যেগুরি যে দেজ্‌‌‌চান তমার নিজোর নয় সে দেজত্ যেইনে ইক্কিনে তুমি বিদেশিগুনোরে সেবা গুরিবে।’ ”

²⁰ লগেপ্রভু যাকোবর্ বংশবোরে এ কধাগান কবাত্তে আর যিহূদা ইধু এ কধাগান ফগদাং গুরিবাত্তে কোইয়্যে,

²¹ ও ভুল্ আর বুদ্ধিনেইয়্যে মানুচ্চুন, তুমি যিগুনে চোগ্ থাগদেয়ো ন-দেগর্, কান থাগদেয়ো ন-শুনোর্, তুমি শুনো।

²² তুমি কি মরে ন-দোরেবা? মঅ মুজুঙোত্ কি তুমি গির্‌ ন-গিরেবা? মুয়ই এক্কান উমরর্ মানা ইজেবে কোরোলিলোই সাগর দুযিগান ঠিগ্ গোজ্যং, যেনে সাগরানে সিয়েন পার্ ওই ন-পারে। সিয়েনর তুবোলুন্ জোরে এলেয়ো সিয়েন ফোলেই ন-পারিবো; সিয়েন গুজুরি উদিলেয়ো পার্ ওই যেই ন-পারে।‌‌‍

²³ মাত্তর্ এ মানুচ্চুনোর মনানি এক বুস্যে আর উল্লোমি। তারা ভান্ন্যেই পধেদি যেইয়োন।

²⁴ তারা মনে মনেয়ো ন-কন্দে, এজঅ, আমা গোজেন লগেপ্রভুরে আমি ভোক্তি সহকারে দোরেইনে চলিই, যিবে অক্ত মজিম্ শরৎ আর বসন্ত কালত্ ঝড় দে, যিবে আমাত্তে খেত্ কাবিবার যগাজ্যে গুরি সময়ান রোক্ষ্যে গরে।

²⁵ তমা অন্যেয় কামানিত্তে ইয়েনি দূরোত্ রাগা ওইয়্যে; তমা পাপত্তে তমার ভালেদি ন-অয়।

²⁶ মঅ মানুচ্চুনো ভিদিরে এন্ পাজি মানুচ্ আগন যিগুনে পেগ্ শিগেরি ধোক্ক্যেন উৎ পাদিনে থান; তারা ফাল্ পাদিনে মানুচ্ ধরন।

²⁷ খাজাবো যেবাবোত্যে পেগ্‌‌কোই ভরা তারার ঘরানিয়ো সেবাবোত্যে ছলনালোই ভরা। তারা তাগোয়্যে আর খেমতাবলা ওইয়োন,

²⁸ তারা পক্তা মক্তা আর তেল্‌তেল্যে ওইয়োন। তারার ভান্ন্যেই কামানির ধুঝি নেই; মা-বাপ্ নেইয়্যেগুনে যেনে ন্যায়বিচের পান সেনত্তে তারা তারার তপ্পে ন-থিয়্যেন আর তারা নাঢা মানুচ্চুনোর অধিকারান্‌অ রোক্ষ্যে ন-গরন।

²⁹ ইয়েনত্তে মুই কি তারারে সাজা ন-দিম্? মুই কি এবাবোত্যে জাদ উগুরে হেনা ন-সুজিম্? মুই লগেপ্রভু এ কধাগান কঙর্।

³⁰ “দেজ ভিদিরে অমকদ দর্‌গরেপারা ঘটনা গোট্যে।‌‌

³¹ ভাববাদীগুনে মিজে কধা ফগদাং গরন্, ধর্মগুরুগুনে নিজোের্ আঢ খেমতালোই শাজন্‌ গরন, আর মঅ মানুচ্চুনে এবাবোত্যে গম্ পান। মাত্তর্ ও মর্ মানুচ্চুন, যেরেদি তুমি কি গুরিবে?”