যিরমিয় 48 - Chakma Bible

মোয়াব পৌইদ্যেনে

¹ মোয়াব পৌইদ্যেনে ইস্রায়েলর গোজেন বেগত্তুন্ খেমতাবলা লগেপ্রভু কোইয়্যেদে, “হায় নবো! সিয়েন দঅ ভস্ত ওই যেবঅ। কিরিয়াথয়িমে অসর্মান ওইনে অন্যগুনো আঢত্ যেবঅ; তা ঘিজ্যে দেবালান ভাঙি যেইনে মাজারা ন-থেবঅ।

² মোয়াবরে আর বাঈনী গরা ন-অবঅ; তা পতনত্তে মান্‌‌জ্যে হিশ্‌বোনত্ কুজুরোমী গুরি কবাক্, ‘এজঅ, আমি সেই জাদ্‌‌‍তোরে শেজ্ গুরি দিই।’ ও মদ্‌মেনা, তরেয়ো ভস্ত গরা অবঅ; তলোয়ারানে তঅ পিজেদি লোড়েব। ‌‌‍

³ হোরোণয়িমত্তুন্ কানানি রঅ শুনো, ভস্ত আর নাশ্ অবার্ কানানি।

⁴ মোয়াবরে ভাঙি ফেলা অবঅ; তারা চিগোন পুয়ো-ছাগুনে কানি উদিবাক্।

⁵ লূহীত পধেদি উদি যেবার্ অক্তত্ মান্‌‌‍‍জ্যে অমকদ কানি কানি যেবাক্; যে পথ্‌‌‍‍তান হোরোণয়িমর ইন্দি লামি যেইয়্যে সিয়েনত্ ভস্ত অনাত্তে অমকদ মনত্ দুঘোর্ কানানি শুনো যেবঅ।

⁶ ধেই যেই, যার্ যার্ পরাণান্দোই দাবা দুয়ো; ধূল্যেচর-চাগালার ঝুবো ধোক্ক্যেন অ।

⁷ তুই যেক্কে তঅ কাম্ আর ধন উগুরে নির্ভর গোজ্যস্ সেক্কে তরেয়ো বানিনে নেযা অবঅ, আর কমোশ তা ধর্মগুরু আর রাজার চাগরুনো সমারে বন্দী ওইনে দূরোত্ যেবঅ।

⁸ পত্তি শঅর বিরুদ্ধে ভস্তগুরিয়্যেবো এবঅ আর কনঅ শঅর বাদ যেই ন-পারিবো। মঅ কধামজিম কলগ্‌‌‍‍‍কানি ভস্ত অবঅ আর সংজাগানির বিনাশ অবঅ।

⁹ মোয়াব্‌‌‍‍‍‍পানরে ডুয়ো দো যেন তে উড়িনে ধেই যেই পারে; তা শঅরানি মানুচ্ নেইয়্যে অবাক্, সিয়েনিত্ কনজনে বজত্তি ন-গুরিবাক্।”

¹⁰ লগেপ্রভু কোইয়্যেদে, মঅ কামত্ যে মানুচ্চো আলেয়্যে গরে তা উগুরে অভিশাব্ পোড়োক্। যে তার তলোয়ারানরে লো জোড়েবাত্তে ন-দে তা উগুরে অভিশাব্ পোড়োক্।

¹¹ এক কুমোত্তুন্ আর এক কুমোত্ ঢালা ন-অলে মদ যেবাবোত্যে তা গাদ উগুরে পড়ি থায় সেবাবোত্যেগুরি মোয়াবে তার চিগোনত্তুন্ ধুরি নিশিদেগুরি পড়ি আঘে; তে বন্দীদজাত্ ন-যায়। সেনত্তে তার সুয়োত্তান্ আগ ধোক্ক্যেন রোইয়্যে, তা তুম্বাজ্‌‌চান্ ন-বদলে।

¹² মাত্তর্ দিন এজের্ যেক্কে মুই কুমোত্তুন্ ঢালেদে মানুচ্চুনোরে পাধেই দিম, আর তারা তারে ঢালিনে নিগিলেবাক্; তারা তা কুমুন্ সুদো গুরিবাক্ আর তা পিলেগুন চুরমার গুরি দিবাক্।

¹³ ইস্রায়েলর মানুচ্চুন যেবাবোত্যেগুরি বৈথেল উগুরে বিশ্বেজ্ গুরিনে লাজেয়োন সেবাবোত্যেগুরি মোয়াবেয়ো কমোশ পৌইদ্যেনে লাজত্ পুরিবো।

¹⁴ “তুমি কিবাবোত্যেগুরি কোই পারঅ, ‘আমি যোদ্ধা, যুদ্ধোত্ সাহসী মানুচ্’?

¹⁵ মোয়াব্‌পান্ ভস্ত অবঅ আর তা শঅরানি আক্রমণ গরা অবঅ; তার মূলুক্ মূলুক্ গাবুজ্যেগুনে গদ্দন্ দিবার জাগানত্ লামিবাক্।” যিবের্ নাঙান বেগত্তুন্ খেমতাবলা লগেপ্রভু সেই রাজাবো এ কধাগান কোইয়্যেদে,

¹⁶ “মোয়াবর পতন এচ্চ্যে; তা দজাগান যাদিমাদি এবঅ।

¹⁷ তুমি যিগুনে তা চেরোকিত্তে বজত্তি গরঅ, যিগুনে তা সুনাঙ কধা হবর্ পঅ, তুমি বেক্কুনে তাত্তে আবিলেচ্ গরঅ। তারে কঅ, ‘খেমতাবলা রাজদন্ড, বাঈনী গরেদে লুদিক্ কেধোক্ক্যেন গুরি ভাঙি যেইয়্যে! ’ ”

¹⁸ লগেপ্রভু কোইয়্যেদে, ও দীবোনর আদাম্মেগুন, তমা বাঈনী গরেদে জাগানত্তুন্ লামি এইনে শুগুনো মাদি উগুরে বজ, কিত্তে মোয়াবর্ ভস্তগুরিয়্যেবো তমা বিরুদ্ধে এইনে তমা ঘরানি ভস্ত গুরি দিবো।

¹⁹ ও অরোয়েরর আদাম্মেগুন, তুমি পধ কায়-কুরে থিয়্যেইনে চঅ। ধেই যেইয়্যে মরদ আর মিলেগুনোরে পুযোর্ গরঅ, কি ওইয়্যে?

²⁰ মোয়াবে অগমান ওইয়্যে, কিত্তে তে চুরমার ওইয়্যে। তুমি আবিলেচ্ গরঅ আর কানঅ। অর্ণোন গাঙ পারত্ এ কধাগান ফগদাং গরঅ, মোয়াব ভস্ত ওই যেইয়্যে।

²¹ কলগর্ এ বেক্ জাগানিত্ বিচেরর সময় ওইয়্যে- হোলন, যহস, মেফাৎ,

²² দীবোন, নবো, বৈৎ-দিব্লাথয়িম,

²³ কিরিয়াথয়িম, বৈৎ-গামূল, বৈৎ-মিয়োন,

²⁴ করিয়োৎ আর বস্রা, অত্তাৎ মোয়াব দেজর্ দূরোত্ আর কায়-কুরে বেক্ আদামানি আর শঅরানি উগুরে বিচেরর্ সময় ওইয়্যে।

²⁵ মোয়াবর খেমতার্ শিঙুন্ কাবি ফেলা ওইয়্যে; তা আঢ্‌‌তানি ভাঙি ফেলা ওইয়্যে।

²⁶ মোয়াবরে মাত্তল্ গরঅ, কিত্তে তে মঅ বিরুদ্ধে নিজোরে দাঙর্ গুরি দেগেয়্যে। তে তা ওগোল্যে উগুরে এগুড়্-উগুড়্ হেবঅ; মান্‌জ্যে তারে আজি- ঠাট্টার মানুচ্ কবাক্।

²⁷ ও মোয়াব, ইস্রায়েলে কি তর্ আজি-ঠাট্টার্ মানুচ্ ন-এলঅ? তে কি চুরুনো ভিদিরে ধরা পোজ্যস্, তুই যেদকবার তা কধা কচ্ সেদকবার ঈচ্ গুরিনে মাঢাবো লাড়াচ্?

²⁸ ও মোয়াবর আদাম্মেগুন, তুমি শঅরান ছাড়িনে মুড়োত্ যেইনে বজত্তি গরঅ। তুমি এমন কোদোর ধোক্ক্যেন অ, যে মুড়োমুড়ি গাদ মুয়োত্ তা ঘরান বানায়।

²⁹ মোয়াব্‌‌পুনে অমকদ চেদেয়্যে। আমি তার চেদেয়্যে কধা, বদ্‌রাগী, মান্‌জ্যরে ঠোগেয়্যে আর মনর্ বাড়্‌বো কধানি হবর্ পেই।

³⁰ মুই তার চেদেয়্যে বাড়্‌‌‌‌‌গরানর কধানি হবর্ পাং, মাত্তর্ সিয়েন মিজে আর তার বড়াই গরানাগান্ কনঅ কামর্ নয়।

³¹ সেনত্তে মুই মোয়াবত্তে আবিলেচ্ গুরিম, বেক্ মোয়াবত্তে কানিম্, কীর-হেরেসের মানুচ্চুনোত্তে বুগ্ চাবেরেম।

³² ও সিব্‌মার আংগুর লদা, মুই যাসেরত্তে যেবাবোত্যে কানিম্ তাত্তুন্‌অ বেশ্ তত্তে কানিম্। তঅ ডেলাগুন সাগর পাড়্‌‌‌‌‌‌‌সং ছিদি যেইয়োন; সিগুন যাসের সাগর পাড় সং লুম্মোন্দোই। মাত্তর্ তঅ হরান্যের্ ফল আর আংগুর উগুরে ভস্তগুরিয়্যেগুনে এই যেইয়োন।

³³ মোয়াবর ফলর্ বাগান, অত্তাৎ মোয়াব দেজত্তুন্ ফুত্তি আর হুজির্ ভাব যেইয়্যেগোই। মুই আংগুর মাড়েদে জাগানত্তুন্ আংগুর-রসর গঙারান্ নাঢি দুয়োং; হুজিয়ে রাজিয়ে আর সিগুন কনজনে ন-মাড়ন। যুনিয়ো কিজিক্ কাজাক্ আঘে মাত্তর্ সিগুন হুজির্ রঅ নয়।

³⁴ “তারার্ কানানি রঅগুন্ হিশ্‌‌‌‌‌‌‌‌বোনত্তুন ইলিয়ালী আর যহস সং, সোয়রত্তুন্ হোরোণয়িম আর ইগ্লৎ-শলিশীয়া সং লুম্মেগোই, কিত্তে নিম্রীমর পানিগানঅ শুগেই যার্।

³⁵ মুই লগেপ্রভু কঙর্, মোয়াবত্ যিগুনে পূজোর্ অজল্ জাগানত্ উৎসর্বর অনুষ্ঠান গরন্ আর তারা দেব-দেবেদাগুনো নাঙে আগর্‌বাট্টি জ্বালান মুই তারারে শেজ্ গুরি দিম্।

³⁶ সেনত্তে মোয়াবর আর কীর-হেরেসের মানুচ্চুনোত্তে মঅ মনান্ বাশি সুর ধোক্ক্যেন গুরি আবিলেচ্ গরের্। তারা যে ধনান্ থুবেয়োন সিয়েন শেজ্ ওই যেইয়্যে।

³⁷ দুঘ্‌কান ফগদাং গুরিবাত্তে বেক্কুনোর মাঢা মুড়োনা আর দাড়ি কাবি ফেলা ওইয়্যে; পত্তিজন আঢ্ আঙুর্ বিঙুর্ আর কমরত্ বস্তাফাদা পিনে ওইয়্যে।

³⁸ মোয়াবর বেক্ ঘরানির ছাল উগুরে আর শঅর্ চক্কর্‌‌‌বোত্ আবিলেচ্ গরানা বাদে আর কিচ্চু শুনো ন-যায়, কিত্তে যে পিলেবো কনজনে ন-চান সে পিলেবো ধোক্ক্যেন মুই মোয়াবরে ভাঙি ফেল্যং।

³⁹ তে কিবাবোত্যেগুরি চুর্‌‌মার্ ওইয়্যে! মান্‌‌‌‌জ্যে কেধোক্ক্যেন্‌গুরি তাত্তে আবিলেচ্ গত্তন! মোয়াবে লাজে কেধোক্ক্যেন্‌গুরি তা পিঠ্‌‌‌‌তান ফিরেইয়্যে! মোয়াবে তা চেরোকিত্তে বেক্ মানুচ্চুনো ইধু আজি-ঠাট্টার মানুচ্ ওইয়্যে, আর তা অবস্থা দেগিনে সে মানুচ্চুনে আমক্ ওইয়োন।”

⁴⁰ লগেপ্রভু কোইয়্যেদে, চঅ, এক্কো মানুচ্ ঈগল ধোক্ক্যেন শো শো গুরি লামি এজের্ আর মোয়াব বিরুদ্ধে তা ডুয়োনি ছিদি দের্।

⁴¹ তার বেক্ শঅরানি অধিকার গুরিনে ঘরানি গজক্ গরা অবঅ। সেদিন্যে মোয়াব যোদ্ধাগুনোর মনত্ পুয়ো পুদেয়্যে মিলের্ পীড়ে উদেদে মনান ধোক্ক্যেন অবঅ।

⁴² জাদ্ ইজেবে মোয়াবরে ভস্ত গরা অবঅ, কিত্তে তে মঅ বিরুদ্ধে নিজোরে দাঙর্ গুরি দেগেয়্যে।

⁴³ ও মোয়াবর মানুচ্চুন, তমাত্তে দর্, গাদ্ আর ফালুনে বাজ্জেই আগন্।

⁴⁴ যে মানুচ্চো দরে ধেই যেবঅ তে গাদত্ পুরিবো, যে মানুচ্চো গাদত্তুন্ উদি এবঅ তে ফালত্ ধরা পুরিবো; কিত্তে মুই মোয়াবর সাজাগানর্ সময়ান্ ঠিগ্ গুরি রাগেয়োং। মুই লগেপ্রভু এ কধাগান কঙর্।

⁴⁵ “হিশ্‌বোনর ছাবাত্ ধেই যেইয়্যে মানুচ্চুনে অসহায় ওইনে থিয়্যেই আগন্, কিত্তে হিশ্‌‌‌‌‌বোনত্তুন আগুন আর সীহোনর ভিদিরেত্তুন্ আগুনোর জিল্ নিগিল্যে; সিয়েনে মোয়াবর কবালান আর বেজাল্ গোজ্যে বাড়্‌‌‌‌‌গোজ্যেগুনো মাঢাগুনোর তাল্লোগান পুড়ি দিয়্যে।

⁴⁶ ও মোয়াব, অভিশাব্ পোড়োক্ তর্ ! কমোশর মানুচ্চুন ভস্ত ওই যেইয়োন; তঅ পুয়োগুনোরে দূর দেজত্ বন্দী ইজেবে নেযা ওইয়্যে আর তঅ ঝিগুনোরে বন্দী গরা ওইয়্যে।

⁴⁷ মাত্তর্ আগামিদি মুই মোয়াবর অবস্থা ফিরেম। মুই লগেপ্রভু এ কধাগান কঙর্।” মোয়াবর বিচেরর কধা ইয়োত্ থুম্ ওইয়্যে।