যিরমিয় 44 - Chakma Bibleমূত্তিপূজোর কারনে অমংগল 1 মিসর দেজত্ যিদুক্কুন যিহূদী মিগ্দোল, তফন্হেষ, নোফ আর পথ্রোষ চাগালাত্ বজত্তি গুরিদাক্ তারা পৌইদ্যেনে লগেপ্রভুর এ কধাগান যিরমিয় ইধু ফগদাং অলঅ, 2 মুই ইস্রায়েলর গোজেন বেগত্তুন্ খেমতাবলা লগেপ্রভু কঙর্, মুই যিরূশালেম আর যিহূদার বেক্ আদামানি আর শঅর উগুরে যে অমকদ দজা আন্যং সিয়েনি তুমি দেখ্য। সিয়েনি এচ্চ্যে ভস্ত ওইনে পড়ি আঘে; সিয়েনিত্ কনজনে বজত্তি ন-গরন্। 3 সিয়েন ওইয়্যেদে তারার পাজিগানির কারনে, কিত্তে তারা দেব-দেবেদাগুনো মুজুঙোত্ আগর্বাট্টি জ্বালেইনে আর তারারে পূজো গুরিনে মরে অমকদ রাগ্ তুলি দুয়োন। সে দেব-দেবেদাগুনোর্ কধা তারায়ো হবর্ ন-পেদাক্, তুমিয়ো হবর্ ন-পেদা বা তমা পুরোণি মানুচ্চুনেয়ো হবর্ ন-পেদাক্। 4 মুই বার্ বার্ মঅ চাগরুনোরে, অত্তাৎ ভাববাদীগুনোরে পাদেয়োং; তারা কোইয়োন্দে যে, তারা যেন সেই জঘন্য কামানি ন-গরন্ যিয়েনি মুই ঘিনাং। 5 মাত্তর্ তারা সিয়েনত্ কান্অ ন-পাদন, মনযোগ্অ ন-দুয়োন; তারা তারার পাজিগানিত্তুন্ ন-ফিরোন বা দেব-দেবেদাগুনো ইধু আগর্বাট্টি জ্বালানাগান্অ ন-থামান। 6 সেনত্তে মর্ অমকদ রাগ্কান ঢালি দিয়্যে ওইয়্যে; সিয়েন যিহূদার শঅরত্ শঅরত্ আর যিরূশালেমর পধে পধে জুলি উঠ্যে আর সেনত্তে এচ্চ্যে সিয়েনি মানুচ্ নেইয়্যে আর ভস্ত ওই পড়ি আঘে। 7 ইক্কিনে মুই ইস্রায়েলর গোজেন বেগত্তুন্ খেমতাবলা লগেপ্রভু কঙর্, কিত্তে তুমি নিজোর্ এত্তমান সর্বনাশ গরর্? তুমি দঅ মরদ, মিলে, ঝি-পুয়ো আর চিগোন চিজিগুনোরে যিহূদাত্তুন্ নিগিলেই আনিনে নিজোরে আর তারার বেক্কুনোরে ভস্ত গুরি দুয়োর্। 8 তুমি যিয়েনত্ বজত্তি গুরিবাত্তে এচ্চ্য সেই মিসর দেজর্ দেব-দেবেদাগুনোর মূত্তিগুনো মুজুঙোত্ আগর্বাট্টি জ্বালেইনে কিত্তে তুমি মর্ রাগ্কানরে জাগেইয়ো? তুমি দঅ নিজোরে ভস্ত গুরিবা আর পিত্থিমির বেক্ জাদর্ মানুচ্চুনে তমারে ঘিনেবাক্ আর তমা নাঙানিলোই অভিশাব্ দিবাক্। 9 যিহূদা দেজত্ আর যিরূশালেমর পধে পধে তমা পুরোণি মানুচ্চুনোর, যিহূদার রাজা আর রাণিগুনোর আর তমার্ আর তমা মোগ্কুনোর পাচ্চ্যেমির্ কধানি কি তুমি ভুলি যেইয়ো? 10 এজঅ সং তুমি নিজোর মনান ভাঙিনে কট্টা কট্টা ন-গরঅ বা মরে ভোক্তিগুরিনে নয়ো দরঅ; তমার বা তমা পুরোণি মানুচ্চুনো ইধু মুই যে রীদি-সুদোমানি দুয়োং সিয়েনিয়ো তুমি ন-পালঅ। 11 “সেনত্তে মুই ইস্রায়েলর গোজেন বেগত্তুন খেমতাবলা লগেপ্রভু ঠিগ্ গোজ্যংগে, তমা উগুরে দজা আনিনে বেক্ যিহূদাগানরে মুই ভস্ত গুরিম। 12 যিহূদার বাদবাগি যিদুক্কুন মানুচ্ মিসরত্ যেইনে বজত্তি গুরিবাক্ বিলিনে ঠিগ্ গোজ্যন্ তারা বিরুদ্ধে মুই এমন বেবস্থা গুরিম যেনে তারা বেক্কুনে মিসরত্ ভস্ত অয়। তারা বেক্কুনে যুদ্ধোত্ ন-অলে ভাদরাদত্ মুড়িবাক্। তারা অবাক্ ঠাট্টা-মশ্কারি আর ঈচ্ গরেদে মানুচ্; তারা অবস্থা দেগিনে মানুচ্চুনে আমক্ অবাক্, আর তারা নাঙানিলোই মানুচ্চুনে অভিশাব্ দিবাক। 13 মুই যেবাবোত্যেগুরি যিরূশালেমানরে সাজা দুয়োং, যিগুনে মিসরত্ বজত্তি গরদন্ তারারে মুই সেবাবোত্যেগুরি যুদ্ধোত্, ভাদরাদত্ আর ভানালোই সাজা দিম্। 14 যিহূদার বাদবাগি যিদুক্কুন মানুচ্ মিসরত্ বজত্তি গুরিবাত্তে যেইয়োন তারা যিহূদা দেজত্ ফিরি এবাত্তে ধেই যেবাত্তে বা বাঁজি থেই ন-পারিবাক্, যুনিয়ো তারা সিয়েনত্ ফিরি এইনে বজত্তি গুরিবাত্তে চেবাক্; তারা ভিদিরে কয়েকজন বাদে আর কনজনে ধেইনে ফিরি এই ন-পারিবাক্।” 15 সেক্কে সিদুগো মানুচ্চুনে হবর্ পেদাক্, তারা মোগ্কুনে দেব-দেবেদা নাঙে আগর্বাট্টি জ্বালান তারা আর সিদু আজিল্ ওইয়্যে বেক্ মিলেগুন, অত্তাৎ মিসরর পথ্রোষ চাগালাত্ বজত্তি গুরিয়্যে বেক্কুনে এক্কো দাঙর্ দল ওইনে যিরমিয়রে কলাক্, 16 “তুই লগেপ্রভুর নাঙে যেদক্কানি কধা আমা ইধু কোইয়োচ্ সিয়েনি আমি ন-শুনিবোং। 17 আমি যিয়েনি কোইয়্যেই সিয়েনি বেক্কানি আমি হামাক্কায় গুরিবোং। যেবাবোত্যেগুরি আমি আমা পুরোণি মানুচ্চুনে, রাজাগুনে আর রাজার চাগরুনে যিহূদার শঅরত্ আর যিরূশালেমর পধে পধে আগাজ-রাণী নাঙে আগর্বাট্টি জ্বালেদং আর ঢাল্যে-উৎসর্বর অনুষ্ঠান গুরিদোং সেবাবোত্যেগুরি আমি গুরিবোং গুরিবোং। সে অক্তত্ আমার্ বোউত্ হানা এলঅ আর আমা অবস্থায়ো গম্ এলঅ আর আমি কনঅ দুঘ্ ন-পেই। 18 মাত্তর্ যেক্কেত্তুন্ ধুরি আমি আগাজ-রাণী নাঙে আগর্বাট্টি জ্বালানা আর পানীয়-উৎসর্ব গরানা ন-থামেলং, সেক্কেত্তুন ধুরি আমার্ অভাব অর্ আর আমি যুদ্ধো আর ভাদ রাদে ভস্ত ওই যের্।” 19 মিলেগুনে আরঅ কলাক্, “আমি যেক্কে আগাজ-রাণী নাঙে আগর্বাট্টি জ্বালেদং আর পানীয়-উৎসর্বর অনুষ্ঠান গুরিদোং আর তা ধোক্ক্যেন পিদে বানেদং সেক্কে কি আমা নেক্কুনে সে কধানি হবর্ ন-পেদাক্?” 20 যে মরদ আর মিলেগুনে যিরমিয়র কধাগানির জোব্পান দুয়োন তারা বেক্কুনো ইধু যিরমিয় কলঅ, 21 “যিহূদার আদাম আর শঅরানিত্ আর যিরূশালেমর পধে পধে তুমি আর তমা পুরোণি মানুচ্চুনে, তমা রাজাগুনে আর রাজার চাগরুনে আর দেজর্ অন্য মানুচ্চুনে যে আগর্বাট্টি জ্বালেদাক্ সিয়েনি কি লগেপ্রভুর মনত্ ন-পড়ে আর সে পৌইদ্যেনে কি তে চিদে ন-গরে? 22 তমা ভান্ন্যেই আর জঘন্য কামানি লগেপ্রভু যেক্কে আর সোজ্য গুরি ন-পারিলো সেক্কে তমা দেজ্চান মানুচ্ নেইয়্যে, ভস্ত ওইয়্যে জাগা আর ঈচ্ গরে পারা ওই গেলঅ আর সে দেজ নাঙান মানুচ্চুনে অভিশাব্ ইজেবে বেবহার গরন। এজঅ সেবাবোত্যে রোইয়্যে। 23 তুমি আগর্বাট্টি জ্বালেয়ো আর লগেপ্রভুর বিরুদ্ধে পাপ গোজ্য; তুমি তা কধানি অমান্য গোজ্য আর তা আইন-কানুন্, সুদোম আর কধানি ন-পালঅ; সেনত্তে এ দজাগান আমা উগুরে এচ্চ্যে। তুমি দঅ সিয়েনি দেগর্।” 24 সে পরেদি যিরমিয় বেক্ মরদ আর মিলেগুনোরে কলঅ, মিসরত্ বজত্তি গুরিয়্যে যিহূদার বেক্ মানুচ্চুন, তুমি লগেপ্রভুর কধানি শুনো। 25 ইস্রায়েলর গোজেন বেগত্তুন্ খেমতাবলা লগেপ্রভু এ কধাগান কোইয়্যে, তুমি কোইয়্যেদে, আগাজ-রাণী নাঙে আগর্বাট্টি জ্বালেবার আর পানীয়-উৎসর্বর অনুষ্ঠান গুরিবার যে শমক্কান্ তুমি গোজ্য সিয়েন তুমি হামাক্কায় পালেবা। তমা সে এগেম্ মজিম্ তুমি আর তমা মিলেগুনে কাম্বোই সিয়েনি দেগেয়্যে। “সেনত্তে তুমি যিয়েনি এগেম্ গোজ্য সিয়েনি গরঅ। তমা শমক্কানি রোক্ষ্যে গরঅ। 26 মাত্তর্ মিসরত্ বজত্তি গুরিয়্যে বেক্ যিহূদীগুন, তুমি লগেপ্রভুর কধানি শুনো। লগেপ্রভু কোইয়্যেদে, ‘মুই মঅ নাঙে শমক্ হেইনে কঙর্, মিসরর্ যে কনঅ জাগাত্ বজত্তি গুরিয়্যে যিহূদার কনঅ মানুচ্ মঅ নাঙে শমক্ হেইনে ন-হবাক্, জেদা লগেপ্রভুর নাঙে কঙর্। 27 তারার ভালেদিত্যে নয় মাত্তর্ অমংগলত্তে মুই তারা উগুরে খিয়েল্ রাগাঙর্; মিসরত্ বজত্তি গুরিয়্যে যিহূদীগুনে যুদ্ধোত্ আর ভাদরাদে এক্কুবারে ভস্ত ওই যেবাক্। 28 যিগুনে যুদ্ধোর্ আঢত্তুন্ রেহাই পেইনে মিসরত্তুন্ যিহূদা দেজত্ ফিরি এবাক্ তারা জনেদি অবাক্ খুবই কম। সে পরেদি যিহূদার বাদবাগি যিদুক্কুন মানুচ্ মিসরত্ বজত্তি গুরিবাত্তে এচ্চ্যন্ তারা হবর্ পেবাক্ কা কধা ঠিগ্ থেবঅ-মর্ না-তারার। 29 মুই লগেপ্রভু তমাত্তে এক্কান চিহ্নো দিম্, এ জাগানত্ তমারে সাজা দিম্ যেনে তুমি হবর্ পঅ তমা বিরুদ্ধে মুই যে অমংগলর্ দর্ দেগেয়োং সিয়েন ঠিগ্ থেবঅ। সে চিহ্নোগান অলঅ ইয়েন- 30 যিহূদার রাজা সিদিকিয়রে যে শত্রুবো মারে ফেলেবার চেরেস্তা গোজ্যে সে বাবিলর রাজা নবূখদনিৎসর আঢত্ যেবাবোত্যেগুরি মুই তারে তুলি দুয়োং, ঠিগ্ সেবাবোত্যেগুরি মিসরর্ রাজা ফরৌণ হফ্রারেয়ো মুই তার সে শত্রুগুনো আঢত্ তুলি দিম যিগুনে তা পরাণান নেযেবার্ চেরেস্তা গোজ্যন্।’ ” |
Copyright © 2021 Bangladesh Bible Society
Bangladesh Bible Society