যিরমিয় 40 - Chakma Bible

যিরমিয়র উদ্ধোর্ পানা

¹ যিরূশালেম আর যিহূদার বেক বন্ধীগুনোরে বাবিলত্ নেযেবার অক্তত্ বাবিল রাজার সেনাপতি নবূষরদনে তারা সমারে যিরমিয়রেয়ো শিগোল্লোই বানিনে নেযার্। পদথ্ তে রামাত্তুন্ যিরমিয়রে ইরি দিলো। ইয়েনর্ পরেদি লগেপ্রভু যিরমিয় ইধু কধা কোইয়্যে।

² যিরমিয়রে ইরি দিবার সময়োত্ নবূষরদনে তারে কোইয়্যেদে,“তর্ গোজেন লগেপ্রভু যিহূদা বিরুদ্ধে এ ভস্ত অবার কধা কোইয়্যেদে।

³ লগেপ্রভু সিয়েন ঘোদেইয়্যে, যেবাবোত্যে কোইয়্যে, সেবাবোত্যে গোজ্যে। তুমি লগেপ্রভুর বিরুদ্ধে পাপ গোজ্য আর তা কধার অবাধ্য ওইয়ো।

⁴ মাত্তর্ এচ্চ্যে মুই তঅ আঢ শিগলত্তুন্ তরে উদ্ধোর গুরিলুং। তুই যুনি চাজ্ সালে মঅ সমারে তুই বাবিলোত্ যেই পারচ্, মুই তরে দেগাশুনো গুরিম; মাত্তর্ যুনি যেবাত্তে ন-চাজ্ সালে ন-যেচ্। চাহ্, পুরো দেজ্‌চান তঅ মুজুঙোত্ পড়ি আঘে; তুই যিয়েনত্ হুজি যেই পারচ্।”

⁵ মাত্তর্ যিরমিয় সিয়েনত্তুন্ যেবার আগেদি নবূষরদনরে কোইয়্যেদে, “তুই শাফনর নাদিন্, অত্তাৎ অহীকামর পুয়ো গদলিয় ইধু ফিরি যাহ্। বাবিলর রাজা যিহূদার বেক্ শঅরানি উগুরে গদলিয়রে নেযা ওইয়্যে। তুই তা সমারে মানুচ্চুনো ভিদিরে থেই পারচ্ বা তর্ আওজ্ মজিম অন্য কনজাগাত্অ যেই পারচ্।” সে পরেদি সেনাপতিবো তারে হানা-দানা আর বক্‌শিজ্ দিইনে বিদেয় দিলো।

⁶ সেক্কে যিরমিয় মিসপাত অহীকামর পুয়ো গদলিয় ইধু যেইনে তা সমারে দেজত্ থোই যেইয়্যে মানুচ্চুনো ভিদিরে রলঅ।

গদলিয়র মরানা

⁷ সে অক্তত্ যিহূদার সৈন্যদলর যিদুক্কুন সেনাপতি আর তারা মানুচ্চুন্ খুলো মাদত্ এলাক তারা শুনিলাক্, অহীকামর পুয়ো গদলিয়রে বাবিল রাজা দেজর শাজন্‌গুরিয়্যে ইজেবে নেযেয়্যে আর যিগুনোরে বন্দী গুরিনে বাবিলোত্ নেযা ন-অয় দেজর্ সেই বেক্ নাঢা মরদ, মিলে আর পুয়ো-ঝিগুনোর ভারান তা আঢত্ দিয়্যে ওইয়্যে।

⁸ সেক্কে সে সৈন্যগুনে , অত্তাৎ নথনিয়র পুয়ো ইশ্মায়েল, কারেহের দ্বিবে পুয়ো যোহানন আর যোনাথন, তন্‌হূমতর পুয়ো সরায়, নটোফাতীয় এফয়র পুয়োগুনে আর মাখাথীয়র পুয়ো যাসনিয় আর তারার পুয়োগুনে মিসপাত গদলিয় ইধু এলাক্।

⁹ শাফনর নাদিন, অত্তাৎ অহীকামর পুয়ো গদলিয় তারার আর তারা মানুচ্চুনো ইধু শমক্ হেইনে এ কধাগান কলঅ, “বাবিলীয়গুনোর তলে অদে তুমি ন-দোরেয়ো; দেজত্ বজত্তি গরঅ আর বাবিল রাজার অধিন অ, ইয়োত্ তমার গম্ অবঅ।

¹⁰ মুই নিজে মিসপাত থেম্ আর যিদুক্কুন বাবিলীয় আমা ইধু এবাক্ তারা ইধু মুই তমা তপ্পে ওইনে কধা কোম্; মাত্তর্ তুমি আংগুর-রস, গরম কাল ফল আর তেল থুবেইনে তমা পিলেত্ জমা গুরিবা আর তুমি যেদক্কানি আদাম আর শঅর গজক্ গুরি নিবা সিয়েনিত্ বজত্তি গুরিবা।”

¹¹ মোয়াব, অম্মোন, ইদোম আর অন্য দেজর বেক্ যিহূদীগুনে শুনিলাক্, বাবিল রাজা যিহূদা দেজত্ কিজু মান্‌জ্যরে থোই যেইয়্যে‌ আর গদলিয়রে তারা উগুরে শাজন্‌গুরিয়্য নেযেয়্যে।

¹² সেক্কে তারা যেদক্কানি দেজত্ ছিদি পোজ্যন সিয়েনত্তুন্ বেক্কুনে যিহূদা দেজর মিসপাত গদলিয় ইধু ফিরি এলাক্। তারা বোউত্ আংগুর-রস আর গরম কাল ফল থুবেলাক্।

¹³ পরেদি কাহেরর পুয়ো যোহানন আর খুলো মাঢত্ থেইয়্যে সৈন্যগুনোর বেক্ সেনাপতিগুন মিসপাত্ গদলিয় ইধু এইনে তারে কলাক্,

¹⁴ “তুই কি হবর্ পাজ্, অম্মোনীয়গুনোর রাজা বালীসে তরে মারে ফেলেবাত্তে নথনিয়র পুয়ো ইশ্মায়েলরে পাদেয়্যে?”

¹⁵ সেক্কে কারেহর পুয়ো যোহানন মিসপাত গদলিয়রে ভিদিরে ভিদিরে কলঅ, “তুই উগুম দিলে মুই যেইনে নথনিয়র পুয়ো ইশ্মায়েলরে মারে ফেলেম, কনজনে হবর্ ন-পেবাক্। তে কিত্তে তরে মারে ফেলেব? সেক্কে দঅ যিদুক্কুন যিহূদী তঅ চেরোকিত্তে এগত্তর্ ওইয়োন তারা ছিদি পড়িবাক্ আর যিহূদার বাদবাগি মানুচ্চুনে ভস্ত অবাক্।”

¹⁶ মাত্তর্ অহীকামর পুয়ো গদলিয় কারেহর পুয়ো যোহাননরে কলঅ, “সেবাবোত্যে কাম্ ন-গুরিচ্। তুই ইশ্মায়েল পৌইদ্যেনে যিয়েন কোইয়োচ্ সিয়েন মিজে।”