যিরমিয় 47 - Chakma Bible

পলেষ্টীয়গুনো পৌইদ্যেনে

¹ ফরৌণে গাজা আক্রমণ গুরিবার আগেদি পলেষ্টীয়গুনো পৌইদ্যেনে লগেপ্রভুর এ কধানি ভাববাদী যিরমিয় ইধু ফগদাং অলঅ,

² “চঅ, উত্তোরেদি কিবাবোত্যেগুরি পানিগান ফুলি উদের্; সিয়েন ওই উদিবো বান পানি গঙার ধোক্ক্যেন্। সিয়েনে দেজত্ আর সিয়েন ভিদিরে বেক্কানি, বেক্ আদাম আর শঅরানি আর সিয়েন ভিদিরে বজত্তি গুরিয়্যে বেক্কুনোরে ডুবেই দিবো। সেক্কে মানুচ্চুনে কানাকুদি গুরিবাক্; দেজত্ বজত্তি গুরিয়্যে বেক্কুনে আবিলেচ্ গুরিবাক্।

³ তারা জোরে দাবা যেইয়্যে ঘোড়া টেঙ থুগো রঅ, শত্রুগুনোর রথ রঅ আর রথ চাক্কার ঘড় ঘড় রঅ শুনিবা। বাব্‌‌পুনে তারা পুয়ো-ছাগুনোরে সাহায্য গুরিবাত্তে ন-ফিরিবাক্; তারা আঢ্‌‌তানি লুলো ওইনে দুলি দুলি থেবঅ।

⁴ পলেষ্টীয়গুনোরে বেক্কুনোরে ভস্ত গুরিবার দিন আর সোর আর সীদোনর সাহায্যগুরিয়্যে বাদবাগি বেক মানুচ্চুনোরে মারে ফেলেবার দিন গোনেই এচ্চ্যে। মুই লগেপ্রভু পলেষ্টীয়গুনোরে, অত্তাৎ ক্রীৎ দ্বিবোত্তুন্ এচ্চ্যে মানুচ্চুনোরে ভস্ত গুরিম।

⁵ গাজা আবিলেচ্ গুরিনে তা মাঢাবো মুড়েব; অস্কিলোনরে ভস্ত গরা অবঅ। ও কলগর্ বাদবাগি মানুচ্চুন, আর কয়দিন তুমি নিজো কিয়্যেনি কাবিবা?

⁶ তুমি ইয়েন কোইনে কানি উদো, ‘ও লগেপ্রভুর তলোয়ারান, আর কয়দিন পরে তুই জিরেবে? তঅ খাপত্ তুই ফিরি যাহ্; থামা, অলর্ অ।’

⁷ মাত্তর্ মুই তারে উগুম দুয়োং সেনত্তে কিবাবোত্যেগুরি তে জিরেব? মুয়ই দঅ তারে অস্কিলোন আর সাগর পারানি আক্রমণ গুরিবাত্তে উগুম দুয়োং।”