যিরমিয় 41 - Chakma Bible

^1-2 ইলীশামার নাদিন, অত্তাৎ নথনিয়র পুয়ো ইশ্মায়েলে অলদে রাজ বংশর মানুচ্ আর রাজার দাঙর্ পোজিশনর কামগুরিয়্যেগুনোর এক্কো। তে সাত মাজত্ দশজন মানুচ্ সমারে নিইনে মিসপাত অহীকামর পুয়ো গদলিয় ইধু এলঅ। তারা যেক্কে এক সমারে হাদন্, সেক্কে ইশ্মায়েল আর তা সমারে দশজন মানুচ্ থিয়্যেইনে বাবিল রাজা নেযেয়্যে শাজন্‌গুরিয়্যে গদলিয়রে তলোয়ারর আঘাতে মারে ফেলেলাক্।

³ ইয়েন বাদেয়ো মিসপাত গদলিয় সমারে যিদুক্কুন যিহূদী এলাক্ আর সিয়েনত্ যিদুক্কুন বাবিলীয় সৈন্য এলাক্ ইশ্মায়েল তারারে বেক্কুনোরে মারে ফেলেল।

^4-5 গদলিয় খুন অনার্ পরেদি কনজনে সে কধাগান হবর্ পেবার আগে শিখিম, শীলো আর শমরিয়াত্তুন আশিজন মানুচ্ তারার দাড়িনি মুড়েইনে, কাবড়-চুগোর ফাদিনে আর নিজো কিয়্যেগান কাবিনে শোজ্য-উৎসর্ব গুরিবার জিনিস আর আগর্‌বাট্টি নিইনে লগেপ্রভুর ঘরত্ যাদন।

⁶ ইশ্মায়েলে তারা লগে দেগা গুরিবাত্তে কানদে কানদে মিসপাত্‌‌‌তুন নিগিলিলো। সে মানুচ্চুনো সমারে দেগা অনার তে কলঅ,“অহীকামর পুয়ো গদলিয় ইধু যেই।”

⁷ তারা শঅরত্ সমানা লগে লগে ইশ্মায়েল আর তা লগে মানুচ্চুনে সে মানুচ্চুনোরে মারে ফেলেইনে এক্কো কূয়ো ভিদিরে ফেলেই দিলাক্।

⁸ মাত্তর্ তারা ভিদিরেত্তুন্ দশজনে ইশ্মায়েলরে কলাক্, “আমারে ন-মারিবে। মাদ ভিদিরে আমার গম, কেজ্‌বিজি, তেল আর মধু লুগেয়্যে ‌আঘে।” সেনত্তে ইশ্মায়েলে তারারে ইরি দিলো, অন্যগুনো সমারে মারে ন-ফেলেল।

⁹ গদলিয় আর অন্যগুনোরে মারে ফেলেইনে যে কূয়োবো ভিদিরে তে তারার বেক্কুনোর মরাগুন ফেলেই দিয়্যে সিয়েন ইস্রায়েলর রাজা বাশা আঢত্তুন্ রোক্ষ্যে পেবাত্তে রাজা আসা যুক্কোল্ গোজ্যে। ইশ্মায়েলে সিবে মরালোই ভোরেই ফেলেল।

¹⁰ ইশ্মায়েলে মিসপার বাদ্‌‌বাগি বেক মানুচ্চুনোরে বন্দী গুরিলো। সিগুনো ভিদিরে এলাক্ রাজার ঝিগুন আর সিধু থোই যেয়্যে অন্য বেক্ মানুচ্চুন। রাজার্ রোক্ষ্যে দলর্ সেনাপতি নবূষরদনে এই বেক্ মানুচ্চুনো উগুরে গদলিয়রে বোজেই দিয়্যে। ইশ্মায়েল তারারে বানি লোইনেই অম্মোনীয়গুনো ইধু পার ওই যেবাত্যে যাহ্ ধুরিলো।

¹¹ কারেহের পুয়ো যোহানন আর তা সমারে সৈন্যদলর বেক্ সেনাপতিগুনে যেক্কে ইশ্মায়েলর বেক্ ভান্ন্যেই কামর্ কধানি শুনিলাক্,

¹² সেক্কে তারা তারার বেক্ মানুচ্চুনোরে নিইনে তা সমারে যুদ্ধো গুরিবাত্তে গেলাক্। গিবিয়োনর দাঙর্ পুয়োর্‌‌বো কায়-কুরে তারা তা দেগা পেলাক্।

^13-14 ইশ্মায়েলে মিসপাত্তুন্ যিদুক্কুন মান্‌‌‌জ্যরে বন্দী গুরিনে নেযার্ তারা যোহানন আর তা লগে সৈন্যদলুনোর সেনাপতিগুনোরে দেগিনে হুজি অলঅ আর ফিরিনে যোহানন ইধু গেলঅ।

¹⁵ মাত্তর্ ইশ্মায়েল আর তা আস্‌তোজন মানুচ্ যোহানন ইত্তুন ধেই যেইনে অম্মোনীয়গু‌‌‌নো ইধু গেলাক্।

¹⁶ সে পরেদি যোহানন আর তা লগে সৈন্যদলর বেক্ সেনাপতিগুনে গিবিয়োত্তুন মিসপার বাদবাগি বেক্ মানুচ্চুনোরে ফিরেই আনিলো। ইশ্মায়েলে গদলিয়রে খুন গরানার পরেদি যোহাননে তা আঢত্তুন্ এই বেক্ সৈন্যগুনোরে, মিলে আর ঝি-পুয়োগুনোরে আর রাজার চাগরুনোরে উদ্ধোর্ গুরিলো।

¹⁷ তারা মিসরত্ যেবার পদথ্ বৈৎলেহম ইধু গেরুৎ কিম্‌হমত্ কয়েক দিনোত্তে থেলাক্।

¹⁸ তারা বাবিলীয়গুনোর দরে যিহূদাত্তুন্ ধেই যাদন, কিত্তে ইশ্মায়েলে বাবিল রাজার বানেয়্যে শাজন্‌গুরিয়্যে গদলিয়রে মারে ফেলেয়্যে।