যিরমিয় 49 - Chakma Bible

অম্মোন পৌইদ্যেনে

¹ অম্মোনীয়গুনো পৌইদ্যেনে লগেপ্রভু এ কধাগান কোইয়্যে, ইস্রায়েলর কি কনঅ পুয়ো নেই? তা মরানার্ পরেদি তা সোম্বোত্তির্ অধিকারি কি কনজন নেই? সালে মিল্‌‌‌‌‌‌কমে কিত্তে গাদ-গুট্টির জাগানি গজক্ গোজ্যে? কিত্তে মিল্‌‌‌‌‌‌‌কমর পূজোগুরিয়্যেগুন সিদুগোর্ শঅরানিত্ বজত্তি গরদন্?

² চঅ, সময় এচ্চ্যে যেক্কে মুই অম্মোনীয়গুনোর রব্বা শঅর বিরুদ্ধে যুদ্ধোর ডাগনি দিম; সেক্কে সিয়েন ভস্তর্ কুড়্ অবঅ, আর তার চেরোকিত্তে আদামানিত্ আগুন লাগা অবঅ। সেক্কে যিগুনে ইস্রায়েলরে ধাবেইনে নিগিলেই দুয়োন ইস্রায়েলে তারারে লোড়েইনে নিগিলেই দিবো। মুই লগেপ্রভু এ কধাগান কঙর্।

³ “ও হিশ্‌বোন, আবিলেচ্ গর্, কিত্তে অয় শঅর ভস্ত ওই যেইয়্যে। ও রব্বা শঅরর্ আদাম্মেগুন, কানঅ; বস্তা ফাদা উরিনে আবিলেচ্ গরঅ। দেবাল ভিদিরে দাবাদেদি গরঅ, কিত্তে তঅ দেবেদা মিল্‌‌কমে বন্দী ওইনে দূর দেজত্ যেবঅ, আর তা লগে যেবাক্ তার ধর্মগুরু আর দাঙর্ পোজিশন কামগুরিয়্যেগুনে।

⁴ কিত্তে তুই তর্ বোল্‌‌‌বোল্যে কলগ্‌‌‌কানিলোই বাড়্‌বো গরর্? ও অবিশ্বেজি মিলে, তঅ ধন-সম্পদ উগুরে নির্ভর গুরিনে তুই কত্তে, ‘কন্না মরে আক্রমণ গুরিবো?’

⁵ মুই বেগত্তুন্ খেমতাবলা প্রভু লগেপ্রভু কঙর্, তঅ চেরোকিত্তে বেক্কুনোত্তুন্ মুই তঅ উগুরে অমকদ দর্‌‌‌‌বুগ আনিম। তমারে পত্তিজনরে ধাবেই দিয়্যে অবঅ; ধেই যেইয়্যে মানুচ্চুনোরে এগত্তর্ গুরিবাত্তে কনজন ন-থেবাক্।

⁶ মাত্তর্ পরেদি মুই অম্মোনীয়গুনোর অবস্থা ফিরেম।”

ইদোমর পৌইদ্যেনে

⁷ ইদোমর পৌইদ্যেনে বেগত্তুন্ খেমতাবলা লগেপ্রভু কোইয়্যেদে, “তৈমনত্ কি জ্ঞান নেই? বুদ্ধিবলাগুনোত্তুন্ কি উপদেশ থুম্ ওই যেইয়্যে? তারার জ্ঞান কি ক্ষয় ওই যেইয়্যে?

⁸ ও দদানর আদাম্মেগুন, তুমি পিজেদি ফিরিনে ধেই যঅ, গুমুরো জাগানত্ যেইনে পৌল্যেই থাগঅ, কিত্তে এষৌরে সাজা দিবার অক্তত্ মুই তা উগুরে দযা আনিম।

⁹ যিগুনে আংগুর তুলোন্ তারা যুনি তইধু এজন্ সালে কি তারা কিজু আংগুর ন-থবাক্? চুরুনে যুনি রেদোত্ এজন সালে তারার যেত্তমান্ দরকার সেত্তমান্ বানা চুরি গুরিবাক্।

¹⁰ মাত্তর্ মুই এষৌর জাগায়ান মানুচ্ নেইয়্যে গুরি ফেলেম। তে যেনে পৌল্যেই থেই ন-পারে সেনত্তে মুই তা পৌল্যেই থেবার জাগানি ফগদাং গুরি দিম। তা বংশর মানুচ্চুনে, কুদুম্মোগুনে আর পাড়াল্যেগুনে ভস্ত ওই যেবাক্ আর তেয়ো ন-থেবঅ।

¹¹ তমা মা-বাপ নেইয়্যে ঝি-পুয়োগুনোরে থোই যঅ; মুই তারার জিংকানিগানি রোক্ষ্যে গুরিম। তর্ রানিমিলেগুনেয়ো মঅ উগুরে বিশ্বেজ্ গোরোদোক্।”

¹² লগেপ্রভু কোইয়্যেদে, “যিগুনে সাজা পেবার যগাজ্যে নয়, তারার যুনি সাজাগান্ ওইনে গলজত্ হা পড়ে সালে তুই কিত্তে সাজা ন-পেইনে থেবে? তত্তুন্ সেই গলজ্‌‌‌‌‌সোত্ হেইনে সাজা পাহ্ পুরিবো।

¹³ মুই মর্ নিজো নাঙে শমক্ হাঙর্, বস্রা ভস্ত ওইনে ঈচ্ গরে পারা অবঅ। মানুচ্চুনে তা অবস্থা দেগিনে আমক্ অবাক্ আর তা নাঙান্দোই অভিশাব্ দিবাক্। তার বেক্ আদামানি আর শঅরানি উমরত্তে ভস্ত ওইনে থেবঅ।”

¹⁴ মুই লগেপ্রভুত্তুন্ এ হবরান শুন্যং, এক্কো দূতোরে জাদ্‌‍তুনো ইধু পাদা ওইয়্যে। তে কোইয়্যেদে, “তুমি ইদোমানরে আক্রমণ গুরিবাত্তে এগত্তর্ অ। যুদ্ধো গুরিবাত্তে উদো।”

¹⁵ লগেপ্রভু কোইয়্যেদে, ইক্কিনে মুই জাদ্‌‍‍তুনো ভিদিরে তরে বেগত্তুন চিগোন্ বানেম আর মানুচ্চুনো ভিদিরে ঈচ্ গরেদে বাবোত্যে গুরিম।

¹⁶ ও পাত্তর ফাদামারাত্ বজত্তি গুরিয়্যে মুড়োমুড়ির অজল্ জাগানর গিরোজ্, তুই দর্‌‍‍‌গরেপারা বিলিনে তঅ মনর্ যে বাড়্‌বোগানে তরে ছলনা গোজ্যে। যুনিয়ো তুই ঈগল ধোক্ক্যেন অজল্ জাগাত্ তঅ ঘরান বানাচ্ তো সিয়েনত্তুন্ মুই তরে তলেদি লামেই অনিম।

¹⁷ ইদোমের অবস্থা দেগিনে মানুচ্চুনে আমক্ অবাক্; যিগুনে তা কায়-কুরেদি যেবাক্ তারা বেক্কুনে অমকদ দোরেবাক্ আর তার্ বেক আঘাত্‌‍‍‌‌তানিত্তে তারে ঠাট্টা-মশ্‌‍‍‌‌কারি গুরিবাক্।

¹⁸ মুই লগেপ্রভু কঙর্, কায়-কুরে আদামানি সুদ্ধো যেবাবোত্যে সদোম আর ঘমোরারে ভস্ত গরা ওইয়্যে সেবাবোত্যে ইদোমত্ কনজনে বজত্তি বজত্তি ন-গুরিবাক্; সিয়েন ভিদিরে কনঅ মানুচ্ ন-থেবাক্।

¹⁹ “যর্দনর ঝাড়ত্তুন্ সিংহ যেবাবোত্যেগুরি উদি এইনে গম্ চড়েদে ভূইয়োত্ শিগের্ গুরিবাত্তে যায় সেবাবোত্যেগুরি মুই কানক্কণ্ ভিদিরে ইদোমরে তা দেজত্তুন্ লোড়েই দিম। মুই তা উগুরে মর্ বেঈ লোইয়্যে মানুচ্চোরে নেযেম। কন্না মর্ সং সং? কন্না মঅ বিরুদ্ধে থিয়্যেই পারে? কন্ পালকে মঅ মুজুঙোত্ টিগি থেই পারে?”

²⁰ সেনত্তে ইদোম বিরুদ্ধে লগেপ্রভু কি পরিকল্পনা গোজ্যে, তৈমন আদাম্মেগুনো বিরুদ্ধে তে কি ঠিগ্ গোজ্যে সিয়েন শুনো-পালর ছঅগুনোরে টানি নেযা অবঅ; তারার কামানিত্তে তারার চোড়েয়্যে জাগায়ানি তে এক্কুবারে ভস্ত গুরি দিবো।

²¹ তারার তলে পড়ানা রঅবোলোই পিত্‌‍‍‌‌‌থিমীগান গির্‌‍‍‌‌‌গিরেব; তারার কানানিগানি লোহিত সাগর সং শুনো যেবঅ।

²² চঅ, তারার শত্রুগুন ঈগল ধোক্ক্যেন গুরি অজলত্ উড়িবাক্ আর বস্রাগান উগুরে ডুয়ো মিলিনে শো গুরিনে তলেদি লামি এবাক্। সেদিন্যে ইদোম যোদ্ধাগুনোর মনত্ পুয়ো ফুদোইদ্যে মিলে মনান ধোক্ক্যেন অবঅ।

দামেস্ক পৌইদ্যেনে

²³ দামেস্ক পৌইদ্যেনে লগেপ্রভু কোইয়্যেদে, “হমাৎ আর অর্পদে দরে থির্‌‍‍‌‌‌‌‌নেইয়্যে ওইয়্যে, কিত্তে তারা ভান্ন্যেই হবর্ শুন্নোন্। তারা আশানেইয়্যে ওইয়োন, থির্ নেইয়্যে সাগর ধোক্ক্যেন ওলোঝোলো ওইয়োন্।

²⁴ দামেস্কগান বল্‌‍‍‌‌‌‌‌‌পোজ্যে ওইয়্যে, তে ধেই যেবাত্তে ফিজ্যে আর তারে আজাবোদে ধোজ্যে; পুয়ো ফুদেয়্যে মিলে ধোক্ক্যেন পীড়ে আর যন্ত্রনা তারে ধোজ্যে।

²⁵ সেই নাঙ্‌‍‍‌‌‌‌‌‌গোজ্যে শঅরান্, যে শঅরানরে নিইনে মুই হুজি অদুং, কিত্তে মানুচ্চুনে সিয়েন ছাড়িনে ন-যান?

²⁶ মুই বেগত্তুন্ খেমতাবলা লগেপ্রভু কঙর্, তার গাবুজ্যে পুয়োগুনে হামাক্কায় শঅরর খুলো জাগাত্ মুরিনে পড়ি থেবাক্; সেদিন্যে তার বেক্ শেজ্ গুরি দিয়্যে অবঅ।

²⁷ দামেস্কর দেবালানিত্ মুই আগুন বাজেই দিম্; সিয়েন বিন্‌হদদর তাম্বুলানি পুড়ি ফেলেব।”

কেদর আর হাৎসোর পৌইদ্যেনে

²⁸ বাবিল রাজা নবূখদ্‌নিৎসরে কেদর আর হাৎসোরর যে রেজ্যগানিরে ওদেই দিয়্যে সিয়েনি পৌইদ্যেনে লগেপ্রভু কোইয়্যেদে, “উদো, কেদর আক্রমণ গরঅ আর পূগেদি দেজ মানুচ্চুনোরে ভস্ত গরঅ।

²⁹ মানুচ্চুনে তারার বেক্ তাম্বুলানি আর য়েমান পালুন নেযেবাক্ আর তারার বেক্ পযাপিরানি, তাম্বুলো পর্দানি আর উট্‌তুন নেযেবাক্। তারা রঅ ছাড়িনে তারারে কবাক্, ‘চেরোকিত্তে অমকদ দর্!’ ”

³⁰ লগেপ্রভু কোইয়্যেদে, “ও হাৎসোরর আদাম্মেগুন, তুমি যাদিমাদি ধেই যঅ। তুমি গুমুরো জাগাত্ যেইনে থাগঅ। বাবিল রাজা নবূখদ্‌নিৎসরে তমা বিরুদ্ধে কুজুরোমি গোজ্যে, তমা বিরুদ্ধে এক্কান পরিকল্পনা গোজ্যে।

³¹ ও বাবিলীয়গুন, তুমি উদো, সেই আরামত্ থেইয়্যে জাদ্‌‌তুন যে গমেডালে বজত্তি গরদন্ তারারে আক্রমণ গরঅ। সে জাদ্‌‌তোর্ গেইট্অ নেই, লাগারায়ো নেই; তারা গায় গায় বজত্তি গরন।

³² তারার উট্‌‌তুন লুদেয়্যে মাল অবঅ আর তারার দাঙর্ য়েমান পাল লুদেয়্যে জিনিস অবঅ। যিগুনে মাঢাবোর দ্বিকিত্তেদি চুল কাবন্ তারারে মুই চেরোকিত্তে চিদি দিম্ আর বেক্কানিত্তুন্ তারা উগুরে দযা অনিম।

³³ হাৎসোরান অবঅ শিয়েলর থেবার জাগা আর জিংকানিবর্ মানুচ্ নেইয়্যে জাগা। কনজনে সিয়েনত্ বজত্তি ন-গুরিবাক্, সিয়েন ভিদিরে কনঅ মানুচ্ ন-থেবাক্।”

এলম পৌইদ্যেনে

³⁴ যিহূদার রাজা সিদিকিয়র রাজাগিরির পৌইল্যাদি এলম পৌইদ্যেনে লগেপ্রভুর এ কধাগান ভাববাদী যিরমিয় ইধু ফগদাং অলঅ,

³⁵ “মুই বেগত্তুন্ খেমতাবলা লগেপ্রভু কঙর্, মুই এলমর ধনু, তারার খেমতার আজল্ খুদোবো ভাঙি ফেলেম।

³⁶ মুই আগাজ চেরোকিত্তেত্তুন্ চেরান্ বোইয়্যের্ এলম বিরুদ্ধে আনিম। সে বোইয়্যেরত্ মুই তারারে চেরোকিত্তে ছিদি দিম; এলমর দূর্ গুরি দিয়্যে বন্দীগুনে বেক্ জাদ্‌‌‌তুনো ইধু যেবাক্।

³⁷ যিগুনে তারারে মারে ফেলেবাত্তে চান্ সেই শত্রুগুনো মুজুঙোত্ মুই এলমীয়গুনোরে চুরমার গুরি দিম; মর্ অমকদ রাগত্ মুই তারা উগুরে দযা আনিম। তারারে শেজ্ গুরি ন-ফেলানা সং মুই তারা বিরুদ্ধে তলোয়ার পাদেম্।

³⁸ মুই এলমত্ মর্ সিংহাসনান্ থিদেবর্ গুরিম আর তার রাজা আর রাজার চাগরুনোরে ভস্ত গুরিম,

³⁹ মাত্তর্ আগামিদি মুই এলমর অবস্থাগান্ ফিরেম। মুই লগেপ্রভু এ কধাগান কঙর্।”