যিরমিয় 43 - Chakma Bible

মিসর দেজত্ যিরমিয়

^1-2 লগেপ্রভু যিরমিয়রে যেদক্কানি কধা কবাত্তে মানুচ্চুনো ইধু পাদেয়্যে তে যেক্কে সে বেক্ কধানি কনা থুম্ গুরিলো সেক্কে হোশয়িয়র পুয়ো অসরিয়, কারেহের পুয়ো যোহানন আর বেক্ বাড়্‌বো মানুচ্চুনে যিরমিয়রে কলাক্, “তুই মিজে কধা কত্তে। ‘তুমি মিসরত্ বজত্তি গুরিবাত্তে ন-যেবা’ এ কধাগান কবাত্তে আমা গোজেন লগেপ্রভু তরে ন-পাদায়।

³ মাত্তর্ নেরিয়ের পুয়ো বারূকে আমা বিরুদ্ধে তরে রাগ্ তুলি দের্ যেনে বাবিলীয়গুনো আঢত্ আমারে তুলি দিয়্যে যায় আর তারা আমারে মারে ফেলান্ বা বন্দী গুরি বাবিলোত্ নেযান।”

⁴ এবাবোত্যেগুরি যোহানন, সৈন্যদলর বেক্ সেনাপতিগুন আর বেক্ মানুচ্চুনে যিহূদা দেজত্ থানা পৌইদ্যেনে লগেপ্রভুর উগুমান ন-মানিলাক্।

⁵ যিহূদার বাদবাগি যিদুক্কুন মানুচ্ বেক্ জাদ্‌‌তুনো ভিদিরে ছিদি পোজ্যন্ আর সিয়েনত্তুন্ যিহূদা দেজত্ বজত্তি গুরিবাত্তে ফিরি এচ্চ্যন্ তারারে নিইনে যোহানন আর বেক্ সেনাপতিগুনে মিসরত্ গেলাক্।

⁶ ইগুনে সেবাবোত্যে মরদ, মিলে, ঝি-পুয়ো আর রাজার ঝি, যিগুনোরে রাজার রোক্ষ্যেদলর সেনাপতি নবূষরদনে গদলিয় আঢত্ থোই যেইয়্যে এলাক্। ইগুনো সমারে ভাববাদী যিরমিয় আর বারূকরেয়ো নেযা অলঅ।

⁷ এবাবোত্যেগুরি তারা লগেপ্রভুর অবাধ্য ওইনে মিসরত্ সোমেলাক্ আর তফন্‌হেষ সং গেলাক্।

⁸ তফন্‌হেষত লগেপ্রভু যিরমিয়রে কোইয়্যেদে,

⁹ “তুই কয়ক্কো দাঙর্ দাঙর্ পাত্তর্‌‌‌লোই তফন্‌হেষত ফরৌনর রাজঘরত্ সোমেবার পথ্‌‌‌‍তানত্ ইট্‌‌‌‍তোই বানেয়্যে উদোনর মাদি তলে যিহূদীগুনো চোগো মুজুঙোত্ সিগুন লুগেই থঅ।

¹⁰ সে পরেদি তারারে কঅ, ইস্রায়েলর গোজেন বেগত্তুন্ খেমতাবলা লগেপ্রভু কোইয়্যেদে, ‘মুই মঅ চাগর্ বাবিল রাজা নবূখদ্‌নিৎসররে ডাগি আনিম আর যে পাত্তরুন্ মুই ইয়েনত্ লুগেই রাগেয়োং সিগুনো উগুরে তা সিংহাসনান্ বোজেম; তে সিয়েন উগুরে তা রাজ-চাদরান বিজেব।

¹¹ তে এইনে মিসরান আক্রমণ গুরিবো আর যিগুনে মরণত্তে ঠিগ্ ওই আগন তারার মরণ অবঅ, যিগুনে বন্দী অবাত্তে ঠিগ্ ওই আগন্ তারা বন্দী অবাক্ আর যিগুনে তলোয়ারত্তে ঠিগ্ ওই আগন্ তারা যুদ্ধোত্ মুরিবাক্।

¹² মিসরর দেব-দেবেদার মন্দিরুনোত্ তে আগুন বাজেই দিবো; তে তারার মন্দিরুন পুড়ি দিইনে তারার দেবেদাগুনোরে বন্দী গুরি নেযেব। গোরু চোরেয়্যেগুনে যেবাবোত্যেগুরি তা কিয়্যেগানত্ কাবড় উরোন্ সেবাবোত্যেগুরি তে মিসরানরে দিইনে নিজোরে জোড়েব আর সিয়েনত্তুন্ তে গমেডালে যেবগোই।

¹³ মিসরর বেলদেবেদা পূজোর্ খুদোগুন তে ভাঙি ফেলেব আর মিসরর দেব-দেবেদার মন্দিরুন পুড়ি ফেলেই দিবো।’ ”